Código Cero - Diario Tecnolóxico de Galicia

IBM convoca un concurso de ideas para desenvolvedores de software

Raquel Noya — 2010-09-02T16:17:00Z

A compañía internacional IBM, a fin de fomentar a creación de software de utilidade para as distintas necesidades que atopamos os usuarios das novas tecnoloxías no noso día a día, vén de convocar un concurso para que emprendedores, universitarios e desenvolvedores de software expoñan as ideas máis innovadoras e os principais retos que deben abordar as empresas nun entorno tan complexo como o actual.
IBMAGINA que así se fai chamar o concurso, concíbese como unha plataforma para fomentar o intercambio de ideas e compartir coñecementos, así como unha oportunidade para darlle pulo ó progreso social e empresarial, o valor da creatividade e a innovación.
Din dende a entidade que “o software xoga un papel importante nos nosos días porque está a transformar a nosa forma de vida” e neste senso, o concurso é unha oportunidade única para desenvolver todo tipo de iniciativas que melloren e fagan máis doada a nosa actividade diaria.
O concurso, en definitiva, consiste en expoñer todo tipo de iniciativas para mellorar os procesos e aplicacións que se dan no día a día de calquera organización, como a conectividade e a colaboración empresarial, os servizos de atención ao cliente, a optimización de recursos ou a protección da información.
En poucas palabras, ten como principal obxectivo plantexar os problemas e as solucións que contribúan á creación dun planeta máis intelixente.
As ideas e retos que se propoñan na web do concurso, que se poderán expoñer ata o 30 de setembro, deberán aliñarse con cada unha das áreas estratéxicas máis importantes que teñen plantexadas hoxe en día as organizacións, e que van dende “coñecer e actuar” ata “protexer”, pasando por “adaptarse” ou “innovar”.
As mellores ideas en cada unha das seis categorías mencionadas obterán como premio coñecer as diferentes solucións de software de IBM que están a aplicar as empresas para enfrontarse con éxito a un ámbito competitivo. Os premios consistirán en cursos prácticos de varios días de duración valorados en máis de 2.000 euros, sobre administración de Bases de Datos DB2, desenvolvemento de aplicacións con WebSphere Message Broker, desenvolvemento de regras de negocio con IBM WebSphere ILOG JRules, administración de IBM Lotus Domino 8.5 ou IBM Tivoli Storage Manager, entre outros.
Poderá participar no concurso calquera persoa maior de idade, residente en España, que se rexistre previamente no mesmo.
As ideas gañadoras dos principais premiso serán seleccionadas por un xurado formado por cinco profesionais de IBM, entre as máis votadas polos internautas. A entrega de premios terá lugar durante a sesión plenaria do Congreso de Software IBM 2010.

VANQUISH estrea demo para Xbox 360 e PS3

Marcus Fernández — 2010-09-02T15:28:00Z

Nos últimos meses temos falado bastante da nova obra de Shinji Mikami, VANQUISH, e agora que estamos moi preto do seu lanzamento (o vindeiro 22 de outubro) chega ao Bazar de Xbox LIVE e á PlayStation Network unha versión de demostración deste xogo de Platinum Games que baixo o título de Ataque Veloz permite probar algúns elementos deste completo título de acción en terceira persoa coma os disparos e a cobertura para rematar cos inimigos que van aparecendo (aos que haberá que derrotar corpo a corpo de achegarse moito) e incluso o enfrontamento co enorme robot Argus, coma podemos ver no seguinte vídeo:

Coma podemos ver, VANQUISH conta cun sistema de recuperación de saúde que dá certa vantaxe cando o xogador está próximo á morte, activando unha especie de tempo bala no que será máis doado disparar aos inimigos e saír dunha situación comprometida, aínda que non impedirá que algún robot xigante poida esmagarnos se non reaccionamos debidamente aos quick time events asociados ao mesmo.
Sobra dicir que polo momento as críticas dos xogo son moi positivas, aínda que agora os usuarios poden decidir por si mesmos descargando esta nova demo de balde.


Os disparos e as coberturas xogan un papel importante no xogo


Cando os inimigos están moi preto hai que acabar con eles mediante o combate corpo a corpo

Os servizos de atención de telefonía móbil, materia pendente das operadoras

Fernando Sarasqueta — 2010-09-02T14:16:00Z

Poder queixarse e obter unha resposta axeitada por iso semella ser un dereito fundamental a tódolos niveis agás no eido das redes e da telefonía móbil. Sobre este último punto, a Organización de Consumidores e Usuarios é especialmente clara no seu máis recente informe sobre a cuestión xeral da queixa: unha boa parte das reclamacións que se contabilizaron ao longo dos últimos meses en España ten como orixe a ausencia duns servizos de atención ao cliente en boas condicións. Dito doutra maneira: a ausencia de alguén que escoite de verdade. Así, informa a OCU, a maioría das queixas xeradas ao abeiro do sector (que son o 12% das case 40.000 rexistradas en 2009), están en relación co devandito, máis polo miúdo o 62%. O informe en cuestión, que foi feito sobre a base de 11 operadoras, confirman que a comunicación cos usuarios ten moito que mellorar.
Entre os elementos específicos que máis malestar provocan na cidadanía atópase o dos tempos empregados de atención. Deste xeito, a OCU puído comprobar que unicamente Happy Móvil, Yoigo e Másmovil atenden aos clientes mediante unha persoa e dende o comezo até o remate da chamada. O resto das empresas usan máquinas (contestadores) que guían ao usuario por unha enleada de departamentos, co que se acada unha prórroga na chamada e, sobre todo, unha diminución importante da paciencia de quen a fai.
Sobre as tarifas dos números 902 e as chamadas ao estranxeiro, a OCU engade que Happy Móvil e Orange non achegan información precisa sobre estes puntos, ao igual que Movistar, que “deu información obsoleta sobre as tarifas 902, máis baratas cás actuais”.
Entre outras cousas, o estudo tamén serviu para elaborar un ranking das operadoras que mellores valoracións reciben dos cidadáns a raíz dos seus servizos de atención, ranking no que por certo atopamos á galega R situada nos postos máis altos, xunto con Yoigo e Pepephone.

A PS3 soportará Blu-ray 3D a partir de outubro

Marcus Fernández — 2010-09-02T12:55:00Z


A PS3 xa soporta xogos en 3D

Pese a que estaba prevista para este mes, Sony adía a actualización da PlayStation 3 para dotala de compatibilidade cos contidos en Blu-ray 3D ao mes que vén, de xeito que en outubro os usuarios da PS3 que teñan un televisor compatible coa tecnoloxía 3D poderán gozar de películas en formato físico que tiren proveito da mesma, cando na actualidade a consola doméstica de Sony só permite tal nos xogos.
Aínda que para que os videoxogos sexa posible as 3D é preciso reducir a súa resolución a 720p (pois a consola non ten potencia suficiente para xerar 2 imaxes simultáneas a 1.080p cunha taxa de frames aceptable), no caso das películas en formato Blu-ray 3D esta limitación desaparece, quedando coma principal atranco para gozar deste tipo de películas o seu reducido catálogo (actualmente nin sequera está editada en 3D a película Avatar) e os poucos televisores 3D no mercado (o que non parece que vaia cambiar a medio prazo, en boa medida porque moitos consumidores están a agardar a que esta tecnoloxía estea dispoñible sen lentes).

Telefónica incrementará de 6 a 10 Mbps a velocidade do seu ADSL de referencia

Marcus Fernández — 2010-09-02T12:23:13Z

Durante o XXI Encontro de Telecomunicacións organizado por AETIC e Telefónica coa UIMP, Guillermo Ansaldo, presidente de Telefónica España, anunciou que as conexións de ADSL de 6 Mbps da súa compañía incrementarán de balde a súa velocidade a 10 Mbps nun proceso que comeza agora e que prolongarase ao ano que vén. As velocidades de subida tamén pasarán dos 640 Kbps actuais a 800 Kbps. De todos os xeitos non todos os usuarios poderán gozar das novas velocidades por motivos técnicos, como tamén aconteceu co resto de melloras de velocidade das conexións ADSL (especialmente ao pasar de 3 a 6 Mbps), posto que a distancia dos domicilios ás centrais limita as velocidades que poden ofertarse.
Con esta medida Telefónica busca converter os 10 Mbps como a velocidade de banda larga de referencia, ao igual que na banda larga móbil buscarán xeneralizar a velocidade de 7,2 Mbps este mesmo ano onde haxa cobertura HSDPA, aínda que nalgunhas zonas están a contar con velocidades aínda maiores, de xeito que en Madrid e Barcelona pasarán de 21 a 42 Mbps na banda larga móbil, o que durante 2011 pretenden trasladar a cidades con máis de 250.000 habitantes.

