Un fallo de seguridade crítico leva a recomendar a desactivación do Flash Player nos nosos ordenadores
venres, 16 de outubro do 2015
Nos últimos meses non foron poucas as alertas de seguridade
que afectaron ao Flash Player de Adobe, un engadido para os nosos navegadores
web que tradicionalmente servía para que puidésemos ver vídeos, publicidade,
xogos e moitos outros elementos activos na web, pero que paulatinamente foi
pasando a un segundo plano grazas ao elevado nivel de adopción do HTML5, polo
que, en vista da terrible seguridade do Flash, debería ser definitiva, de xeito
que o único consello que podemos dar actualmente aos usuarios que queiran
manter o seu ordenador a salvo é que directamente desinstalen Flash dos seus
equipos.
Lembremos que xa en
xullo Firefox bloqueou o Flash no navegador web ante un grave fallo de
seguridade sen corrixir, e Chrome tamén tomou medidas para impedir a
reprodución automática de contidos en Flash, de aí que a
última ameaza de seguridade rexistrada chegue no peor momento posible, xa
que o público comeza a estar sensibilizado en materia de seguridade e entende
que o Flash xa non é imprescindible
(como comproban diariamente nos dispositivos móbiles onde Flash non está
dispoñible).
A nova vulnerabilidade do Flash Player, que responde ao identificador
APSA15-05, permite que en versións do reprodutor de Flash até a 19.0.0.207 (a
actual) tanto para Windows, OS X e Linux, sexa posible non só bloquear o equipo
do usuario a través de certos ataques, senón tamén chegar a tomar control dos
sistemas afectados. Pero o máis grave do asunto é que xa se están a detectar
ataques aproveitando tal vulnerabilidade (como
mínimo por parte dun grupo de espionaxe electrónico que está a atacar a
gobernos, a OTAN e a medios de comunicación) e non se prevé que Adobe lance
unha actualización até a semana que vén (aínda que suxiren que hoxe mesmo
poderían chegar a corrixir o problema).
Dende Malwarebytes aseguran
que “2015 foi un ano malísimo para o Flash Player e dado que non estará dispoñible
un parche até dentro de varios días é crucial tomar accións inmediatas para
protexernos” xa que os vindeiros días son unha magnífica oportunidade para
creadores de malware para infectar
millóns de ordenadores a nivel mundial, de aí que afirmen que “agora é o
momento de que consideres seriamente desactivar ou eliminar o Flash Player do
teu navegador web”.
ACTUALIZACIÓN: Finalmente hoxe actualizaron o reprodutor de Flash corrixindo o seu grave fallo de seguridade.