Os emprendedores de Galicia Open Future amosaron os seus proxectos ante o grupo de investimento TIC máis importante de España
venres, 24 de outubro do 2014
Arredor dun cento de emprendedores galegos
participaron este venres na xornada de networking con
especialistas en aceleración e investimento organizada por
Telefónica. A cita inseriuse dentro das actividades de Galicia
Open Future, o centro de emprendemento posto en
marcha pola operadora na Cidade da Cultura de Santiago. A xornada foi
un fluxo constante de ideas, pautas e propostas, tanto dos
profesionais galegos aos representantes de Wayra e Amérigo, coma
destes cara aos responsábeis dos proxectos acubillados en Galicia
Open Future. Máis polo miúdo, estes amosaron en detalle en que
consisten as súas iniciativas (respondendo a preguntas concretas
como o tipo de público a quen se dirixe e porqué este público
estaría disposto a pagar polo produto), e aqueles, os mentores,
axudáronlles a acadar a presentación perfecta e a encamiñar o
mellor posíbel os seus desenvolvementos.
O intercambio de ideas comezou nada máis abrirse a
xornada. Participaron nela os responsábeis dos cincuenta proxectos
galegos acelerados por Galicia Open Future, o CEO de Wayra (a
aceleradora de start-up de Telefónica) Gonzalo Martín
Villa, e o fundador e xestor de Fondos Amérigo, o grupo de fondos de
investimento tecnolóxicos creado por Telefónica, Aquilino Peña.
Logo das presentacións e dunhas breves introducións
sobre en que consisten Wayra e Amérigo, pasouse á presentación
dunha parte dos proxectos abeirados á aceleradora (proxectos como
CreaAppcuentos, Monet, ParkApp ou Appentra, entre outros). Aquilino
Peña e Gonzalo Martín interesáronse polos detalles de todas e cada
unha das iniciativas, animando aos seus responsábeis a que se
sentiran, máis que nunca, coma os integrantes dun ecosistema de
innovación onde o obxectivo fundamental é xuntar as maiores
posibilidades de éxito. O CEO de Wayra fixo un percorrido pola
aceleradora de Telefónica, pola súa presenza en 14 países de todo
o mundo, pola súa manchea de centros de emprendemento e pola súa
arela fundamental de “seguir medrando e aprendendo”. Ao fío
disto, animou aos presentes a aproveitar ao máximo as posibilidades
que achega Galicia Open Future, “unha iniciativa excepcional e chea
de potencialidades que, como Telefónica e Wayra, precisa tamén do
éxito da innovación dos emprendedores para sobrevivir no futuro”.
Tamén destacou o feito de que nin en Wayra nin na aceleradora galega
do Gaiás, dúas pólas do mesmo tronco, se esixan exclusividades ou
compromisos sobre os desenvolvementos impulsados.
Pola súa banda, Aquilino Peña falou de
investimento tecnolóxico e comparou a estrutura de Amérigo cunha
escaleira cos seus chanzos, “cada un deles con cousas que hai que
facer ben antes de pasarmos ao seguinte”. En definitiva, dixo, non
hai que bulir nin apurarse, porque todos os pasos a dar teñen os
seus criterios que cumprir e esixencias polas que velar. Peña falou
tamén de Wayra (“o ecosistema da innovación máis desenvolvido de
España”) e da propia actividade de Amérigo, que xa investiu
nunhas trinta compañías e consolidouse como o fondo máis activo do
ámbito estatal. O seu cometido, sinalou, é procurar proxectos
específicos que cumpran cuns requisitos ben claros, que sexan
rendíbeis dende o punto de vista do negocio. Ou sexa, que sexan
susceptíbeis de gañar en valor co paso do tempo, sempre cara
arriba, e que ademais se presenten como iniciativas equilibradas, con
equipos ben integrados (o ideal, dixo, son equipos de dúas ou tres
persoas) que estean en capacidade de responder ao momento á seguinte
pregunta: “Quen estaría disposto a pagar polo produto e porqué?”
Peña tamén falou de que o rango de investimento de Amérigo sitúase
entre os 500.000 e o millón de euros.
Sobre Galicia Open Future
Galicia Open Future funciona xa de forma efectiva
desde mediados de setembro nas súas instalacións do Gaiás.
Traballan alí máis 100 persoas pertencentes aos 50 proxectos
seleccionados para esta primeira fase, elixidos entre os máis de 130
que se presentaron á convocatoria. A maioría dos proxectos procede
de Vigo e A Coruña, seguidos de Santiago de Compostela, e presentan
diferentes graos de maduración (idea, semente, prototipo, piloto ou
lanzamento). Céntranse en sectores como o tecnolóxico aplicados a
distintos ámbitos (marítimo-pesqueiro, agricultura, enerxía),
Cidades Intelixentes, lecer, cultura, saúde, educación e turismo, e
algúns xurdiron en universidades e centros tecnolóxicos de
Galicia.
Galicia Open Future é un proxecto impulsado por
Telefónica -que investirá no seu funcionamento preto do millón de
euros anuais- en colaboración coa Xunta de Galicia a través da
Axencia para a Modernización Tecnolóxica de Galicia, AMTEGA. Os 50
proxectos seleccionados recibirán unha axuda, achegada pola Axencia
Galega de Innovación, de 2.000 euros. Unha vez superada a primeira
fase, os proxectos xa evolucionados poderán optar a outra achega de
25.000 euros, que deberá destinarse ao desenvolvemento do propio
proxecto. Ademais, as iniciativas que consigan esta segunda axuda
poderán ter a posibilidade de acceder a un préstamo reembolsábel
doutros 25.000 euros.