Televés achegará tecnoloxía de seu para optimizar a calidade da TDT ante o espallamento da 4G en Reino Unido
mércores, 17 de abril do 2013
A filial británica de
Televés, Televes
Corporation UK, é unha das compañías elixidas para fornecer
filtros RF de alta calidade á marca local AT800 co obxectivo de
mitigar potenciais interferencias das emisións da cuarta xeración
de telefonía móbil (4G) na televisión dixital terrestre (TDT).
Lembrar que AT800 é propiedade de Digital Mobile Services Limited
(DMSL), a organización responsábel de asegurar que os espectadores
británicos sigan a recibir o sinal da TDT en perfectas condicións
unha vez que os servizos móbiles 4G sexan lanzados leste mesmo ano,
empregando para iso a banda dos 800 MHz.
Ofcom, o regulador
independente e autoridade da competencia da industria británica das
comunicacións, estimou que como máximo o 10% dos fogares británicos
necesitará complementar o seu equipo de recepción para asegurarse a
calidade do sinal de televisión cando os servizos 4G estean
operativos. Estes fogares, informa Televés, recibirán un filtro
AT800 de balde, para incorporalo ao seu equipo receptor antes de que
poidan producirse problemas de interferencias. A firma Televés,
gañadora do concurso de achega de filtros, encargarase como dixemos
de dispor os filtros RF de alta calidade. Para obter esta
oportunidade, a firma compostelá informa que “fixo valer a
calidade do seu produto, especificamente deseñado para o fin que se
persegue, e a súa capacidade de fabricación, xa que debe atenderse
unha alta demanda nun breve período de tempo”. E prosegue
Guillermo Fernández, director xerente de Televés UK: “Para a
nosa filial, a adxudicación do contrato de DMSL supón un fito moi
importante, xa que nos introduce e sitúa no negocio dos operadores
de telefonía móbil de cuarta xeración e identifícanos como
axentes relevantes tanto na evolución da TDT como na transición a
4G no Reino Unido”.