Resident Evil 5 terá versión para PC en setembro

Resident Evil 5 é un dos xogos para Xbox 360 e PlayStation 3 que máis éxito acadou no que vai de ano, e ten moitas bazas para ser considerado o xogo do ano, pero finalmente non quedará limitado ás consolas de videoxogos de alta definición, senón que saltará tamén ao PC, confirmando Capcom tal lanzamento para o 15 de setembro en EE.UU. e o 18 de setembro en Europa.
A versión para PC de Resident Evil 5 non só permite ampliar o número de xogadores deste título, senón que tamén incorpora novas prestacións como a compatibilidade coa tecnoloxía GeForce 3D Vision, de xeito que os posuidores de lentes especiais de nVIDIA poderán ver en 3D estereoscópico o xogo e incluso as súas escenas cinemáticas.
O xogo tamén contará con novos traxes para os personaxes e o modo mercenarios soportará máis do triple de inimigos.