Microsoft cesa o soporte de xogo en rede para a primeira Xbox e os seus xogos

Fontes oficiais de Microsoft anunciaron hoxe que o vindeiro 15 de abril o servizo Xbox LIVE para a consola Xbox orixinal e os seus xogos deixará de operar, o que afectará tamén aos xogos da Xbox orixinal compatibles coa Xbox 360, coma o popular Halo 2, que quedarán sen xogo en liña, o que aseguran que é unha medida que vense forzados a tomar para poder introducir no servizo de xogo en liña novas características, mentres que o soporte da vella plataforma de xogo estaba a lastrar a innovación nesta infraestrutura que lidera o xogo en liña a través de consolas de videoxogos.
Actualmente hai uns 23 millóns de usuarios de Xbox LIVE, e case todos empregan a Xbox 360 para acceder ao servizo, e aínda que tampouco é moi habitual o xogo en rede para os títulos clásicos da primeira Xbox, algúns usuarios botarán en falta este soporte, aínda que no caso dos seareiros da saga Halo non parece que vaian ter problemas por non poder continuar a xogar ao Halo 2, pois na actualidade funcionan perfectamente en Xbox LIVE o Halo 3 e o máis recente Halo 3: ODST, aos que este ano seguirá Halo: Reach, de xeito que os seareiros do Xefe Mestre verán colmadas as súas ansias de xogo en rede sen problema.