Olens vende nos EE.UU. un proxector de vídeo de baixísima gama

Os proxectores de vídeo son un dos produtos da electrónica de consumo que máis baixaron de prezo nos últimos anos, á vez que perderon peso coma opción de cine en casa ante o incremento das pantallas TFT e de plasma, pero este tipo de trebellos poden resultar de moito interese para usuarios móbiles que queiran realizar presentacións públicas, e incluso se pode aproveitar a obsolescencia dalgúns trebellos para ofertalos a prezos moi atractivo, e así puidemos ver coma nos EE.UU. se vendía un proxector persoal de Olens por 179 dólares (uns 140 euros) o que é unha opción de grande interese aínda que non ofreza unhas prestacións destacables, xa que a súa resolución é de só 640 x 480 píxeles e a súa lámpada só soporta 300 horas de vida (aínda que inclúe outra lámpada adicional de serie).
Este proxector pode xerar unha imaxe de ata 70 polgadas de diagonal, chegándolle 2 metros de separación para crear unha proxección de 50 polgadas nun ambiente escuro (só ten 300 lúmenes). Tamén integra altofalantes, conta con entradas de vídeo composto, S-Video e VGA e as súas medidas son de 390 x 200 x 103 milímetros (encaixando bastante ben sobre unha torre dun ordenador).
Teriamos así un dispositivo a medio camiño entre os proxectores de vídeo de gama baixa e os pico-proxectores, que destaca principalmente polo seu baixo prezo.