The Independent convértese no primeiro gran diario británico en abandonar o papel
venres, 12 de febreiro do 2016
O sector da prensa no Reino Unido está a tremer tras o
anuncio de The
Independent de deixar de publicar en marzo a súa edición en papel para
centrarse na súa versión dixital, sendo o primeiro grande xornal nacional en
dar este paso. Asegura que son o xornal de
calidade co crecemento máis rápido na web no Reino Unido (un 33% nos
últimos 12 meses, chegando aos 70 millóns de usuarios únicos globais), e
esperan que manter o medio exclusivamente no eido dixital permita garantir a
súa sustentabilidade e rendibilidade (confían en incrementar os seus ingresos
un 50% durante o presente ano).
O propietario do xornal, Evgeny Lebedev, asegura que “a industria da prensa
está a mudar, e o cambio está conducido polos lectores. Eles amósannos que o
futuro é dixital. Esta decisión preserva a marca The Independent e permítenos
continuar a investir en contidos editorial de alta calidade que atrae cada ves
a máis lectores ás nosas plataformas en liña”.
Dentro destas medidas tamén anuncia que a páxina web i100.co.uk, destinada a
atraer a un público mozo, mudará a indy100.com como un medio independente e
innovador con miras a un xornalismo global. Aínda que non deron detalles sobre
como afectará aos preto
de 150 traballadores a tempo completo da compañía esta reestruturación,
témese que haxa unha forte redución do cadro de persoal da histórica cabeceira
de prensa.