Play-Doc e o operador R levan á televisión dixital os contidos do festival de Tui
xoves, 29 de novembro do 2012
Play-Doc,
o Festival Internacional de Documentais con sede en Tui, e máis o
operador galego R presentaron este xoves 29 ante os medios de
comunicación a nova canle de subscrición Play-Doc TV. Esta nova
achega audiovisual permitiranos acceder, a través do servizo de
vídeo baixo demanda de R, a contidos presentados anualmente no
festival. A iniciativa diríxese a ampliar a proposta do certame
“dando a coñecer un tipo de cinema documental que decote non
ten cabida nos espazos comerciais de exhibición e ao que é difícil
acceder fóra do circuíto de festivais”.
A
través disto, unha escolma dos traballos máis salientábeis
presentados en Tui, así como obras destacadas dos directores
tratados nas retrospectivas de Play-Doc, proxectarase agora tamén no
catálogo de vídeo baixo demanda do operador galego, tendo diante
un público potencial de 100.000 fogares galegos.
O sistema de subscrición
Os clientes de televisión de R poderán
acceder a esa escolma de documentais a través do servizo de
subscricións de R, gratuíto neste período de lanzamento. A
televisión dixital interactiva do operador galego permitirá acceder
á lista de contidos á que o cliente se subscribe e visualizar os
documentais tantas veces coma queira, no intre que desexe e facendo
pausas ou rebobinando ao seu gusto.
Nun plano máis concreto, dicir que a
canle Play-Doc TV comezou a súa programación en R coa filmografía
completa de Ross McElwee, “figura esencial do documental
autobiográfico norteamericano”, sinalan fontes do certame de
Tui, como prato forte. A ela súmase unha escolma das obras máis
representativas que pasaron por Play-Doc nos últimos anos. “Novos
títulos iranse engadindo cada mes á canle, de xeito
que o subscritor poderá acceder cada vez a máis películas”,
informan.
A organización de Play-Doc aproveitou
a ocasión para agradecerlle a R “a posibilidade que lle brinda
ao festival de Tui de iniciar esta nova aventura, que supón un
crecemento para o propio certame e unha oportunidade de ofrecer unha
televisión de calidade e especializada”.