Nova edición do Libro Guinness dos videoxogos

O ano pasado editouse en España unha versión do Libro Guinness dos Records dedicada en especial ao mundo dos videoxogos, e agora xa está dispoñible no Reino Unido o Guinness World Records 2009 Gamer’s Edition, libro que agardamos que chegue en poucas semanas nunha edición en español e que recolle moitas marcas curiosas dos videoxogos.

Entre as marcas recollidas no libro podemos ver que a partida máis longa a un xogo de acción en primeira persoa foi de 24 horas e 4 minutos á versión para Xbox 360 de Tom Clancy’s Rainbow Six: Vegas 2 por parte do equipo feminino Frag Dolls, o xogo con máis actores de dobraxe foi o Grand Theft Auto IV, a canción Saints of Los Angeles de Mötley Crüe foi o primeiro tema en vender máis copias no Bazar de Xbox LIVE que en iTunes, que Dance Dance Revolution foi o primeiro videoxogo recoñecido coma deporte oficial (en Noruega), a maior concentración de xente disfrazada de personaxes de videoxogos foi na londiniense Ponte do Milenio o pasado mes de marzo (con 80 asistentes), o maior premio dun torneo de videoxogos foi de 150.000 dólares, o videoxogo co título máis longo foi Yappari Itto ni Ittemo Soujyanakutemo Ok-na Gotsugou Shugi Gakuen Renai Adventure ou que o xogo máis retrasado da historia segue a ser o Duke Nukem Forever, anunciado en 1997 para mediados de 1998 e que continúa sen chegar ao mercado.