Richard Stallman súmase á campaña que pide á RAE que mude a definición de hacker
martes, 28 de outubro do 2014
En que pensamos cando
pensamos nun hacker? Pois a cousa varía cando quen pensa é
unha persoa que fala en inglés e outra que segue as definicións
dada pola Real Academia Española. Para facernos unha idea, o termo
inglés hacker non ten as unívocas connotacións negativas
que ten o termo usado en español. Para a RAE, un hacker é
ante todo un pirata informático. Nada se di dos activistas do ámbito
dixital nin se aclara nada sobre as diferentes causas que poden mover
a uns e a outros. Co fin de que obter a opinión directa do que se
considera un dos hacker máis coñecidos do mundo, Richard
Stallman, abandeirado e firme defensor do coñecemento e a tecnoloxía
libre, o
Navegante animouno a responder á pregunta de que pensa sobre a dita
definición da RAE.
Ao seu xuízo, a
explicación que dá a Academia non só é limitada e errónea, senón
que tamén é errónea a traxectoria da RAE con respecto a Internet,
xa que teima en “usar programas privativos na súa web”. Isto
sufriuno o propio Stallman na súa propia persoa, xa que a través
dos seus propios medios de navegación informática (estritamente
libres, abertos ao cen por cen) non foi quen de acceder aos contidos
da Academia e moito menos á definición de hacker. O
problema estaba, dixo, en que había ligazóns que contiñan código
privativo.
Cando por fin deu coa
definición, atopou isto: “Trátase dunha persoa con grandes
habilidades no manexo de computadores, que utiliza os seus
coñecementos para acceder ilegalmente a sistemas ou redes alleos”.
Para Stallman, está claro que “to hack” significa en
parte romper seguridade informática, pero tamén significa “empregar
a intelixencia con espírito de xogar e fóra dos eidos habituais das
artes e do humor”. Stallman tamén recordou que se seguimos a
acepción dada pola RAE, estaremos a chamar piratas e ilegais aos
centos de milleiros que participan a diario en todo tipo de
actividades legais e enriquecedoras destinadas a compartir
coñecemento, enténdase os participantes nos eventos chamados
hacklabs en calquera das súas manifestacións.
Como remate, lembrar
que o informático Chema Alonso puxo en marcha os días pasados unha
iniciativa en Change.org para tentar que a Real academia Española
mude a dita definición.