Voluntariado Dixital recunca colaborando na Market Faire Galicia
xoves, 25 de agosto do 2016
A comezos de outubro temos en
Compostela unha cita coa filosofía do “faino ti mesmo” aplicada
á innovación tecnolóxica. Falamos da Maker
Faire Galicia, un encontro para visualizar os últimos
avances da robótica, a intelixencia artificial, o software e a
tecnoloxía en xeral, e tamén para construílos e participar de cheo
neles. A cita celébrase os días 1 e 2 no Pazo de Congresos de
Santiago e está concibida para dar acubillo a grandes e pequenos. O
obxectivo: potenciar unha Galicia innovadora e colaborativa. Entre
os colaboradores do evento está (por segundo ano consecutivo) o
Programa Voluntariado Dixital da Xunta de Galicia. Este apoio
materialízase sobre todo no fomento da participación das persoas
voluntarias na preparación e desenvolvemento da Maker Faire Galicia.
Segundo informan os responsábeis do
dito Programa, “as persoas con curiosidade, creatividade e gañas
de axudar, poderán apoiar este evento dende días soltos en fins de
semana de setembro para a preparación de material ou elaboración de
paneis e elementos decorativos ata o apoio na montaxe e desmontaxe da
cita, na información a visitantes ou no desenvolvemento das propias
actividades da Maker Faire”.
Para as/os interesadas/os en colaborar
como voluntarias/os, dicirlles que xa hai un formulario de rexístro
en Voluntariado Dixital, sendo posíbel apoiar o
evento formalizando
previamente a inscrición en liña.
Lembrar que o Programa de Voluntariado
Dixital é unha iniciativa posta en marcha pola Axencia para a
Modernización Tecnolóxica de Galicia (AMTEGA) e a Dirección Xeral
de Xuventude, Participación e Voluntariado, e que conta xa (a día
de hoxe) con 700 aliad@s dixitais. Ten como obxectivo achegar as
novas tecnoloxías a unha maior porcentaxe da poboación, favorecendo
a inclusión dixital de toda a cidadanía, especialmente entre os
colectivos máis desfavorecidos (persoas maiores, persoas con
discapacidade, etc).