Código Cero - Diario Tecnolóxico de Galicia

O Concello de Mugardos doará computadores rehabilitados con sofware libre

Fernando Sarasqueta — 2010-09-10T12:15:00Z


Fachada do consistorio de Mugardos, á dereita

Unha vez máis, toca falar do Día da Liberdade do Software (ou Día do Software Libre), a celebrar en todo o mundo (a nosa terra incluída) o vindeiro 18 de setembro, sendo a vila de Mugardos un dos espazos máis significativos de conmemoración. Pois ben, se os días pasados falamos dende Código Cero das actividades previstas por Zulo e GALPon na devandita cita da vila ferrolá, agora toca falar do papel despregado polas Concellarías de Promoción Económica e da Mocidade, que xunto con Zulo pretende representar polo miúdo as moitas vantaxes que a programación aberta e a substentabilidade informática que aquela chega teñen para o eido das administracións locais e o asociacionismo, máis polo miúdo en termos de aforro e eficacia. Máis en detalle, os devanditos departamentos do Concello apostarán pola revalorización e o reemprego útil de equipos tecnolóxicos dándolle unha nova vida aos computadores das instalacións municipais, instalando neles aplicacións informáticas libres e de código aberto.
Logo de conseguir que estes aparellos sexan cen por cen funcionais, informan, serán doados a colectivos e entidades sociais ligadas ao concello. Amais disto, a celebración do 18 de setembro, que comeza ás 11.00 horas, acollerá a presentación da distrución GALPon MiniNo Alguadaira (paquete informático que inclúe un sistema operativo e un completo conxunto de aplicacións plenamente funcional en ordenadores con poucos recursos).

Trasno achega unha pormenorizada tradución ao galego do novo Inkscape

Fernando Sarasqueta — 2010-09-10T10:15:00Z

Malia a baixada de actividade do centro Mancomun.org, a comunidade galega de usuarios e deseñadores de software libre segue adiante no seu labor de creación de novas ferramentas abertas e na adaptación ao galego de outras xa existentes. Nesta liña de continuidade é onde se insire precisamente o proxecto e asociación Trasno, colectivo de voluntarios que se dedica entre outras cousas a localizar software libre á nosa lingua. Un exemplo salientábel e recente disto é o traballo despregado coa versión 0.48 de Inkscape, programa de debuxo vectorial que Trasno puxo a disposición da comunidade a finais do pasado mes de agosto.
A adaptación ao galego, mantida por Leandro Regueiro, incorpora melloras de todo tipo, “tanto en calidade como en cantidade, xa que se revisaron tódalas traducións e se localizaron moitos textos, co que agora o nivel é maior do 75% e superando a linguas como o portugués ou o romanés”, informan dende Trasno.
Amais disto, tamén está completada a adaptación ao noso idioma de algúns dos titoriais que incorpora o programa, polo que a día de hoxe xa é moito máis doado o emprego completo desta ferramenta para os usuarios galegofalantes. Sinalar a maiores que o desenvolvemento desta nova versión, para a que foron precisos noves meses de traballo, significou a incorporación de todo tipo de correccións, ferramentas novas e extensións para desenvolvedores web. Por certo que está a disposición de quen queira vela a listaxe de estatísticas de tradución de Inkscape.

A celebración en Mugardos do Dia do Software Libre inclúe a presentación do novo Galpon MiniNo

Fernando Sarasqueta — 2010-09-09T12:20:00Z

Volvemos falar do Día Internacional do Software Libre (coñecido tamén como Día da Liberdade do Software) e de novo diriximos a ollada cara a Mugardos, con motivo desta xornada o centro de operacións da comunidade galega de usuarios e deseñadores da programación aberta. Pois ben, se daquela informamos das actividades previstas polo colectivo Zulo co evento Kernel 2010, a desenvolver na Casa de Cultura de Mugardos, agora toca falar polo miúdo dun dos grandes protagonistas da xuntanza, a nova versión de Galpon MiniNo, que será presentado en tódolos seus detalles polo Grupo de Amigos Linux de Pontevedra (GALPon). A actividade, que dará comezo o sábado 18 ás 11.00 horas, servirá polo tanto para dar conta dos traballos despregados polo dito colectivo ao longo deste ano e co obxectivo de mellorar na medida do posible o dito programa, un sistema operativo libre, con nome en clave Alguadaira, baseado en Debian Lenny.
A nova versión de Galpon MiniNo, da que podemos obter na Rede todo tipo de datos, inclúe ducias de aplicativos seleccionados a conciencia para tirarlle o máximo partido aos nosos vellos ordenadores, informan os responsables do seu desenvolvemento. Esta nova mellora, engaden, presenta un aspecto renovado, moitísimas melloras e utilidades e, como sempre, “un especial coidado na tradución de todos os programas, nesta ocasión temos practicamente ao 100% o galego, o español e o inglés”. Os traballos sobre este sistema, como é de agardar tratándose de software libre, están abertos á participación. Para comezar, xa podemos deixar todo tipo de comentarios, dúbidas, problemas ou suxestións na listaxe habilitada especificamente no Google Groups.

