Mañá venres, ás 12:00 horas, o Centro Multimedia de Galicia, en Santiago de Compostela, vai dar acollida á presentación dunha das publicacións máis agardadas pola comunidade internauta galega nos últimos anos, a Guía das webs de Galicia, unha publicación que recolle completa información sobre 4.800 páxinas web galegas para estar ao día no referente ás novas tecnoloxías e Internet na nosa Comunidade.
Esta Guía, editada por Interdix Galicia a toda cor, recolle no noso idioma completa información sobre tódolos sitios en liña galegos, coa dirección de cada un deles e con datos de interese para os usuarios.

Baixo o lema Tres pantallas e unha nube. Un mundo por crear, Microsoft reune en Santiago de Compostela durante os días 10 e 11 de marzo a 40 Caixas de Aforros na novena edición do Fórum Microsoft de Caixas de Aforros. Este encontro, ten como obxectivo principal achegar a tecnoloxía de Microsoft máis idónea para que as Caixas Aforros sexan máis eficientes e competitivas.
Agora máis que nunca, a implantación de tecnoloxía innovadora é o aliado ideal para as Caixas de Aforros, en prol de mellorar a súa produtividade e eficiencia. As Tecnoloxías da Información e, en concreto, o software son imprescindibles nestes momentos como facilitadoras da innovación necesaria para mellorar significativamente a produtividade nos procesos comerciais e na xestión interna das Caixas de Aforros.

A tecnoloxía PLC resulta moi atinada para conectar equipos informáticos en rede sen precisar da instalación dunha nova rede de cable e sen ter que lidiar coas limitacións do Wi-Fi, de aí que brite-View presente o LinkE, un novo kit baseado na tecnoloxía PLC que está pensado especialmente para a transmisións de vídeos en alta definición dentro do noso fogar, pois permite establecer conexións de ata 200 Mbps, o que tamén pode aproveitarse para conectarse á Internet.
Esta nova solución venderase inicialmente a un prezo promocional de 89,99 dólares (65,90 euros).