Código Cero - Diario Tecnolóxico de Galicia

Máis de 18 millóns de españois xa teñen o DNI electrónico

Raquel Noya — 2010-09-10T15:40:00Z

O Goberno español, que nos últimos anos veu facendo unha forte aposta por integrar as TIC no día a día de toda a cidadanía, vén de recoller os froitos da colleita ao comprobar que xa leva expedidos un total de 18 millóns de documentos de identidade electrónicos, que facilitarán as relacións en liña da administración con todas as persoas que o posúan. Os datos foron facilitados pola secretaria de Estado de Función Pública, Consuelo Rumí, quen destacou a “firme aposta” do executivo pola Administración Electrónica. Rumi explicou a aposta do Goberno polas novas tecnoloxías “como unha nova maneira de relacionarse coa cidadanía” e de facer a Administración “máis accesible e menos custosa”; coa expedición dos DNIe, 18 millóns de cidadáns e cidadás teñen xa a súa propia “personalidade electrónica”, asegurou. Rumí participou nunha sesión co título A participación dos cidadáns na era do Goberno electrónico: Educación para a Cidadanía e Inclusión Dixital, e nela indicou que hoxe en día a Administración Xeral do Estado permite iniciar calquera trámite ou xestión en soporte electrónico, e que practicamente o cen por cento do volume das tramitacións pode levarse a cabo electronicamente.
Non obstante, admitiu que agora está por afrontar o reto de que os cidadáns coñezan estes servizos e os utilicen, de maneira que é necesario difundir a existencia dunha canle que está aberta 24 horas ao día os 365 días do ano.

O uso de software ilegal sáelle caro ás empresas españolas

Raquel Noya — 2010-09-10T12:55:00Z

Business Software Alliance (BSA), a asociación que vela pola defensa dos dereitos de propiedade intelectual na industria do software en todo o mundo, vén de facer reconto do que lle custa ás empresas españolas usar software ilegal no canto de software baixo licenza e as cifras acadadas ascenderonada menos que a 76.271 euros só no primeiro semestre de 2010.
Isto significa que entre indemnizacións por perxuízos e regularizacións, o custe medio por cada ordenador intervido supuxo para as empresas españolas preto de 5.000 euros, en concreto 4.950 euros.
En total foron 92 os ordenadores intervidos con software pirata nos 6 rexistros realizados no primeiro semestre de 2010 e das 231 denuncias recibidas, a asociación levou a cabo un total de 153 accións legais contra empresas, distribuidores e entidades que vulneraron os dereitos de autor de software.
Como consecuencia destas accións, as compañías españolas implicadas tiveron que facer fronte a un total de 457.624 euros en custes, un 7,7 por cento máis que no mesmo periodo do ano anterior.
O custe total obtense da suma do valor das indemnizacións por perxuízos polo software pirata detectado, que ascendeu a 257.659 euros, e os 199.965 euros por regularizacións por adquisición de software legal para substituir ao ilegal intervido e poder continuar así coa actividade da empresa, e sen incluir os custes dos procesos xudiciais.
Segundo afirma Luis Frutos, o presidente do comité español de BSA, “estas cifras poñen de manifesto o caro que lle pode sair a unha empresa o emprego de software fraudulento, xa que empurradas polo suposto aforro, arríscanse adquirindo software sen licenza”. “Lonxe de aforrar”, engade, “o resultado de empregar software sen licenza pode supoñer unha importante perda económica, sen contar os riscos engadidos para a operatividade, a competitividade e a reputación da empresa”.
Xa que logo, e co obxectivo de tentar cambiar esta falsa percepción “tan arraigada en España”, dende BSA levarán a cabo, ao longo deste ano, varias campañas de sensibilización dirixidas ás pequenas e medianas empresas, centradas en mostrar de maneira clara os riscos aos que se enfrontan as mesmas se deciden empregar software sen licenza, asi como os beneficios que reporta o uso de software propietario.

The NY Times confirma que deixará a impresión en papel para centrarse nun modelo de cobro na Rede

Fernando Sarasqueta — 2010-09-10T11:21:03Z

The New York Times vén de confirmar o que xa se sospeitaba dende hai tempo: que cesará a impresión en papel para centrarse na comunicación en liña, coa particularidade de que vai ser de pago (cousa curiosa, tendo en conta o mal que teñen funcionado estas experiencias, polo menos no caso español). O proceso de transformación do senlleiro medio estadounidense cara ao universo dixital non é un caso illado, e na nosa terra, por desgraza para os que malia estar na Rede queremos que siga habendo unha oferta en papel plural e variada, temos algún exemplo recente disto. O dito proceso, que aínda non ten data definitiva, forma parte dunha remodelación mesma dos conceptos mesmos do xornalismo tradicional, en crise dende hai anos pola falta de vendas e de achegas publicitarias.
Con todo, o realmente novo non é o modelo de pago que vai adoptar na Rede a partir de 2011 (cousa que xa se sabía, ao igual que o feito de que se van seguir mantendo certas seccións de balde), senón o anuncio do esmorecemento da edición en papel. Este anuncio foi dado por Arthur Sulzberger Jr (presidente do medio) durante o Cumio Internacional de Novas WAN-IFRA que se celebrou en Londres. Entre outras moitas cousas, Sulzberger Jr confirmou que o xornal tiña asinado un pacto con Google para dar corpo ao First Click Free e asegurar que NYTimes.com seguise “formando parte do ecosistema Web aberto”. As cousas, porén, pintan diferentes, e xa se inclúe na visión de futuro do xornal unha vontade máis clara de negocio e de privacidade.

