Pontevedra acada un premio Smart City en Hong Kong
mércores, 7 de outubro do 2015
- A Cidade do Lérez vista dende o ar nunha imaxe de Pontevedraviva
A cidade de Pontevedra vén de recibir un
recoñecemento internacional no ámbito das Smart Cities polo
seu modelo urbano e, máis polo miúdo, polo seu modelo de mobilidade
sustentábel e intelixente. Trátase do Euro China Smart Mobility
City Award, categoría de Deseño Urbano / Planificación Urbana,
adicado a experiencias innovadoras de cidades a prol de rendibilizar
transportes e reducir contaminación.
O premio foi creado pola entidade francesa Fundación
Prospectiva e Innovación. Entregarase en Hong Kong o vindeiro 24 de
novembro no marco da Mostra Internacional China da Nova Enerxía, na
que tamén serán galardoadas outras 19 cidades europeas e 20
chinesas que destacan pola súa mobilidade intelixente.
- O alcalde de Pontevedra, Miguel Fernández Lores, acudirá a recoller o premio en Hong Kong o vindeiro 24 de novembro
A respecto deste
galardón, o
Concello de Pontevedra valorou moi positivamente que se recoñeza o
traballo do goberno local no ámbito das Smart
Cities, un traballo que, recorda, vén de moi antigo:
“Desde o ano 1999, a cidade está a recuperar espazos públicos
para os cidadáns, aumentando as oportunidades de mobilidade para
persoas con discapacidade, promovendo a autonomía dos nenos, creando
as condicións adecuadas para un estilo de vida saudábel, aumentando
a seguranza viaria e a sensación de seguridade, redución nas
emisións de gases e contaminación acústica”.
No ámbito máis
puramente TIC, Pontevedra acadou repercusión informativa por cousas
como
os paneis que subministran información de interese nos dispositivos
dos turistas ou as
medidas vindeiras para fomentar a participación cidadá pola vía da
Rede e os dispositivos (concorrencia veciñal nos plenos de
goberno). Ao premio Euro China, cómpre engadir o
recibido o ano pasado en Dubai por mor da súa aposta pola
innovación, a inclusión social e a calidade urbana.