Os mineiros atrapados de Chile, reclamo para a distribución dun troiano bancario

Fernando Sarasqueta — 2010-09-02T11:55:00Z

Os ganchos na Rede teñen forma de actualidade: esta é unha desas realidades que case nunca fallan. Que hai algo que preocupa á sociedade, ben sexa por sentimento verdadeiro de compaixón, ben por morbo? Pois antes de que nos decatemos xa se detectan na Rede todo tipo de trampas que empregan como reclamo iso mesmo que provoca preocupación para distribuír malware ou roubar información ou cartos. Até certo punto, a comunidade que desenvolve infeccións e roubos en liña funciona neste eido como unha empresa moi ben organizada: moi poucas bágoas se lle escapan. Segundo informa Panda, isto mesmo é o que acontece estes días coa cuestión dos mineiros chilenos que seguen atrapados dende hai varios días baixo o chan. Pois ben, a desgraza xa ten a súa resposta malware, tal e como se deduce do troiano bancario, un código malicioso chamado Banbra.GUC, que se distribúe a través dun vídeo sobre o suposto rescate.
Trátase, máis polo miúdo, dunha nova variante dunha familia de virus bancarios de moita sona, os Banbra, que apareceron por vez primeira no ano 2003. O seu funcionamento é máis ou menos o de sempre: por unha banda semella que cumpre unha función inofensiva (neste caso amosarnos o vídeo en cuestión dende o computador no que xa está instalado) pero pola outra leva a cabo unha serie de operacións encamiñadas a captar contrasinais bancarias. Segundo informa Panda, entre as entidades afectadas están o Banco Santander e máis o Banco de Brasil. “Cando o usuario visita algunhas das páxinas das empresas sinaladas, Banbra.GUC descarga uns executables que simulan ser a páxina en cuestión; unha vez que o usuario introduce os seus datos, este executable péchase devolvendo ao internauta á páxina real do banco”, sinalan dende Panda. E engaden: “Logo de todo o devandito, o troiano envía a información roubada ao seu creador a través do correo electrónico”. O programa, especialmente perigoso a xuízo da dita empresa de seguridade informática, soe atopar circulación a través de correos electrónicos ou redes sociais con ligazóns que semellan dirixir ao usuario a un suposto vídeo de YouTube, que en realidade non é tal e que serve para descargar o troiano no PC.

Mar Pereira salienta no FITCE o potencial da Axenda 2014.gal

Raquel Noya — 2010-09-02T11:10:12Z

A secretaria xeral de Modernización, Mar Pereira, foi a representante do Goberno galego escollida para inaugurar esta mesma mañá en Santiago de Compostela a 49 edición do Congreso FITCE, que reúne na capital galega a 500 profesionais das telecomunicacións procedentes de toda Europa.
Na súa intervención, a titular da carteira tecnolóxica destacou o labor que está a desenvolver a Xunta a través da Axenda Dixital 2014.gal, unha ferramenta que, segundo lembrou, “foi creada para xerar emprego e riqueza, construír unha administración máis eficiente e cercana, capacitar aos cidadáns para o mercado global e dotar á Comunidade de infraestruturas de telecomunicacións modernas e sostibles”.
Este simposio europeo, que se está a celebrar no Pazo de Congresos de Santiago ata o vindeiro día 4 de setembro, permitiulle á secretaria xeral loubar os compromisos recollidos na Axenda Dixital de Galicia e neste senso apuntou que o seu esforzo está agora en “aproveitar as oportunidades que trae consigo a nova era dixital e asumir o reto de converxer con Europa no 2020”.
A responsable de Innovación Tecnolóxica da Xunta, destacou, asemade, que a creación desta Axenda, plenamente aliñada coa Axenda Dixital Europea, “pon de manifesto que malia que o Camiño de Santiago constitúe o primeiro nexo de unión entre Galicia e Europa, os seus vínculos non se limitan a esta ruta de peregrinación. A través das súas correspondentes Axendas Dixitais, as dúas asumen o compromiso de lograr un crecemento intelixente, sustentable e integrador que permita obter altos niveis de emprego, de produtividade e de cohesión social. “
Nesta nova edición de FITCE, organizada pola Asociación de Enxeñeiros de Telecomunicación de Galicia (AETG), co respaldo da Asociación Española de Ingenieros de Telecomunicación (AEIT), debaterase durante 4 días sobre o estado e os proxectos de futuro das infraestruturas de telecomunicacións na Unión Europea baixo o lema O camiño de Santiago e as telecomunicacións europeas.
Un total de 500 profesionais das telecomunicacións de toda Europa participarán ata o vindeiro día 4 neste simposio internacional no que se desenvolverán once presentacións orais, catro sesións de posters e dúas mesas redondas (integradas polos principais fabricantes e operadores de telecomunicacións do país).
Os relatores convidados analizarán o campo dos servizos e aplicacións TIC, afondando na nova era tecnolóxica e nas aplicacións avanzadas que permitirán acceder a infraestruturas intelixentes. Así mesmo, abordarán a aplicación da fórmula I+D á configuración de Internet, á vez que exporán os retos aos que se enfrontarán os reguladores das telecomunicacións ao vivir inmersos na sociedade da información.

Presenza galega entre as firmas candidatas ao Premio Vivero de SIMO Network

Fernando Sarasqueta — 2010-09-02T11:08:14Z

A feira SIMO, despois de estar a piques de esmorecer hai uns anos e dos folgos collidos logo a través da súa transformación en SIMO Network (máis ligada á rede e ao traballo na nube, tal como sinala o seu novo nome), segue a ser un escaparate tecnolóxico-dixital digno de ser tido en conta. Así o entenden as tres novas empresas galegas que aspiran este ano á quinta convocatoria do Premio Vivero que organizan o IFEMA e Fundetec ao abeiro da dita feira, a celebrar en Madrid entre o 5 e o 7 de outubro. Segundo nos conta Galicia Hoxe na súa web, a representación galega no devandito certame procede da Coruña (de onde son dúas das firmas) e de Santiago (de onde vén a restante). Estes e outros datos fóronlle achegados ao xornal galego pola propia Fundetec, quen por outra banda non quixo desvelar o nome concreto das nosas empresas aspirantes.
O obxectivo do premio é subministrarlles apoio ás compañías de alicerce tecnolóxico e que estean a levar a cabo unha tarefa de innovación que contribúa á súa propia mellora no mercado e á mellora do tecido produtivo estatal por enteiro. Amais das galegas, neste intre hai contabilizadas outras 31 candidaturas procedentes de 10 comunidades.
Cada unha das achegas será estudada polo miúdo por un xurado integrado por expertos TIC e do eido da innovación. Os gañadores disporán no IFEMA (instituto que dá acubillo á celebración física de SIMO) dun escaparate de presentación para os seus produtos. Entre os recoñecementos que inclúe o certame inclúese un galardón especial de 12.000 euros. Os nomes dos gañadores daranse a coñecer este venres 10 de setembro.

Zara presenta tenda en liña para seis países europeos

Fernando Sarasqueta — 2010-09-02T10:32:59Z

O espallamento de Inditex chega a tódolos planos de realidade. Calquera galega/o que ande polo mundo pode comprobalo, vaia de viaxe a onde vaia, coa posibilidade extra de converter a procura dunha tenda de Zara como un entretemento máis e co engadido de ser algo así como ver a un coñecido entre tanta xente estraña. Isto que se aplica ao eido das tendas físicas, tamén acontece un pouco na Rede, en parte polo medre das visitas e a repercusión das webs vinculadas a Inditex, e en parte polas cifras acadadas en redes sociais como Facebook, onde Zara xa anda polos 4,5 millóns de seareiros.
A cousa aínda se enlea máis se temos en conta que Zara vén de estrearse no mercado virtual cunha tenda en liña habilitada para seis mercados europeos: España, Francia, Alemaña, Reino Unido, Italia e Portugal. Isto significa que os internautas destes países están en xa en disposición de mercar os artigos da colección outono-inverno da tenda galega, unha das máis coñecidas (se non a máis) de Inditex. Por certo que a intención da compañía de Amancio Ortega é aplicar o mesmo proceso ao resto das súas cadeas.
Esta virtualización das súas tendas responde como é de supor á renovada estratexia de medre da firma, que non quere ficar á marxe do afianzamento de novos usos e costumes á hora de mercar roupa. Para Inditex Internet e as redes sociais son ferramentas indispensables e canles extraordinarias de comunicación que lle acaen á perfección á filosofía da firma. Por certo que a posta en marcha desta estratexia de venda en liña podería supoñer para Inditex un incremento nas súas vendas do 4%. Respecto ao miolo da tenda virtual, dicir que se poderá chegar a ela dende computadores e dende dispositivos móbiles, sendo un dos seus obxectivos básicos a funcionalidade e a claridade dos seus elementos. Entre outras cousas, inclúe unha ferramenta de busca con diversas alternativas de filtrado para facer máis doada a procura de roupa segundo os gustos e tendencias de cada internauta. Tamén inclúe un sistema para esculcar nos artigos que nos interesen coma se estivesen perante os nosos ollos (SuperZoom). Segundo conta a empresa, en breve se achegarán os recursos precisos para efectuar adquisicións a través dos trebellos móbiles de Apple, o iPhone e o iPad. Polo que respecta aos prezos, serán os mesmos cós das tendas físicas.