EGANET inicia hoxe un obradoiro para empresas TIC

Raquel Noya — 2010-09-10T10:23:02Z

A Asociación de Empresas Galegas Adicadas a Internet e ás Novas Tecnoloxías (EGANET), en colaboración con BIC GALICIA, organismo pertencente á Consellería de Economía e Industria, vén de inaugurar, esta mesma mañá, o Obradoiro de Dirección Estratéxica Empresarial, dirixido específicamente a formar a directivos e directivas de empresas de novas tecnoloxías da información e a comunicación instaladas noso país.
O taller, que dou comezo ás 10:00 horas desta mesma mañá, impártirase en Santiago de Compostela tódolos venres ata o vindeiro día 8 de outubro, en horario de 10:00 a 14:00 e de 16:00 a 20:00 horas.
Este obradoiro, segundo palabras do presidente de EGANET, Víctor López, “responde ás necesidades formativas do sector galego das TIC, caracterizado pola súa xuventude e composto por empresas tecnolóxicas de pequeno e mediano tamaño, con perfís profesionais moi técnicos e de alta cualificación pero pouco familiarizados coas tarefas básicas de administración e dirección de empresas”.
Porén, para ampliar os seus coñecementos en procesos de dirección e comercialización empresarial, algo que nunca vén de máis en calquera tipo de empresa e menos se se trata de entidades do sector TIC, un total de 32 asistentes, procedentes de empresas asociadas a EGANET mellorarán as súas capacidades de dirección no devandito obradoiro que se desenvolverá no Edificio Cersia, en San Lázaro.
O programa formativo inclúe 40 horas de formación especializada nas cinco áreas de xestión da empresa: Dirección Estratéxica; Dirección de Marketing e Comercial; Dirección de Operacións; Dirección de Control e Xestión; e Dirección e Xestión dos Recursos Humanos. Os talleres formativos complétanse cunha etapa de mentorización empresarial de seis horas de duración na que o alumnado toma contacto cun mentor con experiencia no mundo da empresa, así como cunha xornada de negocios na que, durante unha fin de semana, se intercambiarán experiencias con outros empresarios, se darán a coñecer as empresas e os seus produtos e/ou servizos, poranse en práctica os coñecementos e pautas establecidas na formación previa e ampliarase a rede de contactos dos participantes.

Twitter promove unha campaña que loita contra o analfabetismo

Raquel Noya — 2010-09-10T10:13:20Z

Co gallo do Día Internacional da Alfabetización, que paradoxicamente celébrase hoxe, cando milleiros de nenos e nenas no noso país retoman a súa actividade diaria nas aulas, os usuarios e usuarias de Twitter están a copiar e distribuir entre os seus contactos unha peculiar mensaxe para concienciar ao mundo sobre o analfabetismo.
Esta mensaxe, lanzada pola ONG Room to Read en colaboración coa propia rede social, está escrita aparentemente sen sentido para que cada internauta, ao ler ese tweet, se sinta como un máis dos 776 millóns de persoas no mundo que non poden ler ou escribir, e colabore dalgunha maneira para axudar a esa xente a sair da súa situación.
Twitter e Room to Read publicaron para a causa unha páxina web, á que se accede premendo na ligazón que segue a ese tweet (que por certo está en inglés), e onde se pode ler a versión correta da mensaxe, que traducida ao español di o seguinte: “cando non podes ler, 140 caracteres non significan nada”, expoñendo a continuación varias formas de axudar para acabar co analfabetismo.
Esta ONG, que dende a súa creación ten construído máis de 10.000 bibliotecas, e publicado preto de 500 libros para repartir de balde entre os nenos e nenas de todo o mundo, vai dar por rematada esta comprometida campaña a prol da alfabetización co lanzamento do novo viño de Twitter que a rede social lle encargou á bodega Crushpad.
Estes viños, un Pino Noir e un Chardonnay, serán vendidos a beneficio dos programas de alfabetización da organización Room to Read na India e ademais de contar co apoio de Twitter, a campaña será extendida a outras redes sociais como Facebook.

Apple flexibiliza a súa política de aceptación de aplicacións para os seus dispositivos móbiles

Marcus Fernández — 2010-09-09T20:49:33Z

Os desenvolvedores que queiran realizar aplicacións para terminais móbiles de Apple coma o iPod ou o iPad agradecerán que a compañía flexibilizase as súas directrices para a creación de aplicacións e as dotase de certa transparencia, de xeito que pretenden deixar de lado a sona de arbitrariedade que ten a política de aprobación de aplicacións por parte da empresa de Cupertino.
Unha das principais restricións que elimina Apple é a utilización de ferramentas de desenvolvemento de aplicacións para iOS, o que facilitará a creación de software para esta plataforma, pois abrirase a porta a múltiples asistentes para desenvolver dende aplicacións sinxelas ata videoxogos. Aínda que Apple continúa a estar contra a tecnoloxía Adobe Flash (existindo a posibilidade de que o empaquetador de Flash en aplicacións nativas para o iPhone sexa realidade no futuro), agora abre os seus dispositivos a moitas outras tecnoloxías que facilitan o desenvolvemento de aplicacións.
No tocante á transparencia no proceso de aprobación de aplicacións crean un App Review Board, ao que poderán presentarse alegacións tras o rexeitamento dunha aplicación, para que os programadores poidan defenderse ante posibles malentendidos ou simplemente para coñecer o porqué da decisión de Apple.

Os analistas prevén un forte investimento en servizos de xeolocalización

Fernando Sarasqueta — 2010-09-09T17:50:00Z

Hai unha conexión evidente, e á vista está, entre Internet e as redes sociais, a tecnoloxía de localización por vía satélite, os nosos aparellos portátiles e máis os elementos tradicionais polos que se determina a posición xeográfica de calquera cousa. Esta potencialidade, unida á nosa tendencia a saber por onde andamos ou andan os outros, fai que xa case non se explique nada sen xeolocalizado. En xogo está, entre outras cousas, poder chegar a un acto de prensa, a un monumento ou a unha cita calquera nas mellores condicións de exactitude e de saúde. A cousa vai a máis, segundo contan empresas como a consultora ABI Research, que vén de publicar un informe sobre a posibilidade de medre en investimentos que se prevé reciban os servizos de xeolocalización: unha posibilidade moi elevada.
Segundo se desprende do estudo, reflectido estes días por La vida Wi-Fi, a promoción baseada nos ditos servizos pasará dunha facturación de 43 millóns de dólares (os xerados este ano) a unha de 1.800 para 2015. No estudo tamén se explica cales foron as iniciativas que máis éxito acadaron ao longo dos últimos anos, precisamente aquelas que tiveron a capacidade de tirar partido das vantaxes do GPS, as redes Wi-Fi e a telefonía móbil, todo isto en función do produto, país concreto, público ou precisión do emprazamento xeográfico requirido. Este é o caso de servizos de balde como FourSquare ou Facebook Places, por poñer uns exemplos.

