Novo título de cociña para Nintendo DS

Tralo éxito de ¡Cocina Conmigo! para Nintendo DS (capaz de superar ao Guitar Hero On Tour) anuncian que para o 17 de outubro chegará ás tendas españolas a 39,99 euros o xogo ¡A Cocinar! con Jamie Oliver, de xeito que o cociñeiro británico máis coñecido para os espectadores de Canal Cocina e Localia protagonizará un novo título de cociña para a DS que inclúe un total de 100 receitas con fotografías reais e detalladas instrucións de preparación (apoiadas por imaxes animadas).

O xogo para Nintendo DS de Jamie Oliver fará uso dun sistema de recoñecemento de voz para permitir o seu uso sen mans mentres se cociña, contará cun sistema de listas da compra interactivo (para facilitar a adquisición dos ingredientes necesarios para facer as receitas seleccionadas), e conta coa innovación de permitir ao usuario crear o seu propio receitario (que se pode compartir con amigos e familiares a través da Nintendo Wi-Fi Connection).