Preto dun centenar de persoas participaron no programa de emprego Mos 3.0
mércores, 31 de agosto do 2016
Este mércores celebrouse
a clausura e entrega de diplomas do Programa Integrado de Emprego Mos
3.0, iniciativa a través da cal 90 alumnos e alumnas recibiron
formación para facilitar o seu acceso ao ámbito laboral. No
acto participou a secretaria xeral de Emprego, Covadonga Toca,
salientando que esta iniciativa “ofrece unha cualificación
adaptada á demanda do mercado laboral, impulsando o uso das novas
tecnoloxías, ao tempo que achega aos participantes a oportunidade de
acceder a un emprego”.
Impartíronse dous cursos (creación de aplicacións
para teléfonos móbiles e preparación da proba libre da ESO)
mediante os cales fíxose fincapé na formación, na prospección
empresarial e na orientación laboral. En total, mantivéronse
prospeccións en máis de 100 empresas e entidades e realizáronse 43
accións formativas, cunha media de participación de 12 persoas por
curso.
A secretaria xeral de Emprego puxo en valor a
importancia da cooperación entre a Administración autonómica e os
concellos para o desenvolvemento destes plans. Así, tras a clausura
do primeiro Programa Integrado de Emprego Mos 3.0 (un exemplo do
devandito tipo de cooperación), está previsto empezar este ano unha
segunda edición dirixida a 60 persoas desempregadas e que se
encontren inscritas como demandantes nas oficinas de emprego de Mos.
Neste caso, as accións formativas diríxense sobre todo a persoas
menores de 30 anos.