1,2 millóns de galegos acceden xa á súa historia clínica grazas á plataforma É-Saúde

O Servizo Galego de Saúde informou de que 1,2 millóns de persoas están rexistradas na plataforma É-Saúde, que permite o acceso de cada paciente á súa propia historia clínica no marco da xornada organizada hoxe en Madrid polo Ministerio de Sanidade con motivo do Día Mundial da Seguridade do Paciente que se conmemora o 17 de setembro.
En liña co lema da Organización Mundial da Saúde Demos voz aos pacientes!, o Sergas facilita a súa participación ofrecendo a posibilidade de consultar en calquera momento e lugar a súa historia clínica a través da app Sergas Móbil. Ademais, ofrécese a posibilidade de que cada paciente introduza información na súa carpeta persoal (PHR) de É-Saúde para acordar cos seus profesionais sanitarios a remisión de informes ou fotografías sobre o control da súa saúde.