O videoxogo de Bakugan chegará no outono para tódalas plataformas

Logo do grande éxito acadado pola serie de anime xaponesa Bakugan Battle Brawlers (baseada no xogo de cartas estratéxico Bakugan) nas pantallas de todo o mundo, Activision Publishing vén de facerse cos seus dereitos para desenvolver e distribuír videoxogos baseados na mesma, mediante un acordo asinado con Nelvana Entrerprises.
O primeiro xogo de Bakugan verá a luz no vindeiro outono e publicarase para a Wii, a Nintendo DS, a Xbox 360 e as PlayStation 2 e 3.
Os responsables de Activision aseguran que o obxectivo da compañía é “ampliar esta propiedade intelectual de probado valor e satisfacer tanto aos seus seguidores como aos fans dos videoxogos, que estaban pedindo a gritos a súa versión do Bakugan”.
A serie conta a historia de Dan e os seus amigos, que loitan xunto a os seus Bakugan Brawlers para salvar o planeta de Vestroia e a Terra da destrución. Na actualidade emítese en Cartoon Network (en Estados unidos e internacionalmente) así como en TeleToon (en Canadá). A liña de xoguetes, desenvolvida por Spin Master Ltd, leva a acción ao popular xénero das cartas coleccionables, con esferas Bakugan con forma de bola que se transforman en figuras de combate ao rodar por enriba de certas cartas especiais.
O xoguete da serie gañou na pasada tempada de Nadal, tres premios concedidos por The Toy Industry Association: mellor xoguete do ano, xoguete do ano para nenos e propiedade intelectual do ano.
Agora, os videoxogos, en fase de desenvolvemento por parte do veterano estudio xaponés Now Production, transformarán en experiencias dixitais alucinantes os elementos que converteron a serie nun “fenómeno mundial”. O xogo incluirá todo o que os seguidores e fans de Bakugan agardan: batallas intensas posibilidade de crear os seus propios Brawlers, gráficos de calidade televisiva e combates multixogador.