Redegal desenvolveu a tenda en liña da galega Caramelo
venres, 21 de novembro do 2014
Redegal
deu a coñecer este mes os seus traballos web para a empresa galega
Caramelo, a marca posta en marcha na Coruña hai máis de catro
décadas e, arestora e dende hai tempo, un referente da industria
téxtil e do deseño en múltiples mercados (ten presenza en máis de
20 países). Este papel referencial e o estilo propio de Caramelo,
unidos a unha serie de elementos que sitúan á empresa nos chanzos
superiores da evolución dixital (por exemplo un deseño responsive
que atende á crecente cifra de persoas que empregan os seus
dispositivos para buscar información e mercar roupa), foron os
ingredientes básicos usados por Redegal para a renovación da
tenda en liña da firma de moda.
O resultado, sinala
Redegal, é un establecemento en liña “intuitivo e accesíbel”
que conta cuns menús estruturados e con elementos que fan máis
doadas as procuras de calquera produto. Máis en detalle, puxéronse
en xogo recursos que salientan as calidades que os usuarios agardan
atopar e apostouse polo contido visual e pola “correcta
usabilidade” de todo o conxunto. Redegal tamén destaca do produto
final a política de envío e devolución de balde da que fai gala a
tenda en liña, ao tempo que valora moi positivamente a facilidade de
rematarmos a compra sen ter que rexistrarnos antes, un atranco que
“pola nosa experiencia”, engade a empresa galega, “soubemos
eliminar para favorecer a conversión e evitar calquera taxa de
rebote innecesaria neste punto”.