O CIS constrúe o sistema Wavecat para o aproveitamento enerxético das ondas

O Centro de Innovación e Servizos de Ferrol (CIS – Galicia) lidera un proxecto de I+D+i para o desenvolvemento técnico e a construción dun prototipo do sistema Wavecat, deseñado polo Grupo de Enxeñaría de Costas e de Auga da Universidade de Santiago de Compostela para o aproveitamento enerxético das ondas do mar. Este proxecto abordará a definición total da súa estrutura para asegurar unha produtividade óptima e garantir a resistencia e a viabilidade.
O devandito sistema Wavecat, é un dispositivo flotante que permite xerar enerxía co rebase lateral das ondas do mar. O deseño do grupo de investigación da USC solventa tres dificultades fundamentais deste tipo de dispositivos, como son a irregularidade nas condicións das ondas, a necesidade dun deseño que soporte condicións climáticas extremas e o acoplamento entre as frecuencias das ondas e do xerador eléctrico.
Trátase dun sistema offshore, é dicir, que se sitúa en emprazamentos afastados da costa, o que permite un maior aproveitamento enerxético á vez que minimiza os conflitos de uso con actividades de aproveitamento dos recursos mariños. Ademais, estes dispositivos offshore reducen tanto o impacto ambiental como o visual. Sitúanse en profundidades de 50 metros de profundidade ou superiores e sobresaen moi pouco por riba da superficie mariña.
A auga que reborda o dispositivo pasa a uns depósitos onde provoca o movemento de turbinas. A estrutura forza o aumento da altura das ondas, o que fai que se incremente o rendemento, xa que a enerxía da onda é proporcional ao cadrado da altura. A investigación que lidera o CIS permitirá optimizar a produción enerxética e a viabilidade mecánica deste prototipo.
O devandito proxecto xorde da colaboración de varios centros tecnolóxicos, universidades e empresas e conta co financiamento da Consellaría de Innovación e Industria que colabora cun total de 282.100 euros.