Unha charla no CiTIUS afondará no desenvolvemento de aplicacións web mediante Polymer
luns, 20 de abril do 2015
Durante a celebración do Google I/O do ano pasado deuse a
coñecer o framework
de desenvolvemento baseado en compoñentes web Polymer, que ofrece
un xeito moi sinxelo de desenvolver aplicacións baseadas na adaptabilidade, a
sinxeleza e cun enfoque visual moi coidado, facilitando a implementación do
Material Design que quere impor Google dende Android 5.0, e para afondar nas
posibilidades desta plataforma un dos coordinadores de Polymer Spain, o galego
Ismael Faro, vai
impartir un relatorio o xoves 30 de abril ás 12:45 horas no salón de actos
do Centro de Investigación de TecnoloxÃa
Informática (CiTIUS).
Esta actividade pretende amosar Polymer e as súas posibilidades para un
desenvolvemento de coidadas aplicacións web dun xeito moi sinxelo, o que
resulta especialmente interesante no contorno actual, no que os
desenvolvementos teñen que orientarse a equipos de escritorio, terminais
móbiles e outras interfaces, polo que adoptar solucións estándar deste tipo
supón unha maior compatibilidade con distintas plataformas e tamén unha maior
calidade das aplicacións creadas (que o teñen máis doado para seguir as liñas
de deseño marcadas como estándar a seguir).
O relator da xornada, Ismael
Faro, non só comanda o grupo de estudo de Polymer en Vigo e toma parte
activa na coordinación de Polymer Spain, senón que tamén é Google Developer
Expert, de xeito que afondar nas posibilidade de Polymer da súa man é unha
garantÃa.