A unificación de contratos en licenzas de software de Microsoft suporá un aforro do 37% para a Xunta

Redacción — 2010-09-09T16:58:05Z


Núñez Feijoo durante a xuntanza do Consello da Xunta de hoxe

O Consello da Xunta de Galicia autorizou hoxe o expediente de gasto correspondente á contratación para a subministración de renovación e actualización de licenzas de Microsoft para os distintos departamentos da Xunta de Galicia por un importe de 4.744.877,72 euros para o período 2010-2013.
Deste xeito, o Goberno galego, a través da Secretaría Xeral de Modernización e Innovación Tecnolóxica, unificará os contratos con Microsoft, aforrando un 37% no pagamento de licenzas a esta empresa ao diminuír o número de licenzas de Microsoft Office contratadas. Ademais, o novo modelo contractual permitirá reducir un 18% os prezos fronte á situación anterior en que cada consellería realizaba os concursos por separado.
A adopción destas medidas mellora substancialmente a situación contractual herdada con Microsoft reducindo significativamente os custos. O importe que paga actualmente a Xunta por 3 anos de licenzas de Microsoft elévase a 10,5 millóns de euros dividido en múltiples contratos. Co novo contrato o Goberno galego aboará 4,7 millóns de euros entre 2010 e 2013. Durante este período os distintos departamentos autonómicos asumirán as novas condicións contractuais a medida que conclúan os acordos aínda vixentes con Microsoft.

Software libre

A agrupación dos distintos contratos de licenzas Microsoft existentes actualmente na Xunta de Galicia permiten dar maior transparencia á contratación destas licenzas por parte das consellerías e outros organismos dependentes da Xunta de Galicia e obter mellores condicións de compra por volume de negociación e potenciar o uso de ferramentas ofimáticas de software libre, reducindo o número de licenzas de Microsoft Office.
Esta á unha das liñas de actuación que desenvolve o Plan de Acción 2010 en materia de software libre e de fontes abertas (FLOSS), da Secretaría Xeral de Modernización e Innovación Tecnolóxica dotado con 800.000 euros para este ano. O departamento autonómico puxo en marcha esta medida tras constatar a necesidade de unir esforzos aproveitando mellor os fondos públicos destinados á promoción do software libre e de fontes abertas para acadar un maior uso destas aplicacións na Administración, na cidadanía e nas empresas galegas. Con este obxectivo o plan recolle 21 accións que desenvolverá a propia Administración autonómica e outras 60 en colaboración coas asociacións de usuarios e empresas de software libre e as tres universidades.

Increméntanse os ataques de phising en Facebook

Raquel Noya — 2010-09-09T15:59:00Z

Usar a rede social con máis usuarios do mundo como é Facebook ten moitas vantaxes, tales como atopar a certos amigos da infancia que nunca volvemos a ver co paso dos anos ou manternos en contacto con moitos outros que se atopan no outro lado do hemisferio; porén tamén ten incontables inconvintes e o que máis destaca por enriba de todos eles é que é un excelente branco para hackers de todo o mundo que intentan sacar proveito de tal concentración de internautas nunha mesma web.
A proba está en que moitos usuarios desta rede social veñen denunciando nos últimos anos os ataques de hackers que suplantan a súa identidade así como ataques de phishing ou spam que saturan os seus perfís.
O laboratorio de seguridade de Panda, The Cloud Security Company, consciente de que estes ataques lonxe de extinguirse van ir a máis nos vindieros anos a medida que se perfeccionan e deseñan novos métodos, vén de facer unha descripción da técnica que máis se emprega na Rede para suplantar a identidade dos usuarios de Facebook, destacando os seguintes pasos:
Paso 1: o gancho
O gancho vén, normalmente, dende o perfil dun amigo que xa foi hackeado previamente. O usuario recibe unha mensaxe (que semella lícita e auténtica) indicando que é preciso premer na ligazón para ver algo. Na maioría dos casos, esta mensaxe é do tipo de “vídeo impactante” ou “apareces neste vídeo”, e normalmente vai persoalizdo co nome do usuario.
Paso 2: Intento de Phishing
Agora que os “cibercriminais” xa atraeron a atención do usuario, precisa o seu nome e contrasinal para iniciar a seguinte fase do ataque. A ligazón da aplicación na que fixeron click, semella exactamente igual que a páxina de entrada de Facebook, porén en realidade é unha copia aloxada noutra dirección.
Paso 3: Obter acceso total
Unha vez que o usuario premeu na ligazón e subministrou os seus datos de acceso, o suplantador xa ten pleno acceso á súa información persoal, así como dereitos para publicar información a través do seu perfil. Isto asegúralle que poderá difundir este ataque entre todos os amigos e familiares do usuario.
Despois de obter o permiso, o ataque dirixirase aos contactos da vítima e comezara de novo o proceso con novos usuarios.
Cando isto pasa, os profesionais da seguridade en liña aconsellan eliminar todos os permisos que o usuario lle dou á aplicación maliciosa, e posteriormente, cambiar o contrasinal.
Periodicamente, asemade, os especialistas recomendan cambiar o contrasinal e escoller un que non sexa doado de adiviñar.

Tuenti estrea páxinas en aberto

Marcus Fernández — 2010-09-09T15:17:00Z


Coca-Cola ten unha das páxinas dispoñibles en aberto en Tuenti

A plataforma de redes sociais española Tuenti continúa a avanzar na súa vertente comercial, e agora anuncian que o seu servizo de páxinas (que permite ter presenza en Tuenti a empresas e outras entidades que van máis aló dun individuo) dá un paso adiante permitindo a posibilidade de que as páxinas obteñan enderezos abertos á web para servizos, empresas e medios de comunicación, de xeito que ao acceder a tuenti.com/cocacola teremos o espazo de Coca-Cola en Tuenti, contido que estará dispoñible incluso para non usuarios desta plataforma (o que inclúe aos buscadores de Internet).
Esta medida simplifica o acceso aos contidos en Tuenti de empresas (coma Coca-Cola, Movistar, a UEM, HP, Sony e BlueBBVA) e medios de comunicación (El Mundo, Antena3, TeleCinco, Cuatro, El País, ABC, Marca, DiarioAS, Gaztea, RTVE, Radio3, Vanitatis, La Voz de Galicia, Canal Sur…), que irán incrementándose nos vindeiros días.