O colectivo O Zulo celebra en Mugardos o Día Mundial do Software Libre

Fernando Sarasqueta — 2010-09-07T13:18:04Z


Evaristo, Alberto e Pablo (membros de O Zulo) na edición de 2004

Xa vai quedando menos para o Día Mundial do Software Libre, que este ano se celebra o vindeiro 18 de setembro e que coma en anteriores edicións vai dirixido a pór de relevo a importancia de favorecer o acceso ás novas tecnoloxías da información, a tódolos niveis, mediante recursos máis económicos e adaptables, os propios do software libre. Tras esta celebración atópase un ano máis unha entidade internacional sen arela de lucro, Sofware Freedom Day, que entre os seus obxectivos inclúe o de acadar o máximo seguemento e participación posible a nivel internacional. Na nosa terra, precisamente, o Día Mundial do Software Libre estará apoiado por un bo número de usuarios, entre os que se inclúen os da Asociación Comunidade O Zulo (ACOZ), que por segundo ano concorre como equipa na celebración organizando unha serie de actividades ombro con ombro co Concello de Mugardos.
Estas accións forman parte do Ciberencontro Kernel 2010, que as devanditas entidades teñen programado desenvolver o devandito 18 de setembro na Casa da Cultura da dita vila da comarca ferrolá.
Segundo fai saber O Zulo, o programa oficial de presentacións, que dá comezo ás11:00 horas, fica deste xeito:
· Presentación oficial da distribución do sistema operativo para computadores con pocos recursos, GALPon MiniNo 1.2. Desenvolvida polo Grupo de Amigos de Linux de Pontevedra (GALPon). A súa potencialidade e prestacións.
· Obradoiro de instalación de GALPon MiniNo en computadores antigos, procedentes da renovación de equipos do Concello de Mugardos e que finalmente doará o Concello a asociacións e entidades sen arela de lucro.
· Foro – debate O FOSS, software e cultura libre na sociedade do século XXI , coa participación de representantes dos GULs (Grupo de usuarios de linux e software libre) de Galicia. Este evento de gran transcendencia na sociedade da cultura e información libre, e será transmitido vía web.

O AutoCAD volverá a Mac tras 18 anos de ausencia

Marcus Fernández — 2010-08-31T20:52:00Z

Dentro do mundo do software comercial as aplicacións de referencia, especialmente no que a vendas se refire, son o Microsoft Office e o Adobe Photoshop, seguidas pola ferramenta de deseño AutoCAD, que leva 18 anos afastada do mundo do Mac, o que finalmente van arranxar co lanzamento do AutoCAD 2011 para Mac OS X, de xeito que os arquitectos e enxeñeiros poderán empregar ordenadores de Apple sen ter que instalar Windows ou emular tal plataforma de software, coas conseguintes vantaxes para a súa produtividade.
A nova aplicación chegará cunha interface semellante á do Final Cut Pro, permitirá abrir documentos DWG e contará coa meirande parte de características propias do AutoCAD para Windows, aínda que a cousa non quedará aí, senón que tamén van publicar un visor de documentos DWG para dispositivos con iOS, o que facilitará tamén a anotación e unha edición básica, de xeito que os profesionais poderán levar os seus traballos nun iPad para poder consultalos en mobilidade.