PandaLabs elabora unha completa listaxe coas estafas máis típicas da Rede

Raquel Noya — 2010-09-02T10:31:27Z

Cada ano, dende que as novas tecnoloxías e Internet son o que son na actualidade, miles de usuarios son vítimas de estafas a través da Rede, enganos que sempre, por norma xeral, buscan o beneficio económico a toda costa e sen importar a excusa.
Pandalabs, o laboratorio especializado en malware de Panda Security, estivo un tempo a recadar datos sobre os enganos máis empregados na Rede e recentemente vén de elaborar o ranking das estafas máis frecuentes que se foron dando nos últimos anos e que seguen a cobrar vítimas en liña a día de hoxe.
Segundo informan dende a entidade, o obxectivo é sempre o mesmo: “estafar ao meirande número de usuarios para conseguir contías económicas que poden ir dende os 500 ata os milleiros de dólares”.
Luis Corrons, o director técnico de PandaLabs asegura que o principal problema deste tipo de enganos en liña é que “as persoas afectadas raramente denuncian, e cando o fan, non é habitual que cheguen a recuperar as súa perdas, xa que”, engade, “os ciberdelincuentes soen perderse na Rede”.
A mellor defensa é pois aprender a recoñecer aos estafadores e evitar, deste xeito, converternos nunha vítima máis. Xa que logo, segundo a listaxe elaborada por PandaLabs, o ranking dos enganos máis frecuentes dos últimos 10 anos son os que seguen:
Nixerianos, trátase da primeira estafa orixinada na Rede que chega en forma de correo electrónico e na que un suposto extranxeiro (normalmente nixeriano, daí o nome) nos comunica que precisa sacar unha importante cantidade de diñeiro (millóns de dólares) do seu país, prometendo grandes cantidades como recompensa pola molestia ocasionada.
Se a persoa usuaria accede, pídenlle que pague unha “pequena” suma para sufragar os gastos da transferencia bancaria, esa sería a contía perdida finalmente polo usuario.
Loterías, o mecanismo é moi semellante ao anterior, só que neste caso, a persoa usuaria recibe un correo no que se lle notifica que saíu gañador dun sorteo. Neste caso tamén se solicita unha contía para sufragar os gastos da falsa transferencia.
Mozas, neste tipo de estafas, unha moza guapa, normalmente procedente de Rusia, atopa a nosa dirección de correo e quere falar connosco. Sempre son mozas ás que lle “encantaría” visitar o noso país e “coñecernos mellor”. A estafa vén cando nos solicitan unha cantidade de diñeiro para pagar os billetes. En todos os casos e sen excepcións, as persoas que acceden ao engano non quedan só sen os cartos, tamén sen a moza!.
Ofertas de traballo, esta estafa consiste en que a persoa usuaria recibe unha mensaxe dunha importante compañía extranxeira que busca axentes financieiros no noso país. Neste caso, os ciberdelincuentes empregan ás persoas estafadas para roubar diñeiro doutras persoas ás que lle roubaron previamente as súas credenciais bancarias, convertindo ao usuario en “mula” e polo tanto “cómplice” dun delito, porén sen sabelo.
Facebook / Hotmail: Os ciberdelincuentes acceden a unha conta de Facebook, Hotmail ou servizo similar logo de conseguir a contrasinal. Cambia todas as credenciais para que o usuario real non poida entrar na súa conta e convence aos contactos do mesmo de que lle roubaron cartos xusto antes de marchar de viaxe e non ten para pagar o hotel.
A compensación: é unha das estafas máis recentes e surrealistas nas que se informa da creación dun falso fondo para compensar as vítimas do engano nixeriano. As persoas estafadas volven a selo por segunda vez.
A equivocación: neste tipo de enganos, os estafadores póñense en contacto coas persoas usuarias que publicaron un anuncio de venda de algo a través da Rede e envían rapidamente un cheque cun importe superior á contía. A estafa consiste en solicitar a devolución da cifra que puxeron de máis e que normalmente os estafados perden.

Como en toda estafa habida e por haber, o aconsellable normalmente é ter instalado un bo antivirus, aplicar o sentido común e desconfiar das mensaxes ou remitentes extraños.

A ONT e Vodafone presentan un sistema informático para axilizar os transplantes

Fernando Sarasqueta — 2010-09-02T09:42:12Z

Na cuestión dos transplantes de órganos, coma en calquera outra vinculada á atención médica, a redución dos tempos de resposta é fundamental. Métodos para acadar isto hai uns cantos, pero se cadra todos pasan arestora pola mesma vía: a das telecomunicacións e máis polo miúdo a da telefonía móbil con posibilidade de recibir correos electrónicos. Nesta liña insírese precisamente Carla, proxecto promovido de xeito conxunto pola ONT (Organización Nacional de Transplantes) e a Fundación Vodafone e que incorpora como grandes novidades perante outras iniciativas semellantes a posta en xogo dunha aplicación informática que posibilita o subministro e recepción, vía móbil, de todo tipo de datos sobre doantes de órganos en tempo real, co que se asegura o obxectivo do que falabamos ao comezo: a redución dos tempos.
A ferramenta foi presentada esta semana pola ministra de Sanidade, Trinidad Jiménez, quen aproveitou para facer un repaso polo miolo do sistema, un desenvolvemento que tamén se dirixe a facilitar na medida do posible o día a día dos profesionais sanitarios que interveñen nos transplantes, constituíndose como un acubillo dixital de datos ao que acudir en calquera intre e como un vehículo para a transmisión eficaz dos mesmos.
O sistema, que foi desenvolvido por Oesia (empresa de aplicacións tecnolóxicas), ten conexión directa coa base de datos central da ONT e cos teléfonos móbiles de tódolos profesionais que traballan ao seu abeiro, o que deixa marxe para incrementar o nivel de coordinación do traballo e para un fluxo constante dos datos dos doantes, rexistrados a través da devandita aplicación informática. Amais disto, o desenvolvemento permite verificar o grupo sanguíneo de quen achega un órgano (proceso fundamental), axiliza a procura do receptor axeitado, mellora a loxística e todo o relativo á mobilización dos equipos de extracción e favorece a presentación das informacións e as estatísticas. Este sistema, que xa está en funcionamento na sede central da ONT e máis nos seus centros autonómicos, integrarase a finais de ano nos restantes colaboradores hospitalarios.

ARCHOS estrea 5 tablets con Android 2.2

Marcus Fernández — 2010-09-01T21:17:38Z

Dende ARCHOS parecen estar a tomarse moi en serio o sistema operativo Android 2.2 se atendemos á incorporación ao seu catálogo de 5 novos tablets con prezos que parten dos 99 euros, levando así os seus reprodutores multimedia portátiles de grande tamaño un chanzo máis arriba, converténdoos en dispositivos moito máis versátiles.
A nova gama de produtos parte dos económicos ARCHOS 28 e 32 Internet Tablet ata a marabilla multimedia do ARCHOS 43 Internet Tablet pasando polos ARCHOS 70 e 101 Internet Tablets de ampla pantalla, que ofrecen unha navegación moi rápida, xogos, acceso a redes sociais, lectura de libros electrónicos, aplicacións, vídeo en alta definición e música nun deseño bastante fino que dan a entender que este fabricante francés pode competir con grandes compañías coma Apple, Toshiba, Samsung ou HP nesta gama de produtos.
O ARCHOS 28 Internet Tablet presume de ser o primeiro reprodutor multimedia con Android 2.2 que pode adquirirse por 99 euros. Conta cunha pantalla táctil de 2,8 polgadas cunha resolución de 320 x 240 píxeles, procesador Cortex A8 a 800 MHz, Wi-Fi N, USB 2.0, aplicacións para Android que permite unha completa reprodución multimedia (soportando imaxes, música e vídeo nos formatos máis populares, incluíndo WMV, FLV, MKV, RMVB, MP4, 3GP, AVI e mesmo subtítulos), unha batería que permite unha autonomía de reprodución musical de ata 16 horas, 4 horas de reprodución de vídeo e 6 horas de navegación web, unhas medidas de 100 x 54 x 9 milímetros e un peso de 68 gramos. Xa está á venda a 99 euros con 4 Gb de capacidade interna e 119 euros con 8 Gb.
O ARCHOS 32 Internet Tablet mellora o tamaño de pantalla ata chegar ás 3,2 polgadas cunha resolución de 400 x 240 píxeles, unha capacidade de 8 Gb, Bluetooth 2.1, cámara de vídeo en resolución VGA e unha autonomía de 24 horas para música, 6 horas para vídeo e 8 horas para navegación web, que véndese por 149 euros.
Noutra división entra xa o ARCHOS 42 Internet Tablet, que será o último en saír este mesmo mes a un prezo de 199 euros para unha capacidade de 16 Gb, e que mellora o seu procesador ata chegar a 1 GHz de velocidade e a súa pantalla (con 4,3 polgadas e unha resolución de 480 x 854 píxeles), características que permítenlle abrazar o vídeo en alta definición a 720p (tanto en reprodución coma en gravación a través da súa cámara integrada) e lévalle a integrar unha saída miniHDMI. Tamén incorpora altofalante, unha batería con autonomía para 36 horas de reprodución musical, 10 de vídeo e 12 de navegación web, mide 135 x 65 x 9 milímetros e pesa 130 gramos, polo que estaría na liña dos móbiles de alta gama que funcionan con Android (aínda que sen a conectividade móbil).
Para o mes de outubro teremos un par de trebellos de grande tamaño, coma son o ARCHOS 70 Internet Tablet e o ARCHOS 101 Internet Tablet, con pantallas de 7 e 10,1 polgadas respectivamente. O ARCHOS 70 Internet Tablet venderase por 249 euros no seu modelo con 8 Gb de capacidade de almacenamento en memoria de estado sólido (de xeito que só pesa 300 gramos) ou a 299 euros cun disco duro de 250 Gb (pesando 100 gramos máis este último) e a súa pantalla ten unha resolución de 800 x 480 píxeles; mentres que o ARCHOS 101 Internet Tablet, ao ampliar a súa pantalla a 10,1 polgadas tamén incrementa a súa resolución a 1.024 x 600 píxeles, contén o seu prezo en 480 gramos, e estará dispoñible por 299 e 349 euros en capacidade de 8 e 16 Gb respectivamente. Curiosamente estes 2 novos trebellos, pese a soportar alta definición a 720p, as súas cámaras web só teñen resolución VGA.
O principal atranco que ten esta nova familia de trebellos é que, pese a soportar Flash 10.1 e poder conectarse á Rede mediante Bluetooth (prestacións que non permiten dispositivos coma o iPad) carece dunha aplicación tan importante coma o Android Market, tendo que empregar a tenda AppsLib como porta de entrada de programas, de xeito que ARCHOS mantén o control sobre estes dispositivos Android.