A Fundación TIC premiará as mellores propostas creativas sobre a Muralla de Lugo

Fernando Sarasqueta — 2010-09-09T13:57:00Z

A Fundación TIC en colaboración co Concello de Lugo convocou este verán o primeiro Premio de Curtas e Maquetas Musicais Lugo 10, un certame dirixido a artistas do eido galego e español co que se pretende conmemorar o décimo aniversario da Muralla como Patrimonio da Humanidade e, a maiores, o papel que xoga a cidade galega como un dos grandes centros culturais e sociais do noroeste da Península. Segundo informa nas bases do certame a entidade organizadora, as obras galardoadas serán exhibidas nas páxinas webs da Deputación de Lugo, da propia Fundación, do Concello e da iniciativa Lugo10. Amais do devandito, o concurso encamíñase a promover a creatividade e o emprego das novas tecnoloxías da información e a creación entre a mocidade, “favorecendo a súa inserción laboral”.
No capítulo de requirimentos esixidos para concorrer no certame faise saber que se admitirá só unha curtametraxe ou tema inéditos por director ou banda/agrupación, sendo o seu alicerce narrativo a dita Muralla de Lugo. As pezas deberán enviarse á Fundación TIC, ficando a convocatoria aberta até o vindeiro 30 de outubro. Polo que respecta ao xeito elixido para presentar as maquetas perante a comunidade internauta, dicir que se fará mediante unha aplicación destinada a tal efecto na web da Fundación TIC. Estes son os premios que se inclúen:
· Premio Lugo 10. Vai dirixido ao traballo que mellor resuma os valores da Muralla, dotado con agasallo institucional e 2.000 euros.
· Premio Deputación. Ao traballo que potencie máis a provincia, inclúe un agasallo e 1.500 euros.
· Premio Fundación TIC á mellor curtametraxe ou canción de autor novo, menor de 30 anos, dotado cun agasallo e 1.000 euros.

Confirmado: as mulleres falan máis… por móbil que os homes

Raquel Noya — 2010-09-09T11:40:00Z

A meirande parte dos estudos sobre lingüística que se levan feito nos últimos anos afirman que as mulleres falan moito máis que homes; unha conclusión que, sen ter que documentarse demasiado calquera persoa un pouco observadora podería ter chegado a ela; agora ben, onde non coinciden os estudos é na cantidade de conversación que xeramos cada un xa que mentres que algúns afirman que elas falan 3 veces máis que eles, outros aseguran que elas pronuncian unha media de 20.000 palabras diarias fronte ás 13.000 deles…
E se isto é así no día a día, á hora de falar por teléfono a cousa non varía demasiado: “as mulleres pasan bastante máis minutos que os homes falando por móbil”; así o vén de confirmar a última estadística de Nielsen sobre usos do móbil nos Estados Unidos, na que se asegura que elas falan por móbil un 22 por cento máis que eles.
Segundo o informe de Nielsen, as mulleres falan 856 minutos ao mes en comparación cos 667 minutos ao mes que falan eles polo móbil; e non só falan, tamén envían un 34 por cento máis de mensaxes de texto.
Nielsen revisou as facturas de 60.000 persoas durante un ano para sacar conclusións como esta, porén o estudo non queda só na diferenciación por sexos, senón que vai máis alá e recolle as tendencias do uso da voz e as mensaxes de texto a través do móbil. Segundo os datos recollidos, as tendencias son cada vez máis opostas segundo os grupos de idade e neste senso a tendencia dos grupos máis mozos a escribir e recibir SMS dispárase respecto ao de falar por teléfono.

Google axiliza as buscas na web amosando resultados instantáneos

Marcus Fernández — 2010-09-09T11:29:10Z

Nas últimas horas o buscador web de Google incorporou unha nova funcionalidade dispoñible dende os navegadores web máis modernos e que dan en chamar Google Instant en referencia a que realiza o que consideran que son buscas instantáneas, no que vén a ser a eliminación da necesidade de premer o botón de busca para amosar resultados sobre as consultas que tecleamos, apoiándose incluso nos motor preditivo que incorpora a barra de busca, percibindo o usuario que Google adiántase ás súas necesidades axilizando as buscas no caso de gozar dunha acceso á Internet de banda larga.
Os xermolo de Google Instant baséase en 3 piares: os resultados dinámicos (segundo o usuario teclea van amosándose resultados relativos ao que queremos atopar), as predicións (o sistema adiántase ao que quere teclear o usuario baseándose en consultas previas doutros usuarios) e o desprazamento (ao moverse entre as distintas suxestións de busca aparecerán instantaneamente os resultados relativos ás mesmas).
Para facer funcionar este potente sistema o buscador aproveita as posibilidades dos navegadores web actuais, que permiten almacenar contidos temporais antes de que o usuario os solicite, de xeito que cando completamos a nosa consulta, o sistema procurou cargala antes, dando a impresión de que o resultado acadouse ao instante, o que aseguran que suporá un aforro de tempo para o usuario, aínda que iso é moi discutible, pois durante o tecleo de consultas achégase un volume de información que moitos poden considerar excesivo, o que distrae a atención, de xeito que a suposta mellora de tempo máquina podería non ser tan positiva cando analizamos esta innovación dende o punto de vista humano.


Google adiántase ao usuario predicindo as súas buscas e amosando os resultados sen ter que premer o botón de Buscar

Dende Google desenvolveron esta nova solución para mellorar a velocidade das buscas por entender que a velocidade de lectura dos usuarios é moi superior á súa velocidade de escritura a través do teclado do ordenador, de xeito que resulta doado ver resultados ao mesmo tempo que se escribe unha consulta ao buscador, o que consideran que pode aforrar entre 2 e 5 segundos por busca, o que suporía un aforro global dunhas 11 horas por cada segundo grazas á integración de 15 novas tecnoloxías.
Pese a que o nome desta nova funcionalidade de Google pareza centrada na velocidade, en realidade o que incrementa é o volume de resultados amosados, o que podería mudar o xeito no que atopamos contidos na Internet e converte as buscas nun fluxo de resultados en tempo real que flúe na pantalla de xeito dinámico, o que podería levar a moitas compañías a mudar a súa estratexia de posicionamento para buscadores.
De todos os xeitos, moitos usuarios non están satisfeitos co funcionamento de Google Instant, o que non debería ser un problema, pois este sistema de busca pode desactivarse accedendo as preferencias de Google, aínda que dende a compañía de Mountain View xa teñen en conta os usuarios que acceden dende conexións lentas e desactivaranlles Google Instant de xeito automático para evitar que teñan problemas de funcionamento co seu equipo (aínda que aseguran que a carga que supón esta tecnoloxía é moi reducida, pois transmite texto).
Actualmente están a traballar en levar Google Instant a dispositivos móbiles, e coméntase a posibilidade de que poidamos ver o seu desembarco en dispositivos co sistema operativo Android antes de rematar o ano.
Tamén compre advertir que para poder acceder a Google Instant dende España é preciso que teñamos configurado o noso acceso ao buscador en inglés ou en español, posto que en galego aínda non está dispoñible esta nova funcionalidade e, de feito, tampouco está presente na fóra de EE.UU., Francia, Alemaña, Italia, Rusia, España e Reino Unido, aínda que procurarán espallalo xeograficamente nas vindeiras semanas.

