Telefónica crea un club cos máis puxantes talentos dos xogos electrónicos, Movistar Riders
martes, 10 de xaneiro do 2017
Telefónica
vén
de informar dunha serie de medidas para impulsar, a través de
Movistar, a súa vertente de negocio e contidos baseada nos xogos
electrónicos. Con este fin, asinou un acordo estratéxico coa
compañía ESL, referente a nivel mundial neste ámbito dos eSports,
e deu forma a unha plataforma de contidos exclusivos para a contorna
dixital e para Movistar+. Ademais, creou un club profesional de
deportes dixitais, Movistar Riders, que terá sede de seu e que
servirá de lanzadeira e acubillo para “os novos talentos e
promesas”, contándose para isto con apoio técnico e adestramento
especializado (ao xeito dos grandes clubs). A aposta da operadora por
este eido do lecer dixital non é nova. De feito, leva anos
colaborando nos grandes eventos de eSports, impulsando parties
e fornecendo de fibra avanzada as máis reputadas probas.
Polo
que atinxe á alianza entre Telefónica e ESL, ten o obxectivo de
“reforzar o impulso actual dos xogos electrónicos no territorio
estatal”. Ambas as entidades sumarán as súas capacidades co fin
de fortalecer as probas amateur e de profesionais en España,
amais de “atraer o mellor talento e desenvolver actividades e
programas para todos os niveis de competición”.
Polo
que atinxe ao segundo dos alicerces desta nova estratexia de
Movistar, a plataforma de contidos, sinalar que estes terán difusión
en todas as canles (medios dixitais, redes sociais e televisión) e
serán integrados na oferta actual de deportes de Movistar+,
“fornecendo aos seareiros un escaparate incomparábel para gozar e
sentir a emoción desta disciplina dunha forma inédita en España”.
Desta maneira, Movistar eSports (no dial 29, dentro das plataformas
de IPTV e DTS) achegaranos ás grandes citas deste deporte (ESL ONE,
ESL INTEL EXTREME ou ESL MASTERS SERIES) e a cada un dos 13 torneos
previstos para este ano que comeza. Por outra banda, en Movistar
Deportes 1 (Dial 55) e Movistar Deportes 2 (Dial 56) os fans poderán
gozar de franxas específicas de contido eSports.
A
maiores, desde Movistar crearase unha plataforma dixital que garanta
que os seareiros dispoñan en todo momento “dun lugar na Rede onde
poder consultar as últimas novidades ou a programación; gozar do
contido audiovisual; adquirir os seus xogos favoritos; participar en
concursos, ou gozar de vantaxes, descontos, etc”.
Ao
mesmo tempo, Movistar creou Movistar Riders, un club deportes
electrónicos formado por varios equipos profesionais de videoxogos,
onde os novos talentos poderán desenvolver a súa carreira
deportiva, “con todo o apoio técnico e a preparación física
requirida”. O club terá unha sede física, Movistar Gaming Center,
un centro de alto rendemento que ademais de ser o lugar de
adestramento dos equipos Movistar Riders, será o punto de encontro
de profesionais, xogadores e fans. Movistar Riders, que terá a
estrutura propia dun club deportivo profesional, arrinca con cinco
equipos, que vestirán o equipamento oficial do club, nos seguintes
xogos: Overwatch, Hearthstone, Counter Strike: Global Offensive,
Call Of Duty e League Of Legends.