Patricia Argerey toma posesión como nova directora de GAIN
venres, 9 de decembro do 2016
Hoxe celebrouse
en Santiago a toma de posesión de Patricia Argerey Vilar como nova
directora da Axencia Galega de Innovación (GAIN), incorporación
da que xa
dimos conta os días pasados dende Código Cero salientando a súa
traxectoria profesional previa, por exemplo o seu labor á fronte
do gabinete do conselleiro de Economía, Emprego e Industria,
Francisco Conde. Precisamente, no acto de investimento celebrado hoxe
participou o conselleiro de Economía, destacando que “a nova
responsábel de GAIN ten como principal obxectivo que Galicia e a súa
industria sigan incorporando a innovación ao seu ADN”.
Conde salientou tamén “a vocación
de servizo público” de Argerey Vilar para que GAIN cumpra os
grandes retos que ten sobre a mesa ata o ano 2020, retos que inclúen
o afianzamento do polo industrial e tecnolóxico de avións non
tripulados para uso civil de Rozas, o cumprimento da Estratexia de
Especialización Intelixente de Galicia (RIS3) ou “estreitar o
vínculo entre empresa e universidade co obxectivo de que a
transferencia de coñecemento sexa cada día más útil para a
economía galega”.
A nova directora de GAIN amosouse
agradecida “pola confianza amosada polo conselleiro” e fixo saber
que a súa folla de ruta é “traballar polos galegos e galegas para
impulsar a innovación na Comunidade, dando así continuidade ao
labor realizado polo seu antecesor no cargo, Manuel Varela”.
Argerey Vilar,
nada en Lugo no ano 1977, é doutora en Ciencias Económicas e
Empresariais pola Universidade Complutense de Madrid e conta cun
máster en Estudos Políticos Aplicados pola Fundación Internacional
e para
Iberoamérica de Administración e
Políticas Públicas. Ocupaba desde xaneiro de 2013 o cargo de xefa
de gabinete do conselleiro de Economía, Emprego e Industria, onde
chegara despois do seu labor como asesora do presidente da Xunta
desde o ano 2009.
Con anterioridade foi profesora na
Universidade Complutense de Madrid e secretaria xeral e coordinadora
de proxectos I+D do Instituto de Estudios Europeos da Universidade
CEU San Pablo, onde exerceu tamén a docencia.