Explicación do funcionamento de Google Instant

A Xunta sancionará á empresa encargada de achegar os ultraportátiles do proxecto Abalar

Fernando Sarasqueta — 2010-09-09T10:53:30Z


Portátil do proxecto Magalhães para levar as TIC ás escolas de Portugal

Tal e como sinalamos hai uns días en Código Cero, o proceso de chegada dos ordenadores ultraportátiles da primeira fase do proxecto Abalar aos colexios galegos está a ser máis accidentada do que se agardaba. Segundo a Consellería de Educación, departamento da Xunta responsable desta iniciativa, non foi posible cumprir cos prazos previstos (que incluían a chegada de 15.000 equipamentos nunha serie de colexios), por mor de problemas na cadea de fabricación emprazada en China, entre outros derivados da falta de compoñentes fundamentais para o uso dos trebellos. A Xunta, perante este imprevisto, reuniuse coa empresa galega responsable da importación dos equipos (que é a adxudicataria do proxecto) para pedirlle unha rápida solución do problema. Ademais disto o Goberno galego penalizará á empresa encargada do dito fornecemento tecnolóxico ao tempo que aclaraba que esta decisión non vai significar a rescisión do contrato.
Ao mesmo tempo, a Xunta réstalle importancia ao adiamento na chegada dos computadores lembrando que “é a primeira vez en que un goberno tenta destinar milleiros de ordenadores a milleiros de alumnos no sistema educativo galego”.

Os internautas recoñecen a calidade de 19 empresas galegas

Raquel Noya — 2010-09-09T10:19:27Z

11870.com, a web que permite compartir opinións e comentarios de restaurantes e empresas con outros usuarios, vén de publicar, por terceiro ano consecutivo, a listaxe cos sitios españois mellor valorados pola súa comunidade, formada por máis de 35.000 usuarios, e nela, aparecen ata 19 establecementos da provincia da Coruña.
A listaxe, que ata agora só se facía con establecementos de Barcelona e Madrid, recompila un total de 1000 empresas e fíxose con locais de toda España tendo en conta as valoracións medias de cada un.
Estas valoracións funcionan a modo de “nota media” do negocio e obtéñense unicamente unha vez ao ano a partir dun cálculo, en base a diferentes datos e variables, incluíndo unha revisión manual para evitar estafas.
Esta nota media pode ir de 1 a 5 estrelas e só premia aos negocios coas valoracións medias máis altas.
Con estes galardóns, a web pretende darlle visibilidade aos negocios españois “que se esforzan por facer as cousas ben e gañar a fidelidade e recoñecemento dos seus clientes”; asegurou Roberto Heredia, conselleiro delegado de 11870.com, quen engade que “tamén se premia a lealtade de milleiros de usuarios”.
Os locais favoritos dos usuarios e visitantes de 11870.com chegan este ano tamén ata A Coruña e inclúe 16 establecementos entre os mellor valorados de toda España. Os restaurantes Domus, Mesón O''Bo, O''Recanto e La Bombilla, a crepería Petite Bretagne, o bar O Patachim, a cafetería El Café de Macondo, a tetería La Gloira, a xeladería Colón e la libraría Formatos son os dez negocios que resultaron premiados nesta edición na cidade de A Coruña.
No resto da provincia destacan Restaurante Casa Marcelo, Casa de Xantar O Dezaseis, Bierzo Enxebre e Casa Felisa en Santiago de Compostela, Fogar do Santiso en Teo, El Huerto de Santa Cristina en Oleiros, Tira do Cordel en Fisterra e o Refugio de Pesca de Verdes en Coristanco.
Cada un dos establecementos seleccionados recibirá un distintivo que poderá exhibir nun lugar visible para ser fácilmente recoñecido polo gran público como “un dos mellores valorados de 2010 pola comunidade internauta”.
Un código datamatrix incluído neste permitirá, a través dun lector de códigos no teléfono móbil, acceder de maneira doada á listaxe dos negocios mellor valorados de 2010 cos respectivos datos, mapa, opinións, fotos e vídeos de cada un deles; asemade, cada empresa premidad contará cun distintivo en liña en 11870.com que a identificará como o mellor de 2010.

A plataforma en liña a favor dos medios en galegos xa superou as 3.000 sinaturas

Fernando Sarasqueta — 2010-09-09T10:11:54Z

Se onte falabamos neste mesmo medio da posta en marcha da plataforma en liña Os medios en galego importan e da obtención das 1.000 primeiras sinaturas, hoxe temos que dar conta dun salientable medre nese proceso de colleita, sendo xa máis de 3.000 os apoios recibidos a última hora do mércores. Como lembraremos, o obxectivo desta iniciativa é a de acadar a máxima repercusión na sociedade galega na defensa da lingua propia nos medios informativos, agora que a presenza das canles que apostaban por ela vén de diminuír de xeito notable. Segundo se fai saber en Galicia Hoxe, o manifestou contou entre os seus primeiros asinantes con figuras de renome no eido da cultura e da comunicación da nosa terra, como por exemplo a dos xornalistas e escritores Manuel Rivas, Ignacio Ramonet e Ramón Chao Rego, a do presidente da Mesa (Carlos Callón) ou a do presidente da Asociación de Medios Escritos en Galego, Xavier Cea.
Tal como se fai saber no comunicado-manifesto que acompaña á iniciativa, cómpre pechar fileiras arredor da seguinte realidade: “Os medios resultan imprescindibles para que o galego estea vivo e medre con futuro”, polo que é necesario (sinálase) recadar o maior número de apoios de dende tódalas frontes.
Con todo, ao mesmo tempo que se multiplican as achegas de colaboración, tamén se erguen voces de rexeitamento, como por exemplo a de Xaime Frías, quen nun artigo en GalizaLivre recoméndalle aos internautas descubrir “a verdadeira causa do peche de A Nosa Terra”, proceso que xunto co cese de actividade doutras canles como Vieiros ou Chuza! motivou a posta en marcha da dita plataforma e manifesto. A xuízo de Frías, o principal motivo do peche de A Nosa Terra radica na “mala xestión da empresa” e non tanto no que se apunta na iniciativa en liña posta en marcha os días pasados: a falta de apoios.

