Todo listo para o comezo da gran cita galega dos argalleiros tecnolóxicos: Maker Faire Galicia
xoves, 29 de setembro do 2016
- Participantes na primeira edición do evento celebrada, tamén, en Compostela
Esta fin de semana que vai do 1 ao 2 de outubro os
composteláns teñen unha cita coa filosofía do no limits
aplicada ao desenvolvemento de aparellos, servizos, solucións de
transporte alternativo ou aplicacións. Ou sexa, un encontro con ese
xeito tan saudábel de entender o mundo que consiste en non poñernos
atrancos para facer calquera cousa que se nos antolle. Esa é a base
do espírito Maker (o movemento internacional das/os
creadoras/es tecnolóxicos que reivindican a capacidade de todos e
cada un de nós para facer tecnoloxía e contribuír a facer un mundo
mellor a través dela) e esa é tamén a base do evento Maker
Faire Galicia ques e celebra esta finde no Pazo de
Congresos compostelá.
Lembrar que a primeira edición da Maker Faire
Galicia celebrouse en outubro de 2015, no centro comercial Área
Central de Santiago, contando coa colaboración do Departamento de
Promoción Económica do Concello. Esta primeira convocatoria foi
quen de xuntar 138 makers. Ademais, asistiron como público
arredor de 18.000 persoas.
Agora, para a segunda entrega do evento, consolídase
a arela de convertelo nun evento anual, referente, que “sirva de
punto de encontro para a comunidade creadora, potenciando unha
Galicia innovadora e colaborativa”, segundo palabras do Concello de
Compostela, que sinalou hai uns días que a fórmula de Maker
Faire Galicia consiste “en reunir nun
mesmo espazo e tempo a persoas que fan cousas incríbeis e están
dispostas a partillalas co público”.
O programa da feira será do máis variado, tocando
diferentes paus que teñen un marcado aquel de complementariedade.
Serán, de feito, dous días de actividades e presentacións de
proxectos sobre robótica, impresión 3D, gastronomía,
electrónica, artesanía, música e arte urbana, entre outras moitas
cousas. Ademais haberá espazo para obradoiros, mesas redondas,
presentación de proxectos, espectáculos e actividades para todos os
públicos. A intención é ir alén das/os 150 makers
participando no evento.
O movemento Maker
Trátase dunha corrente de creación e de activismo
tecnolóxico que xunta, baixo un mesmo teito, un crecente número de
persoas de distintos perfís que acreditan ao máximo na filosofía
de traballar en mancomún cun mesmo obxectivo. Este obxectivo adoita
ser construír tecnoloxías únicas e innovadoras que soen ter un
marcado compoñente social ou solidario, ou de utilidade para o común
da xente, ou para colectivos en risco. A cultura Maker e a
súa filosofía de compartir coñecemento está a impulsar a posta en
marcha de novos espazos de encontro e traballo (Hackerspaces,
Fablabs, Makerspaces, Techshops) nos que
se fabrican as últimas vangardas tecnolóxicas e que favorecen a
transferencia de coñecemento.
En definitiva, o termo Maker está ligado
ao desexo de facer cousas coas nosas propias mans, o concepto chamado
“faino ti mesmo” (coñecido polas siglas “DIY”, do
inglés “Do It Yoursel”). O termo vén da man de Dale
Dougherty de O’Reilly Media.
Estas novas metodoloxías tamén aceleran a posta en
marcha de novos e prometedores perfís profesionais (tecnólogo
creativo, deseñador de interacción, emprendedor dunha startup
de hardware, fabricante ou distribuidor de impresoras 3D, experto
educativo, piloto de drons e moitos máis), de novas ferramentas
educativas que funcionan con todos os públicos (e que son accesíbeis
a todas e todos a través de Internet) e, tamén, de novos tipos de
festivais-feiras que potencian o uso das tecnoloxías creativas. É o
caso, precisamente, da Market Faire Galicia.