O ARCHOS 101 Internet Tablet destaca pola súa pantalla de 10,1 polgadas que o convirten nun posible competidor do iPad e outros dispositivos deste tipo que están a chegar ao mercado

Apple renova os seus reprodutores multimedia

Marcus Fernández — 2010-09-01T20:46:00Z

A pasada tarde Apple realizou unha importante presentación musical na que deron a coñecer a renovación da súa gama de reprodutores multimedia (coa excepción do iPod Classic) xunto con outros anuncios da compañía de Cupertino, no que foi un evento con poucas sorpresas, pois a meirande parte das novidades correspondéronse con bastante precisión cos rumores dos últimos días.
Entre as primeiras novas anunciadas por Steve Jobs estaba o iOS 4.1, a renovación do sistema operativo do iPhone, que busca arranxar problemas co sensor de proximidade e optimizar o seu funcionamento nos vellos iPhone 3G (cos que rexistráronse moitos problemas de rendemento ao actualizar a iOS 4), aproveitándose a actualización para presentar o Game Center, unha plataforma de xogos multi-usuario, e a tecnoloxía HDR que consiste na toma de dúas fotografías co móbil (unha con pouca luz e outra sobreexposta) para realizar unha combinación das mesmas acadando uns resultados bastante satisfactorios (aínda que tamén será posible obter unha fotografía ordinaria).
No tocante o iPad, Jobs anunciou que en novembro contará cunha actualización directa a iOS 4.2, que achegará a multi-tarefa ao trebello con pantalla de 9.7 polgadas de Apple, con outras novidades como a impresión sen fíos e o AirPlay (un sistema de streaming audiovisual dende o ordenador).
Volvendo aos reprodutores multimedia básicos, o iPod shuffle chega á súa cuarta xeración, reducindo o seu tamaño, retomando os botóns de control (cun panel moi semellante ao dos anteriores iPod nano ou ao dos iPod shuffle orixinais), incorporando listaxe de reprodución e levando a súa autonomía ata as 15 horas. Ten unha capacidade de 2 Gb e o seu prezo é de 49 euros.
O iPod nano é posiblemente o reprodutor que máis mudou nos últimos tempos, retomando unha aparencia cadrada (37,5 x 40,9 milímetros) e incorporando unha pinza (o que o asemella excesivamente ao iPod shuffle) e unha pantalla táctil de 1,54 polgadas cunha resolución de 240 x 240 píxeles. Custará 159 euros no seu modelo de 8 Gb e 189 euros o de 16 Gb, aínda que non sería de sorprender que moitos usuarios preferisen facerse co modelo actual, xa que esta revisión prescinde da cámara integrada (aínda que conserva a radio FM) e da reprodución de vídeo.
Unha renovación que si parecía anunciada era a correspondente ao iPod Touch, que finalmente convértese nun iPhone 4 sen conectividade 3G, GPS e compás (o que permítelle adelgazar en peso e grosor), pois incorpora pantalla Retina, cámaras HD e VGA, permite o uso de FaceTime, xiroscopio e procesador Apple A4. Promete ata 40 horas de autonomía para a reprodución musical e 7 horas para vídeo. O seu prezo será de 229, 299 e 399 euros para as súas capacidades de 8, 32 e 64 Gb.
Jobs destacou a forza que estaban a coller os videoxogos no iPod Touch, asegurando que grazas a tal éxito o iOS estaba a superar á Nintendo DS e á PSP xuntas, aínda que tal afirmación sería moi discutible, pois non fala do número de dispositivos, senón do número de xogos, o que non é unha comparación aceptable, pois a plataforma de Apple conta con moitos xogos de balde ou a prezos moi reducidos (sendo o habitual que custen uns 0,79 euros) mentres que nas consolas portátiles predominan os xogos en soporte físico a prezos de entre 20 e 40 euros (polo que en volume de negocio Apple ten aínda moito camiño que percorrer).
Pero non só o hardware protagonizou o evento de Apple, senón que tamén houbo un curruncho para iTunes, que chega á súa versión 10, e incorpora unha rede social bautizada coma Ping e que permite características semellantes ás que actualmente ten Spotify, permitindo seguir e ser seguido, compartir listaxes de reprodución, cancións e opinións. Esta nova funcionalidade estará presente tanto na versión de escritorio de iTunes coma no iPod Touch e o iPhone. Coma curiosidade, o logotipo de aplicación mudou para prescindir no mesmo dun Compact Disc que tiña de fondo, pois o soporte xa non parece ser algo que o público asocie agora á música.


O Apple TV, aparte de reducir o seu prezo, tamén fixo o propio co seu tamaño

Outro produto renovado por Apple, que finalmente non mudou de nome (pese aos rumores), foi o Apple TV, que pasa de ser un reprodutor multimedia con disco duro a un streamer puro (o que permítelle unha baixada de prezo duns 70 euros ata quedar en 119 euros), ou sexa, que serve para amosar no televisor do salón contidos multimedia almacenados no ordenador ou alugados a través dun servizo en liña de Apple, que nos EE.UU. ofrecerá series de televisión en alta definición por 99 centavos e películas (o mesmo día do seu lanzamento en DVD) por 4,99 dólares, mentres que a chegada de tal servizo a España aínda non ten data. Entendemos así que este servizo non tería moito sentido apra o mercado español, pois é posible adquirir dispositivos a prezos semellantes que teñen maior compatibilidade de formatos e potencia (o Apple TV está limitado a vídeos a 720p, mentres que moitos dos seus competidores chegan a 1.080p).

Primeiro anuncio do novo iPod Touch
O primeiro anuncio do iPod nano destaca a súa facilitadade para vestilo


O iPod Touch achégase en prestacións ao iPhone 4

Canon anuncia as súas cámaras de video profesionais máis compactas

Marcus Fernández — 2010-09-01T20:23:00Z

Pensando na súa versatilidade, Canon anuncia un par de cámaras profesionais que sairá á venda no primeiro trimestre de 2011 e que serán as máis pequenas deste fabricante. A única diferenza entre a Canon XF100 e a XF105 é que esta última conta cunha saída HD-SDI.
Estas novas cámaras gravan vídeo en alta definición en tarxetas Compact Flash a resolucións de 1.080p a 24 ou 30 imaxes por segundo (ou a 1.080i a 60 cadros por segundo) facendo uso do codec XF de Canon (MPEG-2 4:2:2 a 50 Mbps) que garante unha boa calidade de imaxe e compatibilidade con sistemas de edición non lineal (de fabricantes coma Adobe, Apple, Avid e Grass Valley).
Tamén é posible emparellar dúas cámaras deste tipo para realizar gravacións en 3D, aínda que o principal uso para este tipo de camascopio é o da toma de novas ou a gravación de documentais.
Entres as funcionalidades adicionais cas cámaras Canon XF100/105 está a posibilidade de gravar time lapses ou incluso realizar gravacións fotograma a fotograma (para animación stop-motion). Contan cunha lente cun zoom de 10x e un modo de disparo de infravermellos para gravar en condicións de luminosidade reducida.

Sony engade pantalla táctil óptica aos seus eReaders

Marcus Fernández — 2010-09-01T19:22:43Z

Aínda que dende Sony non queren entrar nunha guerra de prezos cos seus lectores de libros electrónicos, iso non impide que renoven tal liña de produtos, de xeito que en vez de reducir os seus prezos de xeito significativo optaron por mellorar as súas prestacións, co que agora temos eReaders máis delgados, rápidos e con pantalla táctil óptica (con tecnoloxía anti-reflexos) en todos os modelos.
A distribución internacional de modelos coma o Reader Touch e o Pocket Editions tamén mellora, chegando finalmente de xeito oficial a Italia, Australia, Xapón e España.
Os novos lectores de e-books empregan as novas pantallas de E Ink, que melloran o seu nivel de contraste, o que facilita a súa lectura baixo o sol, continuando a presentar 16 niveis de gris.
O Reader Pocket Edition é o modelo básico de Sony, cunha capacidade de almacenamento de 2 Gb (que permite cargar uns 1.200 libros) e un prezo de só 179 dólares, seguido polo Reader Touch Edition, que aparte de 2 Gb de memoria interna tamén conta con fendas de expansión para tarxetas de memoria de ata 32 Gb e a capacidade de reproducir audio en MP3 e AAC (ten un prezo de 229 dólares). E coma guinda, o Reader Daily Edition achega conectividade sen fíos (tanto 3G coma Wi-Fi), navegación web básica, pantalla de 7 polgadas, 2 Gb de memoria interna ampliable mediante tarxetas de ata 32 Gb e un prezo de 299 dólares.