AGESTIC premia o bo facer das empresas galegas en materia das TIC

Raquel Noya — 2010-09-09T09:54:37Z

A Asociación Galega de Empresas TIC (AGESTIC), sabedora de que moitas das pequenas e medianas empresas do noso país están a facer un esforzo considerable para aplicar e desenvolver técnicas, metodoloxías, ferramentas e boas prácticas nos eidos da innovación e a competitividade, quere premiar este bo facer, e vén de convocar os seus premios Innova-G, cos que recoñece o labor de incorporación do modelo de negocio dixital das PEMES galegas, así como o seu esforzo innovador.
Segundo a organización dos Premios, “Galicia conta con empresas tecnolóxicas que fan posible cos seus desenvolvementos unha Galicia actual competitiva e cun pé no futuro”, neste senso, os e as profesionais galegas que veñen apostando polo desenvolvemento das TIC nas súas empresas e entidades, poden ver recoñecido o seu labor participando neste novo concurso que convoca AGESTIC.
Dende esta asociación e as entidades que colaboran nos premios queren galardoar “a innovación das empresas na incorporación a esta nova realidade, e dar o seu apoio e recoñecemento aos que non ven no cambio un problema se non unha oportunidade”.
Poderán participar nesta convocatoria tódalas PEMES galegas, tecnolóxicas ou non, que leven a cabo ou xa teñan feito a adaptación da súa empresa ao modelo de negocio dixital, ou que desenvolvan proxectos, produtos ou servizos 2.0.
O prazo de presentación de solicitudes manterase aberto ata o vindeiro 8 de outubro, e estas deberán ser subidas para ser votadas polos internautas á web oficial do evento.
Haberá dous premios por cada categoría (un premio dos internautas e un premio do xurado) e o acto de entrega de mencións celebraráse en Santiago de Compostela o 14 de outubro de 2010.
As categorías establecidas nesta edición son as que seguen:
Mellor idea de negocio 2.0: premio á mellor Start-up galega.
Mellor emprendedor/a galego/a 2.0: premia ao galego ou á galega líder e coraxuda que día a día, xunto ao seu equipo, saca adiante un proxecto empresarial 2.0
Mellor campaña social media: premia á PEME galega que mellor uso faga das redes sociais e servizos 2.0 (twitter, facebook…)
Mellor iniciativa de apoio á innovación: premia aos organizadores (persoas ou PEMES galegas) de xornadas, seminarios, eventos, reunións, webs…que promovan e apoien á innovación en Internet en Galicia.
Mellor desenvolvemento 2.0: premio á PEME galega cuio desenvolvemento 2.0 (redes sociais, comercio electrónico, e-learning…) sexa considerado o mellor feito en Galicia.
Mellor aplicación para dispositivos móbiles
Mellor solución tecnolóxica móbil
Mellor deseño para todos: premio á PEME galega responsable de modelo ou modelos usables e accesibles en Internet
Mellor desenvolvemento centrado nos cidadáns: grazas ao cal se produce unha innovación clara na calidade dos servizos sociais, sanitarios, educativos ou outros e se mellora sustancialmente a calidade de vida das persoas.
Mellor desenvolvemento de RSE: premio á PEME galega da mellor aplicación en internet para a responsabilidade social, o medio ambiente, igualdade de oportunidades...
Mellor desenvolvemento audiovisual en Internet: premio á PEME galega responsable do desenvolvemento audiovisual na rede máis innovador.
Malia que estes premios non contan con dotación económica, supoñen un recoñecemento ás entidades participantes e sérvenlle de gran axuda ao empresariado galego para que aposten polas novas tecnoloxías nos seus modelos de negocio.

Increméntanse nun 36 por cento os fallos de seguridade informática

Raquel Noya — 2010-09-08T16:21:00Z

Segundo vén de informar IBM, a compañía informática internacional que nos últimos anos está a apostar por mellorar a seguridade tanto en hardware como en software a través do seu equipo de investigación X-Force, no primeiro semestre de 2010 “incrementáronse moi significativamente as vulnerabilidades na seguridade das aplicacións (36 por cento), ao tempo que se incrementou a complexidade dos ataques encubertos en ficheiros pdf e código JavaScript”.
Así se desprende do último estudo sobre seguridade realizado por este equipo, onde tamén se identifica a seguridade en entornos virtualizados e cloud computing.
O informe indica que a seguridade está cobrando relevancia a medida que as empresas apostan pola virtualización e que o 35 por cento das vulnerabilidades que impactan nos sistemas virtualizados afectan á hipervisora (o software que controla todas as máquinas virtuais) o que, segundo os autores, “pon de manifesto a necesidade de ter en conta tamén a seguridade á hora de abordar os proxectos de virtualización”.
Nos primeiros 6 meses de 2010, as emisións de phising caeron un 82 por cento. As institución financieiras seguen a ser o principal obxectivo deste tipo de ataques (49 por cento), seguidas polas empresas emisoras de tarxetas de crédito (27 por cento), as organizacións públicas, así como a sinstitucións de pagos en liña e subastas.
España segue a figurar na listaxe dos 10 primeiros países (posto número 8) onde están ubicados os servidores que aloxan as direccións web contidas neste tipo de correos fraudulentos, e aquí, ao igual que no resto de países, a seguridade tamén está cobrando relevancia “a un ritmo vertixinoso”, aseguran os autores do estudo.

Importante operación policial contra un grupo que publicaba contidos protexidos na Internet

Marcus Fernández — 2010-09-08T15:51:07Z

Unha operación policial desenvolvida en 14 países europeos contra o intercambio de arquivos na Internet, dirixíndose concretamente á desarticulación dun grupo chamado Galaxy acusado de distribuír a través da Internet obras protexidas, saldouse co arresto de 10 administradores de páxinas web, o peque de 48 webs de descargas e a incautación de varios servidores e equipos, estando entre os afectados a compañía PQR que dá servizo ao buscador de descargas The Pirate Bay e a polémica web Wikileaks. España quedou fora desta investigación.

