Medio Rural anuncia que a rede WiMAX pública do Courel estará operativa en decembro

Tal e como anunciamos onte nesta web, as Consellería de Medio Rural e Innovación abriron finalmente as roldas de presentacións da súa rede WiMAX de acceso á Rede nas comarcas do Courel e dos Ancares. O primeiro encontro cos veciños para darlles a coñecer as posibilidades desta infraestrutura (que a xuízo de Medio Rural podería servir para poñer en valor e mesmo diversificar as actividades económicas tradicionais das bisbarras, co fin de evitar o despoboamento continuo e a excesiva dependencia das explotacións mineiras que liquidan estes espazos naturais) celebrouse no Mosteiro de Samos. A rede, segundo fixo saber Medio Rural, é a primeira rede WiMAX de acceso público habilitada pola Xunta, e o seu obxectivo primeiro é levar Internet ós concellos de Samos e Folgoso do Courel, dous dos termos municipais de máis complicada orografía da nosa terra. O equipamento irá por partes: en decembro está operativo nos tres núcleos de máis poboación (Samos, Folgoso e Seoane) para logo cubrir o resto nun prazo duns seis meses.
Co fin de que esta tecnoloxía arrinque coa mellor posición en liña de saída e non fique coma outras infrautilizada, Medio Rural xa anunciou de que nun principio será de acceso gratuíto e que incluirá “servizos adaptados ás demandas dos veciños”. O proxecto, que inclúe enquisas entre os veciños para saber o tipo de solucións en liña que requiren, virá acompañado dunha mellora na recepción da canles de televisión e radio analóxicas. Innovación (que concorre na iniciativa cun orzamento de 60.000 euros) e Medio Rural achegan estes días unha interesante entrevista a un dos responsables da habilitación da infraestrutura, Víctor Álvarez, quen sinala que unha das grandes vantaxes do programa reside no que ten de loita contra a fenda dixital, esa que dá lugar a unha inxusta situación de desvantaxe do rural fronte ós espazos urbanos en liña: “Con esta rede”, di, “un rapaz dunha aldea do Courel accederá a Internet igual ca un de Lugo”.