R inicia a migración dos seus móbiles de Vodafone a Orange
venres, 26 de agosto do 2016
O operador de telecomunicación, tras a súa absorción por
parte de Euskaltel, comeza a enfrontar un dos maiores retos da compañía dende a
súa consolidación no territorio galego, xa que principia a mudar de rede móbil,
de xeito que os seus clientes, en vez de operar con Vodafone pasarán a ter
cobertura con Orange, o que podería ter consecuencias a nivel de cobertura en
función das zonas nas que se movan os usuarios, aínda que nalgúns casos suporá
a apertura da rede 4G, a principal carencia do operador, que viña a demandarse
por parte dos seus clientes dende o ano 2013, cando comezaron a ofrecer LTE en
Galicia os operadores con rede móbil propia, e que supuña unha grande
frustración para os usuarios que levaban anos adquirindo terminais compatibles
coa rede 4G que non podían aproveitar.
Dende R xustifican o cambio de operador pola negativa de Vodafone para
permitirlles dar servizo 4G e para poder axustar os prezos das súas tarifas
móbiles, e dan
conta de que a migración á nova rede móbil será gradual, estando previsto mudar
unhas 110.000 liñas por mes, precaución para mitigar as posibles
incidencias.
As novas liñas móbiles xa reciben unha tarxeta SIM adaptada á nova
configuración de rede móbil, pero para o resto de usuarios non teña que superar
atrancos como cambiar a súa tarxeta SIM, a migración farase de xeito remoto, de
xeito que cando pase a funcionar coa rede de Orange recibirá unha mensaxe de texto
coa información sobre o cambio de operador, aínda que xa podemos consultar os
pasos a seguir vía web, onde teñen publicada unha guía para iPhone (dende a que
descargar o perfil de configuración para iOS que simplifica o proceso de
configuración) e outra
para móbiles con Android (na que explican como configurar o APN para poder
gozar de conexión á Internet sen problema). Tamén recomendan activar a
itinerancia de datos no móbil para non ter problemas de conectividade de datos.
4G só nalgunhas tarifas
Como comentamos hai varias semanas, R limita a súa rede 4G ás liñas que teñan contratado como mínimo 3 GB de datos, que son as que dende hai un mes levan o sufixo 4G na súa denominación, podendo activarse o 4G tanto a través da aplicación do operador como da web de clientes. Rematado o proceso de migración aseguran que revisarán as tarifas nas que pode activarse o 4G, o que parece atender ao malestar dos clientes das tarifa máis populares, que verían como tras esperar 3 anos para gozar da nova conectividade quedan fóra por ter só contratados 1,5 ou 2 GB.
Posibles problemas de cobertura
Dende R recoñecen que con este proceso hai un grande temor dos usuarios á perda de cobertura móbil, e aseguran que o feito de que a cobertura de Orange en Galicia é peor que a de Vodafone é un “rumor” (cando na práctica é innegable que Vodafone ten a mellor rede de datos móbiles no territorio galego, superando incluso a Movistar), e aseguran ter realizado probas en máis de 100 concellos galegos e nas principais vías de comunicación de Galicia para verificar que o resultado con ambos operadores é semellante, aínda que recoñecendo que depende do caso, podendo resultar beneficiado na comparación un operador ou o outro, polo que confían en que os problemas de cobertura sexan algo moi puntual e pensan que o feito de que o 4G vaia estar dispoñible en 242 concellos galegos compensará o cambio de compañía, xa que cubriría ao 93% da poboación galega.
Páxina web de información
Para ter centralizada a información sobre a rede móbil de R,
veñen de crear un espazo específico
na súa páxina web no que axudan a resolver incidencias e recollen unha
selección coas preguntas máis frecuentes sobre o tema.
Actualmente R ten máis de 400.000 liñas móbiles, polo que o
cambio de operador podería tardar até fin de ano para completarse. Queda agora
pasar a proba de lume, na que os clientes verán o comportamento da súa liña tras
o cambio de rede móbil, para ver se iso ten unha consecuencia real na calidade
do servizo e na confianza dos clientes no servizo de R, o que podería pasar no
ámbito rural, onde é bastante habitual elixir compañía en función da
disposición das antenas de telefonía móbil que dan cobertura para garantir a
mellor calidade das telecomunicacións.