SabadellGallego achegará recuros financeiros ás empresas do Clúster TIC

venres, 4 de marzo do 2016 Redacción

A entidade financeira SabadellGallego (Grupo Banco Sabadell) vén de asinar un convenio de colaboración co Clúster TIC Galicia. O acordo subscribiuse por Antonio Rodríguez del Corral, presidente do Clúster TIC Galicia e por Pablo Junceda Moreno, director xeral de SabadellGallego. A finalidade da alianza entre as dúas entidades é “pór a disposición das empresas e emprendedores membros da plataforma empresarial galega produtos e servizos co obxectivo de facilitarlles o acceso ás novas tecnoloxías, ao financiamento de circulante en calquera das súas modalidades, así como a apoios orzamentarios de novos investimentos en activos fixos mediante préstamos e leasing”.
Nun plano máis concreto, SabadellGallego ofrece aos emprendedores membros do Clúster TIC o programa BStartup para facilitar financiamento e acompañamento ás empresas de nova creación. A iniciativa BStartup, sinalou o director xeral de SabadellGallego, fornece produtos e servizos financeiros que “cobren as necesidades específicas dos emprendedores” e brindan asesoramento financeiro para os emprendedores. Asemade, porá a disposición das empresas do Clúster sesións formativas específicas sobre temas de investimentos e orzamentos que estean dentro do ámbito dos emprendedores.
Como lembraremos, BStartup é unha iniciativa da entidade bancaria a prol dos emprendedores novos e as empresas innovadoras e tecnolóxicas. Ao seu abeiro inclúese BStartup 10, unha liña de traballo posta en marcha para apoiar a 10 start-up dixitais seleccionadas en España (con investimentos de 100.000 euros en cada un dos proxectos, 70.000 en formato cash e os 30.000 restantes en servizos mediante un programa de alto rendemento).

PUBLICIDADE