Red.es organiza un encontro multisede para amosarnos a Internet do futuro
martes, 30 de setembro do 2014
Intuímos como vai ser a
Internet do futuro, pero se cadra precisamos de detalles precisos,
agarradeiras das que termar. Habilitar un escenario de traballo
colectivo sobre este punto, e que ademais sexa unha fonte de datos
concretos dos que tomar nota, é o gran obxectivo de FIWARE:
Conectando as cidades á Internet do futuro, unha
convocatoria que vén da man do Ministerio de Industria (Red.es)
e que se vai desenvolver entre o 15 e o 17 de outubro en Las Palmas
de Gran Canaria, Sevilla e Valencia. Durante estas xornadas amosarase
ás PEME e aos emprendedores o potencial da tecnoloxía FIWARE para
“crear servizos innovadores”. Industria lembra que a Unión
Europea encamiña 80 millóns de euros a este tipo de proxectos.
O proxecto FIWARE,
impulsado e financiado pola Comisión Europea e desenvolvido por
departamentos e axencias TIC de todo o continente, é en palabras dos
seus responsábeis “unha tecnoloxía horizontal con interfaces
abertas e normalizadas, arestora operativa e accesíbel para probas e
que dispón de información facilitada por cidades e outras entidades
(Open Data)”.
Segundo engaden fontes de
Red.es, “nestas xornadas terán especial protagonismo as 11
aceleradoras do programa FIWARE Accelerator que contan con presenza
española na súa organización e que están chamadas a contribuír á
creación dun ecosistema nacional con proxectos sobre temas tan
variados como enerxía, saúde, impresión 3D, agricultura ou Smart
Cities”. Tratase polo tanto dun encontro que se presenta por vez
primeira en formato multisede e que abranguerá actividades
formativas e de emprendemento como a Startup Weekend en Valencia ou
os obradoiros de programación e hackathones FIWARE de Sevilla
e Las Palmas de Gran Canaria.
Respecto de FIWARE, dicir
que é un proxecto que ten a súa raizame no intre en que a Comisión
Europea a boa parte das principais empresas TIC europeas xuntaron
forzas en 2011 para situar a Europa nunha posición de liderado no
ámbito da Internet do Futuro (Future Internet PPP - FI-PPP). FIWARE
constitúe polo tanto a columna vertebral do programa FI-PPP e xorde
co obxectivo “de crear un ecosistema aberto ao redor da tecnoloxía
e os datos, a través do desenvolvemento dunha plataforma estándar
(FIWARE) que ofrece un conxunto de APIs (Interfaces de Programación
de Aplicacións) que facilitan o desenvolvemento de aplicacións, con
especificacións abertas”.