Os novos empresarios de Ferrol achegan un obradoiro sobre posicionamento e mercadotecnia en liña
venres, 21 de novembro do 2014
A Asociación de Novos
Empresarios de Ferrolterra, AJE-Ferrolterra,
está a preparar un obradoiro sobre posicionamento e mercadotecnia en
liña, de interese para as empresas e os profesionais que queiran
actualizar o seu coñecemento sobre como tirar o máximo partido das
redes sociais e da Internet como canles para promoción,
comunicación, venda e distribución de produtos e servizos. O
encontro, a desenvolver en colaboración co Concello de Ferrol,
celebrarase o vindeiro 27 de novembro, a partir das 16 horas. Trátase
do obradoiro Emprende 3.0 sobre posicionamento SEO e márketing en
liña.
A sesión, informan os
organizadores, será ante todo práctico, e como dixemos búscase con
ela familiarizar aos emprendedores locais “coas bases precisas para
acadar o máximo aproveitamento das novas tecnoloxías, e que iso
redunde nuns mellores resultados das súas empresas”.
Expertos nesta materia
instruirán aos asistentes no uso destes recursos, moi acaidos para
conseguir a máxima visibilidade e operatividade das súas páxinas
web, “de forma que garantan a maior efectividade das súas campañas
de mercadotecnia en liña”, engaden os organizadores. O novo centro
de coworking, aberto no Centro de Negocios Area 76 (A
Gándara), será onde se leven a cabo as clases deste obradoiro que
está aberto a todos os emprendedores. A inscrición é de balde e
pódese formalizar a través da conta aje@cofernet.com ou chamando ao
teléfono 981 33 33 22.