Vilagarcía acolle o 25 un seminario sobre como deseñar aplicacións web con HTML5
venres, 5 de febreiro do 2016
O Centro
de Matosinhos (Vilagarcía de Arousa) vai acoller o vindeiro día 25
de febreiro o seminario Desenvolvemento de Webapps con HTML5.
A actividade formativa vén da man da Área de Emprego da Concellería
de Promoción Económica do Concello arousán, en colaboración co
Centro de Novas Tecnoloxías de Galicia. Desenvolverase en horario de
9.30 a 13.30 horas. Trátase, sinalan os organizadores, dunha
actividade formativa de balde que xa ten aberto o prazo para
inscribírmonos. Levarase a cabo no dito espazo formativo da Avenida
Matosinhos e poderase asistir a el, a través de video-conferencia,
dende as instalacións do CNTG en Santiago.
O obxectivo do seminario é trasladar aos/ás
participantes as posibilidades de HTML5 no desenvolvemento de WebApps
“cun enfoque orientado cara a interfaces multidispositivos, ás
novas aplicacións de xeolocalización, appCache, posibilidades
gráficas, utilidades que existen para xogos interactivos, etc”.
Tamén se verá como aproveitar estas funcionalidades para converter
as nosas ferramentas en liña en aplicacións de escritorio grazas a
JavaFx ou en aplicacións para dispositivos intelixentes con
Cordova.
O relator da xornada será Antonio Varela, enxeñeiro
informático. Segundo nos lembran dende o Concello, Antonio xa conta
cunha experiencia laboral de máis de 7 anos, tempo no que tivo
oportunidade de afrontar proxectos de xestión hospitalaria,
proxectos de comercio electrónico e de xestión para grandes
multinacionais. Tamén tivo ocasión de desenvolver interactivos en
HTML5. Formador Java para Oracle University, impartiu cursos e
obradoiros en HTML5. As persoas interesadas en participar no
seminario poderán recibir información sobre a inscrición
persoalmente no Centro de Formación Matosinhos ou telefonicamente a
través do teléfono 986 51 16 21.