Unha demo de Halo DS dispara os rumores de que a xente de Bungie podería deixar de traballar para Microsoft

O éxito de Halo 3 pode ser o pulo que necesitaba a consola Xbox 360 para manterse no mercado, xa que se trata dun título exclusivo para a consola de Microsoft, pero os rumores apuntan a que Bungie Studios poderían intentar levar o seu éxito a outras plataformas (segundo parece, mediante a separación da mesma por parte dun grupo de desenvolvedores), o que está sen confirmar oficialmente, pero que é unha idea que se reforzou pola publicación dun vídeo en IGN no que se podía ver unha demo do posible xogo Halo DS, ou sexa, unha versión adaptada para a consola portátil de Nintendo, que foi cancelado hai meses.
O certo é que para Nintendo DS predominan os xogos máis inocentes, e ata o momento non se considerou que os xogos de acción en primeira persoa poidan funcionar ben en consolas portátiles, pero a xente de Bungie parece que atopou un xeito de aproveitar a pantalla táctil da DS para darlle vida ó seu xogo na consola de peto.
Todo indica que Halo DS non verá a luz (con ese nome), pero co vídeo publicado parece lóxico pensar que podería rexurdir este xénero tan consolidado no PC nas consolas portátiles.