Un libro dixital de Emilia Pardo Bazán editado pola USC acada 1.200 descargas en 10 días
mércores, 16 de abril do 2014
A Universidade de
Santiago achéganos estes días un exemplo do importante papel que
están a xogar xa as publicacións dixitais, papel que todo indica a
que será cada vez maior (sobre todo coa chegada ao ámbito académico
de xeracións perfectamente adaptadas a consumir achegas literarias
en formatos electrónicos). O exemplo en cuestión constitúeo o
éxito acadado polo libro dixital de Emilia Pardo Bazán Apuntes
de un viaje. De España a Ginebra (1873) editado pola USC e a
Real Academia Galega e de acceso libre e gratuíto. Segundo informan,
acadou
en dez días preto de 1.200 descargas a través do repositorio
institucional da USC Minerva.
O libro en cuestión é
unha reprodución facsímil con estudo, edición e notas do profesor
José Manuel González Herrán, coas percepcións da autora durante
unha viaxe por toda Europa coa súa familia.
A obra acadou dende o
pasado día 4 de abril, intre no que se emprazou no repositorio da
USC, un total de 1.218 visualizacións e 1.115 descargas. Delas, 712
foron realizadas dende España, 166 dende os Estados Unidos de
América, e tamén hai consultas dende México, Francia, Italia,
Alemaña, Arxentina, Canadá e Suíza. Entre as cidades con máis
consultas destaca Madrid, con 89 visitas, A Coruña con 79 e en
terceiro lugar Woodbridge en Virginia, con 42. Tamén se rexistraron
consultas en Barcelona, Sevilla, Santiago de Compostela, Terrassa, ou
San Francisco, entre outras cidades.
O libro está editado cunha
licenza Creative Commons. Segundo engade a USC, “é a primeira
coedición dixital nativa de acceso libre e gratuíto polo que
calquera persoa interesada pode consultar ou descargar o libro a
través do repositorio institucional da USC Minerva”. Como
lembraremos, Minerva é recurso tecnolóxico da institución docente
para acubillar e divulgar os documentos dixitais resultantes das
actividades de investigación e docencia da Universidade ao tempo que
fomenta a comunicación científica polo seu acceso aberto.