Os GDG españois celebran un cumio en Compostela
venres, 19 de setembro do 2014
Esta tarde o Salón de Actos da
Escola Técnica Superior de Enxeñaría de Santiago de Compostela xuntou a preto
dun cento de desenvolvedores con tecnoloxías de Google de toda España no
Spanish GDG Summit, un cumio formado por unha serie de relatorios de figuras
relevantes a nivel estatal, como o especialista en servizos na nube Nacho Coloma, que foi o
encargado de abrir o encontro para afondar na tecnoloxía de Cloud GDE.
Un tanto distinta foi a proposta de Mariona Aloy, quen
expuxo distintos proxectos de emprendemento desenvolvidos en Barcelona
baseándose tanto en tecnoloxías de Google como a inspiradora comunidade de MOB Makers, que é un
grande exemplo do que pode conseguirse grazas á popularización de tecnoloxías
como a impresión 3D, a robótica, o hardware aberto ou o uso de cortadores láser
para facer realidade os nosos deseños.
O relatorio de Raúl
Otaolea foi máis tradicional, presentando o framework
para a creación de videoxogos WiMi5, e afondando nas plataformas
de desenvolvemento baseadas en HTML5.
Completou o evento unha presentación sobre os eventos Betabeers por parte de varios
dos seus promotores, Pablo Rodríguez e Álex Andreu, convidando aos asistentes a
participar ou organizar algún destes encontros para desenvolveres web e de
aplicacións móbiles que en Galicia contan xa cunha traxectoria notable, comezando a
celebrarse hai máis de dous anos.
Pero o cumio de desenvolvedores non se limita aos relatorios públicos, senón
que durante a fin de semana completaranse con xornadas de traballo nas que
tirarán proveito da presenza de numerosos expertos de distintos currunchos de
España.
- O cumio rematou converténdose nunha nova edición galega de Betabeers
- Fotografía de familia de boa parte dos participantes na xornada de hoxe dos GDG españois en Compostela