A Xbox 360 terá un mando sen fíos cun novo deseño

Marcus Fernández — 2010-09-01T19:04:47Z

Aínda que na meirande de xogos (especialmente os shooters) os controis da Xbox 360 gozan dunha grande ergonomía, cando temos que facer uso da cruceta dixital a cousa cambia bastante, resultando pouco preciso o D-pad actual, de aí que dende Microsoft decidiron redeseñar este elemento dun xeito orixinal: xirando o D-pad 90 graos pode incrementarse a altura da cruceta, o que fai que os dedos do xogador a perciban mellor (aínda que continúa a ter unha posición pouco cómoda para os xogos de loita).
A nivel de cores tamén mudaron os tradicionais botóns de A, B, X e Y, que pasarán a distintos tons de gris para adaptarse ao deseño na nova Xbox 360 e deixando de lado as súas tradicionais cores vermella, azul, amarela e verde, o que posiblemente non agrade a todos os usuarios.
Este novo mando poderá adquirirse nos EE.U. a partir do 9 de novembro dentro do Kit Carga y Juega por 64,99 dólares, e aínda non se anunciou nin a data nin o prezo cos que chegará a España.

Vista en detalle do novo mando para a Xbox 360


Inicialmente o novo mando só estará dispoñible nun Kit Carga y Juega

Sony traerá a España o seu servizo de vídeo baixo demanda Qriocity

Marcus Fernández — 2010-09-01T18:45:00Z

O servizo de vídeo baixo demanda de Sony chamado Qriocity vai chegar este outono a Francia, Alemaña, Reino Unido, Italia e España, levando os seus contidos de pagamento a distintos dispositivos de Sony (coma certos televisores Bravia e reprodutores de Blu-ray con conexión á Rede) entre os que se inclúe especialmente a PlayStation 3, contando esta plataforma cun importante catálogo de películas da 20^th Century Fox, Lionsgate, MGM, NBC Universal, Paramount e Sony.
O novo servizo de vídeo deuse a coñecer na feira IFA de Berlín, onde destacaron que podería vir acompañado polo servizo de música dixital baseado na nube Music Unlimited by Qriocity, que permitirá achegar millóns de cancións, aínda que sen dar moitos detalles das posibilidades e prezos desta nova plataforma.

O LG SMART TV facilita o consumo doméstico de contidos na Internet

Marcus Fernández — 2010-09-01T16:19:00Z

LG Electronics aproveitou a súa presenza no IFA de Berlín para presentar os seus novos televisores SMART TV, que incorporan conectividade á Rede, aplicacións en pantalla (que facilitan o acceso a multitude de contidos na Internet) e incluso un revolucionario mando a distancia chamado Magic Motion Remote Control que garda certas semellanzas co mando da Wii, xa que permite navegar polos contidos no televisor apuntando o mando cara a eles e premendo un único botón.
Estes novos televisores tamén facilitan o consumo de contidos dixitais mediante Media Link, facilitando o acceso a vídeos e imaxes do usuario, así coma o acceso aos contidos televisivos dende dispositivos conectados coma teléfonos intelixentes, reprodutores multimedia portátiles ou o iPad.
Actualmente LG está a negociar con distintos provedores a posibilidade de levar contidos premium aos seus novos televisores SMART TV, que vermos no mercado a comezos do ano que vén.

A USC rexistra un sistema que mide a reputación das marcas na Rede

Raquel Noya — 2010-09-01T12:31:17Z

O grupo de investigación Novos Medios da Facultade de Ciencias da Comunicación de Santiago de Compostela, non dedicou o verán a descansar como gran parte da poboación galega que afortunada ela se desprazou á plaia fuxindo do calor que asolou o país, senón que traballou nun sistema de medición de marcas na Rede, que vén de rexistrar e que bautismou como Nostracker.
Esta ferramenta é quen de analizar a reputación en Internet de marcas, empresas, persoas e incluso temas e, asemade, permite seguir de xeito automático a información que xeran blogs, redes sociais e todo tipo de medios dixitais na Rede.
As aplicacións de Nostracker, que xa se empregan de maneira efectiva sobre 10.000 blogs galegos, un cento de medios dixitais e un milleiro de grupos en Twitter, permiten procesar, xestionar e seguir as conversas e informacións xeradas nos medios dixitais, para, dalgunha maneira, tratar de marcar o grao de popularidade dos temas de xeito automático.
O sistema, que se centra principalmente nos ámbitos locais e micromedios, fai unha análise e un seguimento da reputación de marcas, temas, personalidades e fluxos de opinión na Rede a partir da identificación da información xerada polos usuarios.
Posteriormente establece e clasifica a diferenciación entre comentarios e informacións positivas e negativas, ademais de definir cada un dos actores e temas relacionados coas comunicacións. En función da notoriedade, popularidade e relevancia, a ferramenta establece un ranking de “reputación” en Internet.

A Nosa Terra apostará polo formato virtual

Fernando Sarasqueta — 2010-09-01T12:19:40Z

A Rede non é só acubillo, pero ás veces funciona como tal. O curioso do asunto é que ten capacidade para darlle vida e preservar proxectos cos que a priori chocaba: os que tiñan formatos de comunicación tradicional. Este foi o caso dun bo número de xornais e revistas de tódalas índoles e procedencias que ao longo dos últimos anos apostaron pola Rede como vía de supervivencia perante a crise de lectores en papel. O camiño non está pechado, nin moito menos, e nos últimos días fomos testemuñas dun triste cese editorial, o do xornal en papel A Nosa Terra, e da conseguinte procura na Rede dun futuro para o histórico medio galego.
Segundo conta El País nunha completa reportaxe sobre a situación presente e vindeira da histórica publicación galega, todo apunta a que A Nosa Terra afianzarase na virtualidade que xa bosquexou ao longo destes anos na súa web.
Este novo paso do xornal, anunciado tras entrar en concurso de acreedores e renunciar á súa edición semanal en papel (por primeira vez en tres décadas), responde á crise na que se ve inmerso, unha crise que a xuízo da editorial (Promocións Culturais Galegas) débese á falta de liquidez e á imposibilidade de renegociar a débeda.
A nova andaina de A Nosa Terra, como dixemos, vai pasar por unha maior aposta polo formato dixital. O xornal, que aínda non vai botar o peche, ten un equipo humano de 28 persoas. A idea é proseguir como xornal en liña e coa súa principal fonte de negocio, a edición de libros en galego, malia que esta actividade, din, sexa “outra empresa en extinción”. Dende aquí aproveitamos para desexarlles a mellor das sortes.

Amazon podería lanzar un servizo de televisión por Internet

Marcus Fernández — 2010-09-01T11:27:00Z

Segundo publica o The Wall Street Journal, a tenda virtual Amazon está a traballar na creación dun servizo de televisión por subscrición baseado na Internet que ofrecerá acceso ilimitado a algunhas películas e programas, e que podería contar con contidos de NBC Universal, Time Warner e Viacom.
Non podemos esquecer que Amazon xa contaba cun servizo de aluguer de películas a través da Rede chamado Unbox e posteriormente relanzado coma Amazon Video on Demand a finais de 2008, polo que a compañía non é novata neste sector, e levou os seus servizos a algúns sistemas integrados (coma certos televisores de alta gama), polo que poderían estar nunha boa posición para dar un paso adiante, nun momento no que tanto Google coma Apple queren apostar con forza por tal mercado.
ACTUALIZACIÓN: Amazon vén de incorporar ao seu catálogo de Amazon Video on Demand episodios de series de televisión de ABC e a Fox por 0,99 dólares cada un.

O grupo de arquitectura tradicional galega supera no Flickr as 5.000 imaxes

Fernando Sarasqueta — 2010-09-01T10:04:02Z


Xanela do Courel, achegada ao grupo de Flickr por Villafi

A Rede pode ser espello da realidade pero tamén bálsamo. Isto é aplicable a todo o que nos rodea, e partimos da base de que arredor nosa hai unha chea de cousas que máis non cumpriría non ver e que sen embargo vemos. Un bo exemplo disto é a substitución dos vellos usos e costumes construtivos galegos por outros novos que as máis das veces non teñen nada que ver co noso e que no caso de concellos concretos da nosa terra (como por exemplo o de Barreiros en Lugo) achegan a peor faciana desas prácticas alleas. Dito doutro xeito: o que neses recantos se está a construír, con todo o que se andou, só pode ser froito de ter esquecido o que aquí se fixo previamente, ou de non telo estudado nunca. Porén, a Rede axuda a pór as cousas no seu sitio. Na liña de recuperar os achados fornecidos ao longo de séculos polo noso eido construtivo é onde se move o grupo de arquitectura tradicional que desenvolve o seu labor en Flickr, colectivo comprometido coa perda do noso patrimonio construtivo e que neste intre vén de superar a liña das 5.000 imaxes achegadas.
A iniciativa, que tamén foi posta en marcha para chamar a atención sobre o proceso imparable de despoboamento das nosas aldeas e vilas, conta co apoio de máis de 550 internautas, que se adheriron ao portal de Internet para facer un repaso e unha constatación gráfica das nosas construcións que nos son máis propias, dende airas e alpendres a cruceiros e muíños, pasando por alvarizas, batáns ou lavadoiros.
A intención deste colectivo é cubrir de xeito visual e informativo a totalidade do noso territorio. Tal e como nos conta Xabier Feixoo, promotor da proposta en liña, o grupo en Flickr está aberto á participación de tódalas persoas que o desexen e que teñan interese en preservar o noso patrimonio construtivo e cultural, contribuíndo deste xeito a divulgar con bos exemplos os modelos máis axeitados de rehabilitación e reconstrución de todos estes elementos físicos.

