Presentadas perante os arquivistas da nosa terra as características do Arquivo Dixital de Galicia
mércores, 26 de novembro do 2014
A primeira hora da mañá inaugurouse no Gaiás (Santiago)
a
xornada técnica de presentación do Arquivo Dixital de Galicia aos
profesionais do Sistema de Arquivos da nosa terra. A xuntanza
desenvólvese no auditorio da Biblioteca e o Arquivo de Galicia e
nela participan medio cento de membros do devandito Sistema, formado
polos arquivos de todas as Administracións galegas (a autonómica,
as provinciais, as locais) e tamén polos fondos das nosas
universidades e de institucións como o Parlamento, o Consello de
Contas, a Real Academia Galega e o Consello da Cultura.
Na
xornada de presentación interviñeron Mar Pereira, directora de
AMTEGA, e Anxo Lorenzo, secretario xeral de Cultura, amais da
directora xerente da Fundación Cidade da Cultura, Beatriz González
Loroño. A finalidade da convocatoria é amosar ás arquiveiras e
arquiveiros os pasos dados no proxecto do Arquivo Dixital de Galicia.
Na
apertura do encontro fíxose saber que o futuro Arquivo Dixital é
unha estrutura tecnolóxica destinada a servir como marco de
referencia para os modelos de xestión de documentos electrónicos.
Máis polo miúdo, con el darase soporte ao Arquivo Electrónico
Administrativo e do Arquivo Electrónico do Patrimonio Documental.
No
acto tamén se lembrou a razón de ser do Arquivo e do seu
desenvolvemento, que responde a unha estratexia de “creación de
canles de comunicación, colaboración e pulo entre os arquivos que
constitúen o sistema e os seus profesionais”.
Igualmente,
fíxose un repaso polas áreas das que constará o Arquivo, sendo o
devandito Arquivo Electrónico Administrativo un recurso
especialmente acaido para suprimir o formato papel na Administración
e posibilitar unha xestión e preservación segura e eficiente da
documentación dixital. Segundo fixo saber Pereira, este recurso “é
chave para garantir a interconexión dos servizos coas entidades
locais e para reforzar os servizos do Centro de Proceso de Datos do
Gaiás como nodo central de custodia de toda a información do
Arquivo Dixital, desde onde se facilitarán procedementos
administrativos e se lles prestará servizos de aloxamento documental
ás entidades locais galegas”.
Pola
súa banda, o Arquivo Electrónico do Patrimonio Documental
acubillará os fondos dixitalizados do patrimonio documental. “Este
Arquivo Electrónico do Patrimonio Documental”, engadiuse no acto
celebrado no Gaiás, “arrancará coa dixitalización de 50.000
documentos dos Arquivos do Reino de Galicia, do Histórico Provincial
de Ourense, e Municipal do Concello de Tui”.