O control cidadán a través das novas tecnoloxías, a debate esta semana en Santiago

Fernando Sarasqueta — 2010-09-08T14:15:00Z

Como actividade formativa previa ao curso escolar, a Universidade de Santiago acolle esta semana un curso encamiñado a mover á reflexión sobre os usos que os diferentes eidos de control mundial están a facer das tecnoloxías da información, usos que nunha boa parte dos casos veñen revestidos con falsas coartadas a prol da liberdade e da participación cidadá. O curso Redefinindo a privacidade. Orwell 2010 parte da base de que o universo de vixilancia e control recreado polo escritor George Orwell no seu libro 1984 aínda fica plenamente vixente, aínda que as feituras externas sexan diferentes. O gran obxectivo da actividade é “obter unha descrición das novas tecnoloxías usadas por poderes públicos e grandes corporacións, mediante as que controlan ao cidadán no seu devir social ou mesmo privado”.
Na organización deste curso (que celebra este xoves 9 e máis o venres 10 na Facultade de Ciencias da Comunicación) atópase Ramom Lôpez-Suevos, catedrático de Estrutura Económica da USC. A actividade conta co financiamento da CIG e do Observatório para a Defensa dos Direitos e Liberdades (Esculca). A inauguración oficial comezará ás 9:00 horas no Auditorio da Facultade compostelá.


Programa das xornadas Orwell 2010

Celanova estrea hoxe a súa propia aula multimedia

Raquel Noya — 2010-09-08T12:48:46Z

Cada vez temos máis exemplos inequívocos de que o tradicional e as novas tecnoloxías non teñen por qué estar rifados para convivir nun mesmo entorno e de feito, esa simbiose que se dá en moitos casos, soe acabar nun beneficio mutuo que favorece, por enriba de todo, a nos os usurios.
O último exemplo de que as TIC e Internet teñen cabida no entorno máis tradicional do noso país vén da man da Secretaría Xeral de Medios, que acaba de inaugurar en Celanova o Telecentro de Comunicación da vila, que estará ubicado no Mosteiro de San Salvador.
O secretario xeral de Medios, Alfonso Cabaleiro Durán, e mailo alcalde de Celanova, Antonio Mouriño Villar, veñen de inaugurar, hoxe mesmo, a devandita aula multimedia, coa que se pretende achegarlle ós veciños e veciñas de todo o concello as tecnoloxías da información e a comunicación e a Rede de Redes.
Este singular espazo, co que a Secretaría pretende familiarizar a toda a cidadanía coas novas canles e soportes de comunicación, conta con varios equipos audiovisuis e multimedia e precisou dun presuposto de 120.000 euros para a súa execución.
A secretaría que dirixe Cabaleiro colaborou coa dotación e instalación dos equipos audiovisuais e multimedia, e a partir de agora, tamén será a encargada de correr cos custes de mantemento tecnolóxico.
Ademais de dotar ás aulas do equipamento axeitado (no caso de Celanova 15 terminais de ordenador conectados en rede mediante sistema avanzado de videoconferencia), a Xunta de Galicia busca que as aulas multimedia “se convirtan nun punto de encontro dentro do concello e nunha alternativa habitual na axenda de tempo libre de toda a cidadanía”.
Asemade, para que o concello ourensán se poida beneficiar do traballo colaborativo en Rede e da comunidade virtual, integrarase proximamente na Rede CeMIT (Centros de Modernización e Inclusión Tecnolóxica da Xunta de Galicia), tal e como aclarou a alcaldesa de Betanzos, Mª Dolores Faraldo Botana, que lle deu a benvida a Celanova a través de videoconferencia.
Os responsables desta iniciativa lembran que “unha aula multimedia é un espazo acondicionado acusticamente e de estética particular que dispón de material informático (ordenadores, impresoras, etc.), equipo de videoconferencia, material audiovisual, pantallas de proxección e de plasma, así como outros sistemas de control que permiten recrear diferentes escenarios (accións formativas, videoconferencias, visionado de audiovisuais ou multimedia) dependendo das necesidades técnicas das accións a desenvolver”.


O alcalde de Celanova e o secretario xeral de Medios inauguraron a nova aula multimedia

Expertos en identificación dixital chegan a Compostela da man do CPETIG

Raquel Noya — 2010-09-08T12:07:30Z

Co principal obxectivo de familiarizar á cidadanía cos novos entornos de identificación usando certificados dixitais e tarxetas criptográficas (para así mellorar a súa comunicación en liña con entidades públicas e privadas), o CPETIG vai levar a cabo, o vindeiro día 10 de setembro, un seminario de usos e aplicacións destas ferramentas, que poderá ser seguido por videoconferencia dende toda Galicia.
A xornada, que como apuntamos en días pasados, terá lugar no Telecentro de Santiago de Compostela, con emisión por videoconferencia aos telecentros de A Coruña, Lugo, Ourense e Vigo, contará co relatorio de Roberto Martínez, técnico de seguridade do INTECO-CERT e instrutor de cursos de seguridade informática, que achegará os principais conceptos sobre a sinatura electrónica, así como co de Natalia Miguel Álvarez, licenciada en Enxeñaría Informática pola Universidade Autónoma de Barcelona e experta en seguridade informática, que falará sobre os lectores de tarxetas intelixentes, achegando información de utilidade sobre esta tecnoloxía.
Asemade, intervirá Víctor Alberto Salgado Seguín, avogado-socio do Bufete de Dereito Informático Pintos&Salgado e europrise legal expert da Comisión Europea, que achegará a súa experiencia no eido da identificación en liña.
As persoas asistentes nos distintos telecentros poderán participar no seminario realizando preguntas ou comentarios aos relatores, e ao final do seminario recibirán candasúas tarxetas con sistema de cifrado e identificación dixital CERES+WG10 FNMT-RCM certificada pola Fábrica Nacional da Moeda e Timbre.
O acto dará comezo a partir das 16:00 horas e está previsto que remate ás 20:00 horas.

Investigadores da USC e do CIS Galicia deseñan un simulador para o manexo de buques mercantes

