SmartPEME quere contar cos axentes TIC máis senlleiros da provincia
mércores, 18 de xaneiro do 2017
Este
luns, 16 de xaneiro, a presidenta
da Deputación de Pontevedra, Carmela Silva e o deputado de
Innovación e Promoción Económica, Javier Dios, reuníanse cos
axentes TIC da provincia e de toda Galicia de cara a presentar as
novas iniciativas do proxecto SmartPEME para asociacións
empresariais, amais de amosar as canles de colaboración e
sinerxía que estas poden achegar durante o seu desenvolvemento.
Cómpre lembrar que SmartPEME é o programa da Deputación de
Pontevedra que vai á procura de potenciar o desenvolvemento
económico da provincia a través das Tecnoloxías da Información
(TIC) e que vai paseniño abríndose a novos sectores, chegando até
as persoas autónomas, os concellos e dende agora, tamén, ás
asociacións empresariais e empresas provedoras TIC.
Carmela
Silva sinalou que “traballaremos dun xeito moi transparente e sen
ser parte activa das decisións das empresas sobre quen vai
desenvolver os seus proxectos”, tendéndolles a man ás asociacións
empresariais, “xa que si que imos ser parte desa colaboración coa
que sumaremos sinerxías, co obxectivo de que todas e todos gañemos
e que SmartPEME se converta cada vez máis nun instrumento que oferte
máis posibilidades sen competir nin suplantar as empresas que se
adican a iso, e conseguindo que todas as empresas e persoas
emprendedoras ás que asesoramos conxuntamente consoliden os seus
proxectos para poder favorecer unha cultura emprendedora e crear
prosperidade económica”.
Até
o de agora, SmartPEME xa realizou preto de 4.000 asesoramentos a máis
de 1.900 empresas, persoas emprendedoras e autónomos e autónomas da
provincia de Pontevedra.
Nas
seis oficinas de SmartPEME, instaladas en Cambados, Lalín,
Ponteareas, Pontevedra, O Porriño e Vigo, estanse poñendo en marcha
as seguintes actividades: itinerarios de obradoiros temáticos con
diversos niveis, eventos de networking trimestrais (coa participación
de profesionais), a colaboración con asociacións e promoción de
alianzas institucionais, a especialización sectorial dos asesores e
asesoras (segundo as súas necesidades), kits de asesoramento en
novas tecnoloxías a emprendedores, a identificación e difusión das
necesidades TIC aos provedores de solucións para as pequenas e
medianas empresas e o impulso de novas carteiras de servizos de
asesoramento.