Telefónica distribuirá en Europa un reloxo que mantén en contacto a pais e fillos durante todo o día
mércores, 4 de marzo do 2015
Telefónica anunciou
dende o Mobile World Congress que se celebra estes días en Barcelona
a
comercialización en Europa e América Latina dun trebello-reloxo
para favorecer seguridade nas familias. Máis polo miúdo,
trátase do dispositivo intelixente
FiLIP, un enxeño que conecta a pais e fillos e que lles permite
estar en contacto durante todo o día e chamarse decontado en caso de
emerxencia. A tecnoloxía en cuestión (tipo wereable), que
vén da man da compañía Filip Technologies, inclúe teléfono e
localizador. Segundo conta Telefónica, o dispositivo xa tivo un gran
éxito en Estados Unidos.
Deseñado para nenos de
idades comprendidas entre os 4 e os 11 anos, FiLIP combina as
tecnoloxías GPS, Wi-Fi e GSM. As características de FiLIP inclúen,
entre outras, localización, chamadas de voz ou o envío de mensaxes
directamente aos nenos. Segundo informa a operadora, “o adulto
mantén o control en todo momento grazas a unha aplicación instalada
no seu teléfono intelixente e elixe cinco contactos de confianza cos
que os fillos poden comunicarse”. FiLIP permite tamén que os pais
establezan "zonas seguras" de tal xeito que reciben unha
alerta se o cativo en cuestión entra ou sae das áreas delimitadas.
FiLIP incorpora tamén un botón de emerxencia que ao ser premido
polo neno activa un procedemento intelixente de emerxencia que
permite localizalo e chamar sucesivamente a todos os contactos de
emerxencia, previamente seleccionados pola nai ou pai, até que algún
conteste.