Fernando Sarasqueta — 2010-09-08T11:48:44Z

A creación de novas realidades vaise coando en tódolos eidos da comunicación e, tamén, da formación. Paseniño, xa case non se concibe a aprendizaxe de algo sen que ese algo se nos presente coma se fose real ao cen por cen, pero sen selo. O eido do control e manexo de buques, de extrema complexidade, non ía ser unha excepción. Da man do grupo MAR (Multimedia, Animación e Realidade Virtual) da Universidade de Santiago están a coller corpo unha serie de recursos para facilitar a dita tarefa na medida do posible, recursos que pasan pola recreación en 3D de tódolos elementos que afectan no eido real á navegación. Trataríase dun simulador naval, deseñado en colaboración co CIS Galicia (o Centro de Innovación e Servizos) e arestora en fase de perfeccionamento dos últimos detalles. Detrás da posta en marcha desta ferramenta atópase un grupo de investigadores dirixidos polo profesor Julián Flores González, que xunto co seu equipo levou a cabo unha recreación virtual de tódolos instrumentos de control e manexo que inclúe un barco mercante, así como unha completa figuración do mesmo en 3D.
Segundo se informa dende a páxina web de Emprendia, o obxectivo é achegarlle ao estudante tódolos recursos precisos para que estea preparado á hora de asumir un atraque real en todo tipo de circunstancias. A importancia do simulador é dupla, posto que até o de agora os profesores encargados de impartir este tipo de formación non contaban con ferramentas desta índole, en boa medida debido ao prezo dos simuladores comerciais, que andan a rentes dos 60.000 euros. O recurso feito polos investigadores da USC pon en xogo máis de unha baza. Por unha banda é máis accesible dende o punto de vista económico e pola outra insire unha serie de elementos que aos estudantes lles son máis propios, polo que é máis accesible. Amais disto, o simulador resulta especialmente manexable, xa que está a disposición dos alumnos a través de cadanseu computador, dende o que se poden ver e controlar tódolos dispositivos dun buque.

Movistar estrea a súa ferramenta de formación en liña Aula 365

Raquel Noya — 2010-09-08T11:24:43Z

A operadora de telefonía Movistar vén de lanzar un servizo de apoio escolar con contidos multimedia para nenos e nenas de entre seis e dezaseis anos, do que se poderán beneficiar totalmente de balde os clientes de ADSL da compañía.
Trátase de Aula 365, unha ferramenta que lle axuda ós estudantes a mellorar o seu rendemento e aos pais a facer un seguimento dos estudos dos seus fillos.
A aplicación permítelle aos usuarios compartir os seus intereses comúns de aprendizaxe e xerar conversacións dentro dun entorno seguro e moderado, co apoio dun mestre virtual.
Con esta iniciativa, Movistar pretende xerar unha comunidade educativa de aprendizaxe por Internet, ofrecer un servizo aberto, seguro e útil para o fogar, contribuir á sociedade estimulando o potencial de nenos e non tan nenos e promover conversacións que fomenten a intelixencia colectiva e colaborativa.
Todo isto encádrase dentro dun entorno totalmente moderado, de maneira que non hai ningún contido publicado que previamente non fora revisado e validado por profesionais.
Unha das peculiaridades deste servizo é que non permite insertar fotografías realis do neno polo que ao registrarse, éste debe seleccionar un personaxe e conformar a súa imaxe, o seu aspecto físico, vestuario e complementos; este avatar, será a súa imaxe dentro de Aula 365.
Para poder ser usuario de Aula 365, é preciso e imprescindible que o pai, a nai ou o titor se rexistre a primeira vez que accede á ferramenta para posteriormente dar de alta ao menor.
Aula 365 é de balde para tódolos clientes de Movistar ADSL, excepto Movistar ADSL tiempo libre e Movistar ADSL a tu medida, que teñen unha cota mensual por suscripc8ión de 2,9 euros ó mes.

HP anuncia algunha das melloras da versión 2.0 do sistema webOS

Fernando Sarasqueta — 2010-09-08T10:51:37Z

HP achegou os días pasados información sobre o estado de cousas relativo a web0S 2.0, a nova versión do sistema operativo multitarefa para sistemas Linux desenvolvido por Palm e agora propiedade da dita Hewlett-Packard. A nova versión, arestora en proceso de remate, chegará cunha serie de novidades de corpo e de fondo, entre as que se contan as denominadas Stacks, un soporte mellorado de HTML% e JavaScript e un sistema de procura de información de meirande alcance e rapidez. A previsión de HP, que é quen asume os labores de supervisión destes traballos, é a de achegar o novo sistema a finais de ano. De cumprirse todo o agardado, tanto os vindeiros smartsphones como os tablets de Apple virán baseados na plataforma que agora mantén HP, logo de formalizar o acordo de compra no pasado mes de xullo.
As melloras, informouse os días pasados dende medios como MuyComputer, afectan aos membros da comunidade de deseñadores e, por suposto, aos propios usuarios. Isto é o que se ofrece:
· Stacks. Son os mazos de cartas que constitúen as opcións de manexo de Palm. Tal e como se indica, as aplicacións dispóñense unhas enriba de outras coma xogo de cartas.
· O sistema de busca foi mellorado coas Quick Actions, que arestora están abertas para desenvolvedores. Imprimen máis rapidez e eficacia.
· Achéganse ferramentas para facer previsualizacións das aplicacións.
· Impulsouse o soporte HTML5 e JavaScript.

En marcha unha plataforma en liña para garantir a presenza de medios en galego

Fernando Sarasqueta — 2010-09-08T10:36:35Z

O galego é dende o punto de vista da información e a comunicación unha lingua tan válida coma calquera outra, co engadido de que é nosa e a nós nos atinxe a tarefa de preservala e coidala. Estas e moitas outras razóns, unidas ao peche de medios senlleiros que apostaban dende o seu comezo polo noso idioma, veñen de motivar a posta en marcha dunha plataforma social dirixida a alentar o compromiso da cidadanía e máis das administracións ca nosa lingua, plataforma que deu os seus primeiros pasos coa presentación do manifesto Os medios en galego importan e que agora aposta pola Rede para gañar o máximo potencial de promoción e convocatoria. Vémolo na páxina web do mesmo nome, unha iniciativa dixital aberta á comunidade internauta onde entre outras cousas se pode asinar a prol do devandito manifesto. Por certo que segundo se informa en Galicia Hoxe (onde se ofrece un completo estudo sobre a iniciativa e as repercusións que ten arestora), en menos de 24 horas de actividade da web, os apoios acadados xa ían alén do milleiro de sinaturas.
Os obxectivos da plataforma son claros: mobilizar á meirande cantidade de cidadáns para garantir unha información plural na nosa terra e, máis polo miúdo, que aposte pola nosa lingua, feito que en contra do que se pode pensar non ten por qué repercutir negativamente nas institucións e colectivos que avoguen polo contrario (un uso máis presente do castelán), senón que garantirían un eido informativo máis san e plural para tódolos implicados. Con todo, e tal como se agardaba, a web non é do gusto de algúns, tal e como se desprende do boicot que se lle fixo onte mesmo ao manifesto en liña, converténdoa por uns intres nun espazo ao servizo da seguinte mensaxe: “San José quere botar sen pagarlle aos traballadores d'A Nosa Terra, non firmes!!!” .