Modernización achegará 30.000 euros a AGASOL para o fomento do software libre na PEME galega

Redacción — 2010-08-17T10:41:09Z

A Secretaría Xeral de Modernización e Innovación Tecnolóxica achegará a Asociación de Empresas Galegas de Software Libre (AGASOL) 30.000 euros para a realización de actuacións orientadas a promover un maior uso do software libre e de fontes abertas (FLOSS) entre as PEME, micro PEME e autónomos galegos.
Grazas ao convenio de colaboración subscrito entre ambas as dúas partes, AGASOL desenvolverá tres liñas de actuación para a promoción do software libre na contorna empresarial galega creando un catálogo de servizos integrais paras as PEME, organizando xornadas de promoción do FLOSS e a traducindo ao galego a ferramenta de comercio electrónico Magento.
AGASOL creará un Catálogo de Servizos Integrais para as PEME co obxectivo de que as pequenas e medianas empresas galegas poidan coñecer, dun xeito moi gráfico e visual as diferentes ferramentas TIC baseadas en software libre que existen hoxe en día e que poden facilitar os seus procedementos de xestión, funcionamento e difusión da súa actividade.
O acordo contempla tamén a organización dunhas Xornadas de Promoción de Software Libre para PEME, nas que se informará sobre aqueles produtos e casos de éxito de utilización do FLOSS en pequenas e medianas empresas que contribuíron á mellora da produtividade a través da utilización desta tecnoloxía.
Outra liña de actuación é a tradución ao galego da solución de comercio electrónico Magento, unha ferramenta FLOSS que proporciona un aspecto gráfico actual e vistoso ademais dunha xestión e mantemento doados para aquelas empresas que desexen levar á Internet o seu catálogo comercial.

A galega Tagen Ata ceiba unha boa parte dos seus recursos na súa nova web

Fernando Sarasqueta — 2010-08-02T09:48:51Z

A información que xera e move unha empresa constitúe, despois do equipo humano, un dos seus máis grandes valores. Porén, hai certa tendencia a pensar que canto mellor se protexe esa información, máis vale. Dun tempo a esta parte, e en boa medida grazas a cousas como o software libre, asistimos á constatación de que á riqueza tamén vén da man do intercambio e a liberalización dese coñecemento. Os obxectivos disto pasan por permitir que a comunidade internauta use, mellore e adapte o que lle damos, beneficio que para moitas empresas non ten comparanza. Nesta liña de apertura é onde se insire a empresa galega Tagen Ata, que vén de abrir unha nova andaina de mercado. Esta figura xa visible e resumida na súa nova web, un recurso encamiñado a establecer a máxima comunicación coa sociedade, o alumnado da propia empresa (pois se trata dunha firma especializada na formación apoiada nas novas tecnoloxías), os clientes e os colaboradores.
En definitiva, a páxina constitúe a liberación dos froitos de máis de oito anos de traballo de Tagen Ata, como se pode apreciar en Materiais para compartir, a sección estrela para o intercambio de recursos, habilitada con servizos sobre lingua, novas tecnoloxías dixitais, igualdade ou ensinanza. A sección é ben variada, e nos catro apartados nos que se ofrece podemos atopar (baixo a ligazón común da aprendizaxe e a nosa lingua) contidos como un léxico empresarial (ideal para pornos ao tanto das novas tendencias en comunicación corporativa) ou unha introdución ao emprego básico do software libre. Segundo reflicte o dito medio galego, outro dos grandes obxectivos da nova proposta é impulsar a oferta formativa da páxina que sairá en setembro da man de Tagen Ata, www.formacionenrede.com, amais da aula equipada con todo tipo de material informático coa que se quere dar axeitado complemento ao que se ofrece en liña.

A Guadec Hispana da Coruña chega ao seu remate con relatorios de CENATIC, Igalia ou GPUL

Fernando Sarasqueta — 2010-07-23T11:16:44Z


Asistentes ao congreso fotografados por Alberto García

A edición galega da Guadec Hispana chega hoxe pola tarde á súa fin cun acto de clausura que reunirá no salón de actos da Facultade de Informática da Coruña aos presidentes de GNOME-Hispano e GPUL, José Ángel Díaz e Francisco Javier Tsao, respectivamente. O congreso, que dende este xoves está a reunir na devandita Universidade galega a preto de cen especialistas en programación aberta procedentes dos eidos español e luso falante, desenvólvese a través dunha completa serie de relatorios, exposicións e mesas redondas acerca do presente e o futuro do proxecto GNOME, un proxecto colectivo que promove a universalización dun escritorio útil e accesbile a través do software libre. Previamente ao acto de clausura, que se celebra ás 20.00 e que contará coa presenza do decano de Informática (Alberto Valderruten), está previsto que se presenten traballos innovadores despregados por varias empresas ligadas á programación aberta.
Como a galega Igalia (representada no evento por Alejandro Piñeiro, quen falará de cómo pode empregarse GNOME para mellorar a accesibilidade ás TIC das persoas con diversidade funcional), OpenShine (representada por Roberto Majadas) ou Lanedo (Carlos Garnacho). Asemade, o evento tamén dará acubillo a un relatorio impartido polo coordinador tecnolóxico da Fundación CENATIC (entidade do Goberno para a promoción do código aberto), José Ángel Díaz, co-responsable entre outros proxectos da iniciativa de alfabetización tecnolóxica de Estremadura ao abeiro do proxecto Linex.