O CPEIG achegaralle 1.000 euros ao mellor proxecto TIC de fin de carreira

Fernando Sarasqueta — 2010-09-01T09:21:39Z

O Colexio Profesional de Enxeñaría en Informática de Galicia (CPEIG) está a procurar xeitos de apoiar aos novos profesionais das redes e as ferramentas do coñecemento da nosa terra. Este e máis o de mellorar a profesión mesma é o obxectivo básico do Premio Proxecto Fin de Carreira que vén de convocar o Colexio para estudantes de Enxeñaría en Informática que desenvolveran os seus estudos na nosa terra nos últimos dous anos (2009 ou 2010).
O galardón, que constitúe para o CPEIG unha canle de achegamento á realidade do colectivo estudantil, enmárcase no programa de actividades dos Premios da II Noite de Enxeñaría en Informática de Galicia, gala de recoñecementos TIC que o Colexio ten proxectado celebrar o vindeiro 15 de outubro no Hostal dos Reis Católicos de Santiago.
Segundo informa a entidade profesional, para aspirar ao devandito galardón de fin de carreira cómpre facer chegar os proxectos antes do 15 de setembro á seguinte conta de correo electrónico: informacion@cpeig.org. De contado, “unha comisión integrada por docentes universitarios e representantes do CPEIG valorará os traballos recibidos e determinará o nome do gañador ou gañadora”, informa o Colexio. A persoa galardoada, engade, recibirá 1.000 euros como premio ao seu esforzo e traballo.

Dead Rising 2 estrea prólogo descargable para Xbox 360

Marcus Fernández — 2010-08-31T21:28:00Z

A falta de preto dun mes para o lanzamento de Dead Rising 2, chegou ao Bazar de Xbox LIVE un xogo descargable a xeito de prólogo chamado Dead Rising 2: Case Zero, que pode adquirirse por 400 puntos (4,8 euros) e presenta ao principal protagonista, Chuck Green, que tras lograr escapar por fortuna de Las Vegas coa súa filla Katey, chega a Still Creek, on de terá que volver a enfrontarse a un exército de mortos viventes antes de que remate o tempo, nunha aventura que terá unha duración de entre 2 e 3 horas, imprescindible para os seareiros desta saga.
Este prólogo serve de adianto do que será Dead Rising 2, limitando a acción a 10 rúas, 10 establecemento, 1 quilómetro cadrado de mapa e un milleiro de zombis, e aínda que esteamos ante un contido descargable para Xbox 360, o xogo final terá tamén versión para PlayStation 3 e PC que poderemos ver nas tendas a finais de setembro.

Trailer de Dead Rising 2: Case Zero


Chuck Greene deberá sobrevivir a un milleiro de mortos viventes nesta nova aventura descargable

O AutoCAD volverá a Mac tras 18 anos de ausencia

Marcus Fernández — 2010-08-31T20:52:00Z

Dentro do mundo do software comercial as aplicacións de referencia, especialmente no que a vendas se refire, son o Microsoft Office e o Adobe Photoshop, seguidas pola ferramenta de deseño AutoCAD, que leva 18 anos afastada do mundo do Mac, o que finalmente van arranxar co lanzamento do AutoCAD 2011 para Mac OS X, de xeito que os arquitectos e enxeñeiros poderán empregar ordenadores de Apple sen ter que instalar Windows ou emular tal plataforma de software, coas conseguintes vantaxes para a súa produtividade.
A nova aplicación chegará cunha interface semellante á do Final Cut Pro, permitirá abrir documentos DWG e contará coa meirande parte de características propias do AutoCAD para Windows, aínda que a cousa non quedará aí, senón que tamén van publicar un visor de documentos DWG para dispositivos con iOS, o que facilitará tamén a anotación e unha edición básica, de xeito que os profesionais poderán levar os seus traballos nun iPad para poder consultalos en mobilidade.

Philips GoGear Connect, o novo reprodutor multimedia con Android 2.1

Marcus Fernández — 2010-08-31T20:15:00Z

Philips levará esta semana á feira IFA o seu novo reprodutor multimedia Philips GoGear Connect, que destaca por ser «o primeiro reprodutor MP4 en ofrecer unha experiencia Android completa» (pois permite o acceso ao Android Market). Conta cunha pantalla táctil de 3,2 polgadas cunha resolución de 480 x 320 píxeles, tecnoloxía FullSound, sincronización da súa música mediante Philips Songbird (tanto por USB coma por Bluetooth), GPS, compás dixital, lector de tarxetas microSD, integra cámara para gravar vídeo e tomar fotografías, pesa 128 gramos e mide 113 x 12,6 x 59 milímetros.
Poderiamos comentar que este reprodutor multimedia sería o máis semellante que podemos atopar no mercado a un móbil con Android 2.1 coas funcións de teléfono desactivadas, e sairá á venda a finais de outubro a un prezo de 249 euros na súa versión con 16 Gb de capacidade de almacenamento interna.
Sobre os formatos soportados polo dispositivo, teremos imaxes en JPEG, GIF, PNG, BMP e TIFF, música en MP3, WMA, M4A (AAC), OGG e FLAC e vídeo en WMV, MP4 (MPEG-4 e H.264 ata 720p) e AVI (MPEG-4 de ata 720p).

Hannspree terá o seu propio tablet con Android 2.2 e pantalla de 10,1 polgadas

Marcus Fernández — 2010-08-31T18:02:00Z

Os tablets con Android queren ser tendencia na segunda metade do ano, e Hannspree quere facer a súa achega a este tipo de produtos cun interesante dispositivo con pantalla capacitiva de 10,1 polgadas cunha resolución de 1.024 x 600 píxeles, procesador nVIDIA Tegra 2 a 1 GHz, 16 Gb de memoria interna ampliable mediante tarxetas microSD, Wi-Fi, Bluetooth, portos miniHDMI e mini USB, batería de 3.500 mAh (que permite unhas 8 horas de vídeo) e un peso de menos de 800 gramos.
O novo tablet funciona con Android 2.2, permitirá tanto contido en Flash 10.1 coma vídeo a 1.080p e o seu prezo de venda será de 399 euros.


O tablet de Hannspree goza dunha boa conectividade

Google Reader engade vista a pantalla completa

Marcus Fernández — 2010-08-31T17:42:45Z

Os usuarios que accedan a Google Reader dende ordenadores ultraportátiles ou outros dispositivos con pantallas de tamaño reducido agradecerán a súa nova posibilidade, consistente nun modo de pantalla completa que podemos activar con premer a tecla f, de xeito que vemos directamente os contidos dos fluxos RSS que seguimos a través deste servizo, podendo amosar ou agochar o seu correspondente panel de navegación coa combinación de teclas maiúsculas + u.
Aparte desta novidade, Google Reader tamén mellorou a súa sección de Patrones, que agora permite coñecer cales son as fontes nas que se fai clic con maior frecuencia e outra información estatística coma o número de elementos lidos dende que se comezou a utilizar este servizo (aínda que deixa de contar ao superar os 300.000 de anotacións lidas).

Diaspora, a alternativa aberta a Facebook botará a andar en outubro

Marcus Fernández — 2010-08-31T17:42:00Z


O equipo detrás de Diaspora

Nos últimos días comentábase que o lanzamento de Diaspora, unha plataforma aberta que aspira a consolidarse como unha alternativa a Facebook, sería o vindeiro 15 de setembro, pero os seus responsables tiveron que matizar que en tal data o que fará será liberar o código aberto do seu proxecto, e non será ata o mes de outubro cando pretenden lanzar unha versión alfa para usuarios finais, de xeito que aínda tardaremos en ver algo que poida arrebatar usuarios a Facebook, pois deberá innovar considerablemente creando certo valor que poida levar a internautas ordinarios a mudar a esta nova plataforma, pois o factor do desenvolvemento aberto non é un valor en si mesmo, senón que deberá acompañarse co aproveitamento que tal permite, pois os desenvolvedores non terán tantos atrancos para a súa creatividade como en plataformas pechadas.

O novo xogo de God of War poderá mercarse cunha PSP personalizada

Marcus Fernández — 2010-08-31T17:12:54Z

Pese a que a saga de Kratos rematou cunha terceira entrega para PlayStation 3, o feito de que tivese un xogo para PSP que complementaba a triloxía serviu de base para o que será o quinto xogo da franquía, God of War: Ghost of Sparta, que sairá á venda o vindeiro 2 de novembro e que contará cunha edición especial realmente atractiva, pois falamos dun paquete que inclúe unha consola portátil PSP-3000 en dúas cores (negra e vermella), o xogo God of War: Ghost of Sparta en UMD, un cupón de descarga da anterior entrega (God of War: Chains of Olympus), a película Kick Ass en UMD e unha tarxeta Memory Stick Pro Duo de 2 Gb. O seu prezo nos EE.UU. será de 199,99 dólares, quedando por confirmar o seu lanzamento europeo (para o que podería haber lixeiros cambios como a película que inclúe de regalo ou a data de lanzamento).

