Xa podemos pedir á Xunta o recibo de notificacións en formato electrónico
luns, 9 de xaneiro do 2017
Este 2017 que vén de
comezar a cidadanía galega xa está en disposición de pedir á
Administración autonómica notificacións en formato electrónico. E
poderá facelo a través do sistema Notific@, un servizo que
permite o envío de comunicacións con acuse de recibo e selo
electrónico da Xunta, coas características de seren “fidedignas”
e de poder a Xunta confirmar o acceso e mailo rexeitamento da
notificación. Segundo vén de informar o Goberno galego, este tipo
de solicitudes dixitais está activado xa en 290 procedementos e
estenderase a máis ámbitos e tramitacións ao longo do ano
entrante.
A Xunta tamén engade,
volvendo ao sistema Notific@, que aquelas persoas que non teñen a
obriga de relacionárense en liña coa Administración (teñen esta
obriga persoas xurídicas, entidades sen personalidade xurídica,
profesionais con colexiación obrigatoria e empregados públicos),
poden seleccionar o medio de notificación preferente, ben a través
de Notifica.gal
por ou vía postal. “Con independencia da opción elixida a
Administración creará sempre de oficio un enderezo habilitado en
Notific@ para que poida optar por esta vía cando o desexe”,
explica a Xunta, engadindo que Notifica.gal funciona como “un
enderezo electrónico”. Desta maneira, explica a Administración, o
usuario só ten que darse de alta (a través do formulario de
iniciación do procedemento administrativo correspondente ou polo
propio sistema notifica.xunta.gal).
“Logo disto”, infórmase, “o receptor da comunicación ten en
Notifica.gal unha caixa de correo electrónica ligada ao seu NIF ou
certificado electrónico e alí poderá consultar a comunicacións
recibidas”. Previamente, iso si, recibirá un aviso de que ten unha
misiva pendente no móbil ou correo electrónico que indicara durante
a alta. Asemade, pode autorizar a calquera outra persoa a acceder ao
contido das súas notificacións a través da opción Administrar
Autorizacións dentro de As Miñas Opcións.
Como dixemos, a
Administración autonómica sinalou que ten activados a día de hoxe
290 procedementos habilitados co devandito sistema, sendo o programa
ir abranguendo ao longo de ano os restantes procesos incluídos na
Guía de Procedementos e Servizos da Xunta que requiren de
notificación. Ademais, rexistráronse máis de 26.000 comunicacións
electrónicas de 20 procedementos ao longo de 2016. Ademais, explica
a Xunta, “estase a traballar na catalogación, codificación e
habilitación da notificación daqueles procedementos a instancia de
parte ou de oficio que actualmente non están incorporados na guía”.
Lembrar que o Consello
da Xunta do pasado 22 de decembro aprobou establecer o Sistema de
Notificación Electrónica de Galicia, Notifica.gal, como “a canle
única para o envío das notificacións electrónicas a cidadanía
por parte de todo o sector público autonómico.