Máis dun centenar de especialistas en GNOME participan na edición galega da Guadec Hispana

Fernando Sarasqueta — 2010-07-22T11:05:08Z


Unha ollada ás actividades de hoxe, achegada por Alberto García

A nova edición da Guadec Hispana, a sétima, vén de abrir hoxe mesmo as súas portas na Coruña. A xuntanza, que como xa dixemos onte nesta páxina dará acubillo a debates e relatorios arredor da programación aberta (máis polo miúdo arredor de GNOME), conta dende primeira hora da mañá coa presenza de importantes representantes do eido do software libre, como or exemplo Germán Poo, director da Fundación GNOME, José Ángel Díaz, responsable da Fundación CENATIC, Alberto Couto, técnico da Secretaría Xeral de Modernización, ou Alberto Valderruten, decano da Facultade de Informática da Coruña (sede do congreso).
Esta nova edición de Guadec Hispana, espazo de encontros para as comunidades de usuarios e deseñadores de software libre de España e América Latina, xira coma vén sendo habitual arredor dun eixe temático concreto: GNOME, un proxecto colectivo de programación aberta que impulsa e crea o emprazamento preciso para un interfaz de escritorio doado, útil, accesible e de balde para millóns de usuarios de todo o mundo.
Arestora, estase a dar acubillo na Facultade de Informática a máis de 100 asistentes, participando en 20 relatorios e obradoiros sobre cuestións que van do xenérico ao específico (dispositivos móbiles multitáctiles, adquisición de fotografías a partir de cámaras ou xeolocalización).
O encontro, que se celebra até mañá día 23, está organizado por GPUL e GNOME Hispano, en colaboración coa Universidade da Coruña, a dita Facultade, Igalia, CENATIC, OpenShinecon, Ghandalf e a Secretaría de Modernización da Xunta de Galicia a través de Mancomún e a Fundación para o Fomento da Calidade.

O software libre español viaxa ao OSCON 2010 da man de CENATIC

Raquel Noya — 2010-07-22T10:08:19Z

CENATIC, o Centro Nacional de Referencia de Aplicación das TIC baseadas en fontes abertas, está a participar en Portland (Oregón) nun dos principais eventos no mundo relacionado co software libre e as tecnoloxías abertas, a O''Reilly Open Source Convention 2010 (OSCON), que este ano conta coa presenza de máis de 2.500 profesionais desta tecnoloxía.
Polo seu formato, trátase da única conferencia no mundo na que é posible interactuar con todo tipo de desenvolvedores, activistas, membros da comunidade, directores de tecnoloxía e líderes dos máis imprtantes proxectos de software libre a nivel mundial, tanto públicos como empresariais, todos eles “interesados en construir coñecemento en comunidade e aproveitar o potencial da innovación colaborativa”.
Manuel Velardo, director de Proxectos e Servizos de CENATIC, que se achegou persoalmente ata a OSCON 2010 para dar conta dos proxectos levados a cabo por esta entidade en España, asegura que se trata do evento “que congrega máis coñecemento no mundo en canto a open goverment, comunidades de desenvolvemento e casos de éxito de colaboración entre administracións públicas, empresas e comunidades”.
Asemade, engade, por este motivo, esta feira “é o lugar ideal para ofrecer a visión do que se está a facer en España, e sometela a debate cos principais expertos mundiais en software libre, aprendendo deles e construíndo ponte de colaboración”.
Velardo asegura que “debido á súa posición central no ecosistema do software libre español, CENATIC pode atraer boas prácticas de Estados Unidos e confrontalas cos modelos do sector en España en forma de proxectos conxuntos e modelos de relación válidos, que por lóxica, precisan ser adaptados á nosa realidade tecnolóxica, política e económica”.