Telefónica impulsará a súa rede de radio con Nokia Networks

martes, 29 de xullo do 2014 Redacción

O operador Telefónica, ao abeiro do proceso de ampliación e mellora das súas redes (incluído un desenvolvemento aínda maior do seu servizo 4G), elixiu finalmente a compañía Nokia Networks como subministradora clave para os equipos de acceso radio e servizos profesionais en Andalucía, Galicia, Castela León e Levante por un período de tres anos. Así o fixeron saber as dúas empresas os días pasados, salientando a necesidade de dar reposta, conxuntamente, ás demandas de capacidade dos usuarios, cada vez maiores por mor do tráfico crecente de contidos multimedia.
Ao abeiro deste acordo de tres anos, Nokia Networks modernizará a rede móbil de Telefónica e implantará 4G empregando a súa solución avanzada de acceso radio (Single RAN Advanced). A compañía tamén fornecerá a súa Plataforma Multicontroller para o controlador de rede de radio de 3G (RNC - Radio Network Controller), e aumentará a eficiencia e capacidade de autorrecuperación das redes radio. As redes de Telefónica serán controladas, xestionadas e optimizadas a través do sistema de xestión NetAct de Nokia.

PUBLICIDADE