Apple TV reproduce contidos directamente do PC ou MAC na televisión

Directamente chegada dende EE UU para todos aqueles que devecen cada día por seren sorprendidos polas últimas novidades de Apple, a compañía da mazá vén de presentar este híbrido entre reprodutor de DVD, iPod e PC, que pode transmitir contidos sen atrancos de por medio dende Internet na pantalla de TV. O novo Apple TV, (para sermos máis precisos), é un dispositivo no que se poden amorear (grazas ó seu disco duro de 40 xigabytes), todo tipo de contidos tales como cancións, vídeos ou fotografías para logo reproducilas a través da pantalla de TV coa calidade dun DVD.
Opera en Internet a través dunha conexión sen fíos e é tan sinxelo de usar (iso di Apple) coma un iPod. De feito, os seus creadores aseguran que Apple TV “comeza literalmente onde remata o iPod” xa que pode reproducir os contidos deste último e incluso reanudar unha sesión xusto dende o intre no que se detivo o dispositivo móbil para cambiar ó fixo (o Apple TV).
Entre outras moitas características, este trebello reproduce tódolos contidos da nosa biblioteca de iTunes na televisión dende un PC ou un Mac e sincroniza de xeito automático o contido dixital do noso computador para desfrutalo sen fíos na pantalla de TV. Ademais, os contidos de iTunes que se engaden ó Apple TV actualízanse neste gadget sen que teñamos que facer nada, e grazas a uns sinxelos menús, pode empregalo calquera que o desexe (e que dispoña dos preto de 300 euros que custa o aparello.)