Gbrainy: paquete de xogos de Gnome para adestrar os miolos

Para que ninguén diga que pasmamos o 99% do tempo que pasamos diante da pantalla do noso computador, gbrainy vén na nosa axuda para rebater con feitos probados o dito argumento. Trátase dun paquete de xogos de lóxica dirixidos a manter en forma o noso cerebro, se cadra un pouco tocado nos últimos tempos pola sobrecarga de información adurmiñadora, ao mesmo tempo que nos axuda a manternos entretidos. Segundo se nos conta en Bitelia, está desenvolvido para o escritorio Gnome, aínda que tamén se lle pode botar man para Windows. Dependendo dos frouxos o do fortes que andemos en materia cerebral, teremos diferentes niveis de dificultade.
O xogo, non nos enganemos, ten todo o que se lle pide a un xogo clásico, polo que os seus puntos máis salientables cumprirá buscalos no miolo: xogos lóxicos (habilitades de razoamento), cálculo mental (trátase de probar polo miúdo as habilidades de cómputo con operacións aritméticas), adestradores para a memoria e máis analoxías verbais.
O paquete, por certo, non xorde da nada: xa foi probado con estudantes de idades comprendidas entre os 15 e os 16 anos co obxectivo de poñer a proba a súa capacidade de lóxica.