Pulo orzamentario ao Centro de Transferencia de Tecnoloxía de Lugo

As entidades que fixeron posible a creación e a posta en marcha Centro de Innovación e Transferencia de Tecnoloxía (CITT) de Lugo, alá en 1995, veñen de renovar os acordos en materia de pulo ás actividades deste emprazamento de investigación, dedicado na súa meirande parte a favorecer o fluxo de información de valor entre empresas, institucións e máis universidades. O renovamento do acordo, formalizado este luns na sede de Caixa Rural, volveu contar coa dita entidade financeira e máis coa Universidade de Santiago, a Deputación Provincial e a Fundación CEL.
O convenio, que busca achegar continuidade ao dito Centro, vén acompañado dun orzamento de 57.094 euros –achegados por Caixa Rural Galega, Deputación e CEL- para dárlle azos e mellorar a liña de cooperación. Por certo que a USC asume nesta iniciativa o labor de realización de actividades.
Asinaron o convenio o reitor da USC, Juan Casares; o presidente da Deputación de Lugo, José Ramón Gómez Besteiro; o presidente da Caixa Rural, José María Pardo; e o vicepresidente da Confederación Empresarial Lucense, David Manuel García.
Entre as funcións do CITT de Lugo (que funciona ombro co ombro co de Santiago de Compostela, creado nos anos 80), inclúese a de axudar aos investigadores da USC a manexar a información sobre convocatorias e axudas, promover a cooperación entre a universidade e as empresas, así como canalizar as demandas externas e os traballos científicos e técnicos desenvolvidos nos departamentos universitarios.
Ao longo de 2009, informa a Universidade, o CITT xestionou un total de 284 actividades, correspondentes a 3 proxectos comunitarios, 25 accións do Plan Nacional, 40 actuacións financiadas pola Xunta e 216 contratos, convenios, informes técnicos e cursos con empresas e institucións. Este conxunto de actividades supuxo que os fondos acadados polos investigadores do campus lugués superasen os 7.300.000 euros.