A FCC publica detalles sobre o Nokia N95 3G para EE.UU.

Os norteamericanos que se sentiron defraudados polo iPhone poderán ver cómo Nokia responde ás súas oracións lanzando unha nova versión do seu N95, que é a xoia da coroa do fabricante finlandés por incorporar nun único terminal un móbil con cámara dixital de 5 Mpíxeles, conexión á Internet de alta velocidade e GPS, sendo case coma levar un ordenador no peto agás polo feito de que a súa pantalla sexa só de 2,6 polgadas.
Despois de moitos rumores sobre este terminal, a FCC vén de publicar os resultados das súas probas para a aprobación da súa comercialización en EE.UU. de xeito que se confirma que incluirá HSDPA nas bandas de 850 e 1.900 MHz podendo establecer conexións con esta tecnoloxía a velocidades de ata 3,6 Mbps (o modelo anterior carecía de 3G) e tamén a través de redes Wi-Fi, de xeito que pode conectarse á Rede dende case calquera lugar.
O Nokia N95 é un móbil moi completo coma reprodutor multimedia, coma dispositivo de captura de imaxe e coma GPS, que aínda podería mellorar en breve grazas á aparición dun modelo con 8 Gb de memoria (que lle faría fronte ó iPhone) xa que na actualidade a súa memoria só se pode incrementar mediante tarxetas de memoria de ata 2 Gb.