Yoigo anuncia que a incluirá a nosa lingua nas facturas aos clientes
martes, 9 de febreiro do 2016
Malia que aínda fica
moita materia pendente no ámbito do respecto ás linguais
co-oficiais do Estado, sempre é de agradecer o compromiso co galego
de empresas referenciais. Un dos máis recentes movementos de ficha a
prol do noso idioma veu da man da operadora Yoigo, que logo de
reiterados convites feitos pola Mesa
pola Normalización Lingüística a prol de apostar polo galego
nas súas comunicacións, semella
estar en disposición de achegar un compromiso firme para incluír a
nosa lingua nas facturas emitidas aos clientes xunto co catalán, o
éuscaro, o castelán e o inglés. A nova foi dada a coñecer nas
redes sociais de mans da propia compañía de telecomunicacións.
Como dixemos a medida
tivo a súa orixe nas peticións da Mesa e nas queixas dos usuarios
recollidas pola plataforma. Segundo fan saber dende a asociación,
esta fíxolle saber á operadora que “a exclusión do galego e da
posibilidade de utilizaren as persoas usuarias a lingua vulnera os
dereitos lingüísticos de centos de usuarios e usuarias dos seus
servizos na Galiza”. Máis polo miúdo, a Mesa fixo referencia aos
parágrafos terceiro e cuarto do art. 10 da Carta Europea das Linguas
Minoritarias, que serven en boa medida de garantes dos dereitos
lingüísticos das galegas e galegos perante “as empresas
prestadoras de servizos, como as telefónicas”.