Vilagarcía reestrea o servizo Vaibike! con aplicación móbil engadida
martes, 26 de xullo do 2016
O Concello de Vilagarcía achegou este verán unha
boa nova para os seareiros das bicis: a
recuperación do servizo de empréstamo de bicicletas de man que
ficou detido co anterior equipo consistorial. A adxudicataria do
servizo municipal (Vaibike!) é unha empresa de Alacante chamada
LaBici, que xa fornece xestión
e mantemento a iniciativas semellantes en Ponferrada, Murcia, Gandía
ou Benidorm. A nova da reestrea de Vaibike (que xa está operativo)
tivo tamén unha vertente tecnolóxica que agora, nesta recta final
de xullo, puidemos coñecer en todos os seus detalles. Falamos
do lanzamento para veciños e visitantes dunha aplicación que lles
permitirá estar ao corrente en
tempo real da dispoñibilidade de bicicletas nas estacións do
municipio, amais
de comunicar incidencias e mesmo darse de alta. A
aplicación pódese descargar de xeito gratuíto no teléfono móbil
a través de Google Play para sistemas Android.
Segundo informa o Concello, trátase dunha
ferramenta de moita utilidade para o usuario que dende o seu propio
teléfono pode saber cal é estación do Vaibike máis próxima ao
seu emprazamento (sempre que se teña actividada a función GPS do
teléfono) e coñecer cantas bicicletas hai dispoñíbeis en cada
unha das estacións a tempo real. “Isto”, explica o Goberno
local, “facilita ao usuario achegarse á estación máis a man para
retirar ou devolver unha bici e tamén evita que situacións como que
a persoa se achegue a unha estación e nese momento non haxa
bicicletas en empréstamo”. A aplicación tamén posibilitará
(dentro duns días) altas no servizo.
Máis detalles sobre un proxecto que se relanza
Segundo informou o Concello no seu día, con motivo
da recuperación de VaiBike, este servizo retómase cunha serie de
novidades importantes con respecto á primeira andaina do mesmo. Por
exemplo: non hai unha oficina física e única para accedermos aos
empréstamos de bicicletas, “senón que as altas e baixas
xestionaranse directamente en calquera das cinco estacións previstas
inicialmente”. Polo tanto, con só achegar unha serie de datos de
identificación e empregando un cartón de crédito, “poderemos
obter decontado a nosa tarxeta”, informou o Goberno local, que
engadiu que esta tarxeta pode ser de día, de semana, de mes ou de
ano, converténdose nun “servizo universal non restrinxido á
veciñanza senón tamén aberto a calquera persoa que visite o
concello”. Este carácter de “universal” adquire aínda
meirande dimensión se temos en conta que a tarxeta nos deixa vía
para ser empregada en calquera das localidades onde LaBici fornece
servizo.
O Concello tamén informou que cada estación de
empréstamo conta con equipamento de balde para o inflado de rodas ou
para a recarga de bicicletas eléctricas.