TryPhone, unha web para probar os móbiles antes de mercalos

Hoxe existe unha tendencia xeneralizada a trocar un móbil por outro cada vez que sae un novo modelo ó mercado con un par de opcións máis no menú có noso ou cun deseño máis lixeiro e anatómico que nos vai permitir gabarnos a pracer perante amigos e descoñecidos.
Esta arela por mercar sempre “o último” lévanos as máis das veces a adquirir dispositivos que non acabamos de entender, ou que nos defraudan tan axiña como os quitamos da caixa e prememos un par de botóns.
Para evitar estes infortunios, a web CanalPDA vén de dar cunha orixinal ferramenta interactiva que permite comparar as características de diversos modelos de teléfonos e simular o seu emprego mediante unha completa función de emulación.
Este sitio, chamado TryPhone conta cun centro de datos con centos de móbiles distintos e accesibles a distancia para probar aplicacións neles de xeito totalmente gratuíto dende as nosas computadoras e, segundo afirman os seus creadores, irán engadindo 4 ou 5 modelos novos cada semana.
Entre os móbiles que se atopan agora mesmo a disposición dos usuarios destacan o Nokia N95, o BlackBerry Pearl, o Palm Centro 690, o HTC Shadow e, como non, o desexado iPhone de Apple que xa caeu nas mans dalgún dos nosos redactores como podemos observar no último número da revista en papel.