Quece motores a Noite da Enxeñaría en Informática do CPEIG
xoves, 19 de maio do 2016
Un
ano máis, e xa van oito, o Colexio
Profesional de Enxeñaría en Informática de Galicia (CPEIG) vai
entregar os seus importantes e senlleiros galardóns ao abeiro da
Noite da Enxeñaría en Informática Galicia (anoite.gal),
o 3 de xuño en Santiago. A través de distintas categorías, os
colexiados e colexiadas salientarán e visualizarán perante Galicia
e o mundo as iniciativas, proxectos e persoeiros que máis e mellor
tiveran impulsado e mellorado a profesión da Enxeñaría en
Informática na nosa terra. A día de hoxe (19 de maio) xa sabemos os
nomes dalgunhas destas entidades recoñecidas polo CPEIG. Por exemplo
o
proxecto Civil UAVs Initiative (Premio Iniciativa da
Administración) ou a
nova empresa NLPgo (Premio Iniciativa Emprendedora).
Ademais,
distinguirase o labor de Vodafone a prol de botar abaixo barreiras
tecnolóxicas (Premio eInclusión) e máis o da Autoridade Portuaria da Coruña polo proxecto Smart Port A Coruña, desenvolvido pola UTE Avante Emetel-Altia (o Porto da Coruña aposta por unha solución tecnolóxica a medida que innova sobre solución existentes e que inclúe investigación e desenvolvemento de novas funcionalidades; deste xeito a comunidade portuaria quedaría habilitada para o desenvolvemento de operación e servizos de forma integrada, segura, eficiente e innovadora).
Cómpre
destacar tamén (por significado, compromiso e implicación) o
recoñecemento a Nieves Brisaboa, profesora, investigadora e
directora do Laboratorio de Bases de Datos da Facultade de
Informática da Coruña (recoñecida co Premio Ada Byron).
As
distincións, na súa totalidade, son as seguintes: Premio
Traxectoria Profesional, Premio Iniciativa Emprendedora, Premio
Proxecto Fin de Carreira (aberto á presentación de candidaturas e
cunha dotación de 1.000 euros), Premio Iniciativa de Administración,
Premio Iniciativa Empresarial, Premio Colexiado de Honra e Premio Ada
Byron (dirixido a mulleres enxeñeiras en Informática, líderes na
adopción da tecnoloxía e, segundo se fai saber nas bases do
galardón, “con capacidade para mesturar coñecementos técnicos e
visión social”).
A
maiores convocouse o Premio Iniciativa eInclusión, que irá dar a
mans da operadora Vodafone polo seu compromiso co pleno afianzamento
da cidadanía (toda a cidadanía) na Sociedade do Coñecemento. O
galardón, como se indica no seu propio nome, vai dirixido a
visualizar e distinguir aquelas achegas galegas con meirande
potencial e maior capacidade para rematar coa fenda dixital en
calquera das súas manifestacións (de xénero, urbano-rural,
económica, social, cultural, de idade, etc). Ou sexa, para traballar
a prol da máxima igualdade de condicións arredor do acceso (e uso)
á Sociedade da Información.
Tamén se
lle renderá homenaxe á Escola Superior de Enxeñaría en
Informática da Universidade de Vigo polos seus 25 anos de
traxectoria académica.
Segundo
fan saber dende o CPEIG acerca da preparación da Noite e as grandes
novidades postas en xogo este ano, “a Noite da Enxeñaría en
Informática de Galicia está xa quecendo os seus motores para que
sexa unha velada inesquecíbel para todas as colexiadas e
colexiados”. E engade: “Este ano celebramos a oitava edición,
con máis novidades, máis premios, máis patrocinadores e cunha
figura da televisión e o teatro, Leo Harlem, quen fará de mantedor
dos premios e nos ofrecerá un divertido monólogo”.
Segundo
informa o CPEIG, agás no caso da persoa premiada co galardón ao
Proxecto Fin de Carreira, os demais premiados recibirán unha
estatuíña sen dotación económica.
A entrega
destes premios realizarase o día 3 de xuño en Santiago de
Compostela, no Hotel Monumento San Francisco, no marco dunha cea de
gala á que están convidados diversos persoeiros da vida pública e
empresarial galega, aos que cómpre engadir representantes dos nosos
ámbitos académico e investigador. A previsión é xuntar a máis de
douscentos colexiados/as, xunto con outros convidados/as.
Para a
organización do evento, o CPEIG contará coa colaboración de
diversas empresas e institucións da nosa terra centradas no eido das
novas tecnoloxías da información. De feito, “co convencemento de
que o apoio ao Colexio e ás súas actividades representa un pulo á
profesión”, o CPEIG ofrece a posibilidade de participar na
celebración de gala como entidades patrocinadoras ou colaboradores
mediante a formalización dun acordo.
En palabras
da entidade profesional que preside Fernando Suárez, a Noite da
Enxeñaría en Informática de Galicia é xa “unha gala consolidada
mediante a cal o CPEIG visualiza a súa presenza na sociedade galega,
o traballo desenvolvido polos enxeñeiros en Informática dentro da
Sociedade da Información e as iniciativas relacionadas no eido das
novas tecnoloxías”. Segundo engade, en todas as sete convocatorias
previas da Noite acadouse unha gran repercusión en múltiples
vertentes: tanto na afluencia de público, autoridades e
empresariado, como na repercusión nos medios de comunicación
galegos e estatais como, tamén, no afianzamento de potencialmente
frutíferas relacións entre profesionais do noso sector das novas
tecnoloxías da información.
Para máis
información, cómpre visitar a páxina web anoite.gal,
onde se dá conta (entre outras moitas cousas) das diferentes
modalidades establecidas, de imaxes das celebracións de anos
anteriores e, tamén, do programa de actividades para o evento deste
3 de xuño, unha gala que está previsto que comece arredor das 20.00
horas cun cóctel de benvida para logo, arredor dunha hora máis
tarde, abordar o acto de entrega de galardóns propiamente dito. A
cita proseguirá coa cea de gala (posterior os premios), prevista
para arredor das 21.45 horas.
Os
patrocinadores da Noite
De ouro: Altia, AMTEGA, Bahía
Software, Emetel, Epson, Everis, HP-Intel, Indra, Kaspersky, NetApp,
Oracle, Plexus, R, Retegal, Telefónica, Unisys, Vodafone e Xunta de
Galicia.
De prata: Acuntia, Arcade
Consultores Inforhouse, Atos, Avaya, Balidea, Cisco, Deputación de
Pontevera, Ednon, EMC, Fortinet, Grupo PSN, Idom, Informática
de El Corte Inglés, Inycom, Oesía, Samsung, Symantec, Tech Talents
e Tecnocom.
O Colexio
O Colexio
Profesional de Enxeñaría en Informática de Galicia (CPEIG)
constituíuse en decembro de 2007 como corporación de dereito
público de carácter profesional con personalidade xurídica propia
que se rexe pola normativa vixente na materia e polos seus estatutos.
Cunha estrutura interna democrática e independente das
administracións públicas, o colexio agrupa por obriga a todas as
persoas que, tendo o título oficial de Enxeñaría en Informática,
desenvolve actividades propias da profesión en Galicia. Arestora o
CPEIG suma máis de 350 colexiadas e colexiados.