TRON: Legacy terá edición de coleccionista

Marcus Fernández — 2010-08-31T14:26:00Z

O vindeiro 17 de decembro poderemos ver nos cines de medio mundo a película en 3D TRON: Legacy, que chegará ao mercado acompañada por un videoxogo, TRON: Evolution, que chegará 10 días antes, e do que estará dispoñible unha edición de coleccionista nas súas versións de Xbox 360 e PlayStation 3 que inclúe, aparte do xogo en si mesmo, unha moto de luz exclusiva (acompañada por unha vitrina protectora), inspirada nos deseños deste tipo de vehículos que aparecerán na nova película e que son moi recoñecibles dende a primeira entrega da saga que chegara aos cines en 1982, pasando a formar parte da iconografía popular. Esta edición especial venderase nos EE.UU. por 129,99 dólares.
Aparte das consolas de alta definición, TRON: Evolution tamén terá edicións para Wii, PC, Nintendo DS e PSP, de xeito que chegará ao maior público posible, facilitando gozar así dunha saga que en 2003 volveu na forma de videoxogo con Tron 2.0, título que buscaba resucitar a franquía cunha trama semellante á da película actual, polo que poderiamos dicir que cumpriu o seu papel.

Mañá comeza en Compostela a 49 edición do Congreso FITCE

Raquel Noya — 2010-08-31T13:03:21Z

O Colexio Oficial maila Asociación de Enxeñeiros de Telecomunicación de Galicia (COETG-AETG) veñen de convidar a 500 enxeñeiros de telecomunicacións procedentes de toda Europa a que participen na 49 edición do Congreso FITCE, que terá lugar a partir de mañá, día 1 de setembro, no Pazo de Congresos e Exposicións de Galicia en Santiago de Compostela.
Esta cita, que se alongará ata o vindeiro sábado, 4 de setembro, ter por lema “O Camiño de Santiago e as Telecomunicacións Europeas”, que liga a tradición do Camiño coas máis modernas infraestruturas de telecomunicación no contexto europeo coincidindo co Xacobeo 2010.
O Príncipe Felipe preside o comité de honra do Simposio xunto ao presidente da Xunta Feijoo e o ministro Sebastián, entre outras destacadas autoridades.
A sesión inaugural, que terá lugar o xoves, 2 de setembro ás 9:30, no salón Obradoiro do devandito Pazo, estará presidida pola secretaria xeral de Modernización e Innovación Tecnolóxica da Xunta, Mar Pereira.

Arcade Fire colabora con Google na creación dun vídeo interactivo en HTML5

Marcus Fernández — 2010-08-31T10:54:03Z

Moitos galegos están a contar os días ata o vindeiro 5 de setembro, cando o Monte do Gozo de Santiago de Compostela acollerá o concerto MTV Galicia 2010, no que actuarán os galegos Cornelius 1960, The Temper Trap, Echo and The Bunnymen e Arcade Fire, resultando especialmente destacable a coincidencia da visita a nosa terra desta última banda, pois esta semana está especialmente de actualidade por ter colaborado con Google na elaboración dunha experiencia musical baseada no navegador Google Chrome chamada The Wilderness Downtown, e que aproveita a canción We Used to Wait do último álbum de Arcade Fire para crear unha especie de vídeo musical interactivo en HTML5 que abre varias fiestras do navegador e integra Google Maps e Google Street View para achegar ao usuario unha experiencia personalizada, pois os vídeos que acompañan a este experimento compleméntanse con imaxes da vila onde medrou o visitante desta nova web e incluso conta cunha ferramenta de debuxo na que podemos realizar trazos ou escribir texto dun xeito artístico e orixinal.
Esta experiencia combina distintos elementos que facilita o Google Chrome, e que poden dar unha idea do potencial artístico dos novos navegadores web, e así en The Wilderness Downtown podemos ver unha coreografía de fiestras, bandadas de paxaros interactivas (reaccionan tanto á música como aos movementos do rato), música e vídeo reproducidos mediante HTML5, debuxo baseado en algoritmos, imaxes en 360 graos e incluso a corrección de cor para mellorar o contraste das imaxes.

Gmail priorizará os correos electrónicos segundo a súa importancia para o usuario

Marcus Fernández — 2010-08-31T10:38:16Z

O servizo de correo electrónico continúa a presentar innovacións, e tras engadir chamadas de voz dende a súa páxina web (actualmente só dende Norteamérica) agora están a mellorar a xestión da bandexa de entrada de e-mail, de xeito que os usuarios que reciben moitas mensaxes poidan separar mellor o gran da palla, pois Gmail está a preparar unha bandexa de entrada con prioridades que podería definirse como a aplicación do filtro contra o correo lixo ao revés, ou sexa, que identifica os correos máis importantes e colócaos na parte superior da bandexa de entrada nunha sección chamada Importante e sen ler, seguida das mensaxes destacadas para colocar logo todo o demais.
Para marcar a importancia das mensaxes Gmail analízaas atendendo á frecuencia de comunicación co remitente ou fixándose se respondemos ás súas mensaxes, de xeito que poderiamos distinguir de xeito doado as mensaxes dos amigos dos boletíns informativos ou a publicidade) e incluso podemos axudar ao sistema a facer tal marcando ou desmarcando unha casiña na que amósase a importancia das mensaxes (como tamén podemos facer actualmente co spam).
Actualmente están a espallar esta nova funcionalidade entre os usuarios de Gmail, de xeito que cando estea activado para eles poderán ver unha alerta na parte superior dereita da páxina web de Gmail informando desta característica.

Explicación en vídeo da nova bandexa de entrada de Gmail

O LG LEX8 estreará tecnoloxía NANO LED de só 88 milímetros

Marcus Fernández — 2010-08-30T20:07:01Z

Os vindeiros días LG amosará na feira IFA de Berlín unha nova xeración de paneis planos que supoñen unha evolución da tecnoloxía LED que dan en chamar NANO por reducir aínda máis o grosor dos televisores LED ata uns 0,88 centímetros, coma poderá verse no televisor LG LEX8, que conta cun refresco de 400 Hz, é compatible con contidos 3D e tamén ten a súa pantalla recuberta cunha capa anti-reflectinte que mellora a visualización incluso á luz do sol.
O televisor LG LEX8 consegue unhas cores máis naturais, un maior contraste e un maior rango de cores grazas á manipulación de bloques individuais de LED. Tamén integra 2 altofalantes invisibles de 7 W cada un, tecnoloxía Clear Voice II, mando a distancia Magic Motion e USB 2.0 (porto no que cargar contidos multimedia coma fotografías, música e incluso vídeo DivX HD).

Kinect non recoñecerá inicialmente o castelán

Marcus Fernández — 2010-08-30T20:05:00Z


Microsoft presentou Kinect en Bilbao

O vindeiro 10 de novembro chegará ás tendas europeas o revolucionario novo sistema de control sen mandos para a Xbox 360 que deron en chamar Kinect, e que recoñecerá os movementos do usuario para reproducilos en pantalla á vez que se incorpora un sistema de recoñecemento de voz que, segundo veñen de confirmar nunha presentación do produto, inicialmente só estará adaptado ao inglés, o xaponés e o mexicano, ou sexa, que o acento propio de España non estará soportado ata a primavera, polo que teremos que agardar meses para poder gozar ao 100% desta nova tecnoloxía (aínda que entre os xogos iniciais para Kinect non hai ningún título que se manexe de xeito intensivo coa voz, polo que non debería ser ningún problema).
Kinect contará con 3 sistemas diferenciados: o sensor de movemento (unha especie de cámara web que rexistra o espazo tridimensional), o sistema de recoñecemento de voz e un pequeno grupo de motores que seguirá o movemento do usuario mentres xoga. Combinando estes elementos pode substituírse o sistema de control tradicional, facendo que o corpo do xogador sexa o seu propio mando, o que poderemos comprobar en Kinect Adventures (xogo que incluirase de balde con Kinect por un prezo de 149 euros, aínda que tamén poderemos optar por mercar por 299 euros un paquete que inclúe unha Xbox 360 e o Kinect que resultará ideal para achegar a novos consumidores á plataforma de xogo de Microsoft), aínda que será en xogos coma Dance Central onde moitos entenderán mellor o potencial lúdico desta plataforma que non está limitada a un único xogador, senón que Kinect permite cun único dispositivo a participación de varios usuarios, o que agradecerán os petos dos consumidores, afeitos a ter que facer un desembolso sorpresa para mercar un mando adicional tras adquirir unha nova videoconsola.

Epic Mickey terá edición para coleccionistas

Marcus Fernández — 2010-08-30T18:51:00Z

As publicacións de xeito anticipado en tendas en liña de produtos sen confirmar son unha das canles máis habituais de filtracións nos últimos anos, e nesta liña Toy'R'Us vén de colocar no seu catálogo toda unha sorpresa para os usuarios da Wii, unha edición de coleccionista do último xogo de Warren Spector exclusivo para tal plataforma, Epic Mickey.
Este título previsto para a tempada de Nadal, pese a non ser para unha das consolas de alta definición (nas que as edicións de coleccionista son máis frecuentes do que deberían) poderá adquirirse cun disco extra cunha reportaxe sobre a súa creación, adhesivos para decorar a Wii e o seu mando e unha figura do rato Mickey de 13 centímetros de altura. Todo isto virá nunha fermosa caixa decorada co protagonista da aventura experimentando coa pintura e custará 69,99 dólares nos EE.UU. (20 dólares máis que a edición ordinaria), estando sen confirmar se chegará a España nesta edición especial.
De todos os xeitos, non será preciso mercar a edición de coleccionista de Epic Mickey para quedar impresionado, pois o seu trailer oficial xa apunta maneiras:

Telefónica posiciónase contra as tarifas planas ilimitadas

Marcus Fernández — 2010-08-30T18:41:00Z

Durante unha intervención durante o XXIV Encontro das Telecomunicacións na Universidade Menéndez Pelayo de Santander o conselleiro delegado de Telefónica, Julio Linares, realizou unhas polémicas declaracións ao asegurar que o crecemento do tráfico de datos e o «desacoplamento» entre os custos da rede e os ingresos das operadoras podería «quebrar o actual modelo» imperante na industria das telecomunicacións, o que pode entenderse como a fin das tarifas planas (o que parece ser a postura oficial de Telefónica), de xeito que os usuarios que fan un maior uso da Rede tamén deberían pagar máis. Linares aposta por ofrecer diferentes calidades aos diferentes clientes en función das súas necesidades, o que parece reabrir o debate sobre a neutralidade de rede que tan de actualidade está nos EE.UU., aínda que non parece razoable pór en dúbida o modelo actual por mor do crecemento do consumo multimedia a través da Rede, pois iso o que indica principalmente é unha evolución positiva do sector, o que ten máis de positivo que de negativo (de xeito que se algunha compañía non ve rendible as tarifas planas de datos sempre podería eliminalas da súa oferta de servizos ou reducir as súas prestacións).
Pese a cuestionar o modelo existente, Linares non dubidou en describir que na evolución das conexións á Rede «a primeira vaga de crecemento foi a dos fogares, onde parece che chegouse á saturación; a segunda veu da man dos individuos e os móbiles, e chegarán unha terceira vaga, a dos dispositivos e as máquinas, cunha dimensión moito maior que a anterior». Tamén engadiu que para as compañías de telecomunicacións a voz pertence ao pasado, os datos son o presente e o vídeo é o futuro, destacando que nesta industria cada vez será máis difícil separa o mundo das aplicacións das comunicacións.

Toshiba Folio 100, novo tablet con Android 2.2

Marcus Fernández — 2010-08-30T16:33:00Z


Unha das imaxes do novo tablet de Toshiba filtrada a través da web

Que Toshiba estaba a preparar un tablet non era ningún segredo, pero agora as filtracións sobre tal dispositivo son moi concretas, coñecéndose que terá coma nome Toshiba Folio 10 e que será un trebello con pantalla de 10,1 polgadas cunha resolución de 1.024 x 600 píxeles, 16 Gb de almacenamento SSD ampliable mediante tarxetas SDHC e MMC, Wi-Fi N, Bluetooth, 3G, saída HDMI, USB 2.0, mini USB, conector para auriculares, cámara de 1,3 Mpíxeles, batería de 1.020 mAh (que promete ata 7 horas de autonomía) e o sistema operativo Android 2.2.
Destaca o feito de estar baseado en tecnoloxía nVIDIA Tegra 2 (xunto cun procesador ARM Cortex A9 de dobre núcleo) e por permitir o acceso a aplicacións do seu fabricante a través do Toshiba Marketplace, así coma o feito de integrar unha versión do navegador web Opera Mobile e unha aplicación de lectura de e-books. As súas dimensións serán de 281 x 181 x 14 milímetros, pesará 760 gramos e poderá verse durante a feira IFA que terá lugar os vindeiros días.

O IGAPE facilitou a constitución telemática de 900 empresas galegas

Raquel Noya — 2010-08-30T11:21:01Z

O Instituto Galego de Promoción Económica (IGAPE), dependente da Consellaría de Economía e Industria, vén de facer reconto do que dou de sí a rede de Puntos de Asesoramento e Inicio de Tramitación (PAIT) dende a súa posta en funcionamento, e os resultados semellan ser moi positivos posto que facilitou a tramitación para a constitución de 900 novas sociedades mediante o sistema telemático, situándo a nosa comunidade autónoma na segunda de España por número de empresas creadas por esta vía, só por detrás da de Madrid, onde se puxo en marcha antes.
Este sistema, que está baseado nas novas tecnoloxías, incorpora a figura xurídica Sociedade Limitada Nova Empresa (SLNE), especialmente orientada aos impulsores de novas iniciativas empresariais e en Galicia está a ser moi requirida desde o comezo. O sistema de tramitación telemática xa está estendido tamén ás sociedades de responsabilidade limitada (SRL), e basicamente axiliza o proceso de constitución de novas empresas, ao tempo que evita moitos trámites burocráticos aos emprendedores.
Deste xeito, desde o momento en que os promotores acoden ao notario (única xestión presencial xunto coa realizada no PAIT do Igape) ata quedaren constituídas as súas empresas pasan por termo medio, segundo informan dende o IGAPE, “só 1,38 días hábiles, no caso das empresas constituídas como SLNE” mentres que a media no conxunto das comunidades do Estado onde está implantado o sistema é de 3,6 días.
Achegar aos novos empresarios a información detallada sobre as posibilidades e beneficios que aporta a SLNE para os emprendedores e, ao mesmo tempo, facilitar a constitución de novas empresas abeiradas a esta fórmula xurídica, son os obxectivos dos 7 Puntos de Asesoramento e Inicio de Tramitación (PAIT) abertos para Galicia polo Igape.
Segundo informan dende o IGAPE, os PAIT dispoñibles nas oficinas que ten o Instituto nas diferentes cidades galegas (A Coruña, Ferrol, Lugo, Santiago, Ourense, Pontevedra e Vigo) “permiten ós emprendedores que impulsen proxectos empresariais de pequena dimensión crear as súas empresas de maneira áxil, con apoio e asesoramento directos e con plenas garantías xurídicas”.
Desde que se ampliou a tramitación telemática para facilitar igualmente a constitución de forma áxil das Sociedades de responsabilidade limitada convencionais (SRL), os PAIT do Igape sumáronse á iniciativa. A constitución de SRL por este sistema baseado nas TIC require en Galicia, por termo medio, un prazo de 7,84 días, fronte a unha media que para o conxunto de España é de 11,7 días.
Os PAIT do Igape informan, orientan e prestan servizos ós emprendedores tanto na definición e tramitación administrativa das súas iniciativas empresariais como sobre as distintas axudas públicas ás que poida acollerse o proxecto. A través do espazo sobre SLNE da web do Igape, os emprendedores poden atopar información detallada sobre os pasos a seguir para a creación dunha empresa por esta vía, así como acceder a todas as ferramentas interactivas que están ó seu dispor, con ligazóns a webs do Ministerio de Industria, da Axencia Tributaria ou da Seguridade Social.

TIC TAC Galicia mellora o acceso á Rede das persoas con discapacidade

Raquel Noya — 2010-08-30T10:28:04Z

Co principal obxectivo de mellorar o acceso ás TIC das persoas que teñen algún tipo de discapacidade no noso país, o Executivo galego vén de asinar un convenio de colaboración para o desenvolvemento do programa TIC TAC Galicia, a través do cal pretende reforzar con novo equipamento tecnolóxico os centros públicos de toda a Comunidade.
O acordo asinado co Ministerio de Industria, Turismo e Comercio contempla, entre outras cousas, levar ordenadores de sobremesa e portátiles adaptados a un total de 149 centros públicos de acceso a Internet (como bibliotecas públicas, hospitais, telecentros ou aulas de formación de todo o país) a fin de que as persoas con algún tipo de discapacidade visual, auditiva, cognitiva ou motora poidan acceder á Rede coa mesma facilidade que o fai o resto da sociedade.
Asemade, o acordo inclúe dotar de lectores de DNI electrónicos os devanditos centros, así como a celebración de xornadas de capacitación para que tanto o persoal responsable dos centros como as persoas usuarias coñezan o uso axeitado destes equipos.
"Con este novo equipamento”, en palabras da secretaria xeral de Modernización e Innovación da Xunta, Mar Pereira, “os nosos centros estarán preparados para dar servizo aos cidadáns e para facilitar o acceso a sociedade da información a persoas con distintas discapacidades físicas ou sensoriais”.
Para deseñar o equipo informático e os dispositivos TIC adaptados, Red.es traballou conxuntamente co Centro Estatal de Autonomía Persoal e Axudas Técnicas (CEAPAT), dependente do Imserso. Este equipamento, que permite facer uso dun PC ao 60/70 por cento das persoas con algún tipo de discapacidade, combina software específico e elementos periféricos. Dende ratos alternativos de bola xigante e conmutadores, que facilitan o manexo para usuarios con dificultades motoras, ata controladores do ordenador sen mans, que permiten manexalo cun sinxelo movemento do queixo ou a cabeza. Tamén inclúe teclados con teclas de gran tamaño para facilitar a súa pulsación, recomendado para persoas con problemas de mobilidade e/ou visión; pantallas táctiles, que se activan por contacto coa pel e mediante instrucións acústicas, e brazos articuladores para facilitar a suxeición destes dispositivos.