Os enxeñeiros en Informática critican a política de emprego do Concello da Coruña

O Colexio Profesional de Enxeñaría en Informática de Galicia, CPEIG, vén de dar a coñecer o que ao seu xuízo sería un novo caso de discriminación de cara aos profesionais que representa. Desta volta, o malestar do colexio diríxese contra o Concello da Coruña, máis polo miúdo pola súa política de acceso ao emprego na administración local, que o CPEIG considera “lesiva” para o seu colectivo. Así llo fixo saber o presidente desta entidade, Fernando Suárez, ao alcalde da Coruña, Javier Losada, a través dunha misiva na que o CPEIG amosa o seu desacordo coas bases para a contratación dun técnico medio de innovación tecnolóxica publicadas o pasado 2 de xullo no BOP.
Segundo informa o colexio, trátase dun posto de traballo para desenvolver funcións que lle corresponden “claramente” a unha/un enxeñeira/o en informática, por moito que as bases inclúan a posibilidade de que os propios enxeñeiros ou enxeñeiras en Informática fiquen excluídos do proceso de selección, “ao esixirse como titulación a Enxeñería Técnica en Informática en exclusividade”, sinala. Desde o punto de vista do colexio profesional, este feito representa “unha clara e grave desconsideración cara á Enxeñaría en Informática e os seus profesionais”. E continúan: “Os colexiados e colexiadas do CPEIG demandámoslle a reserva de prazas específicas para a nosa titulación cando así o requiran as necesidades do Concello, sen prexuízo de que, atendendo ás características do posto concreto, poidan ser tamén accesibles as titulacións técnicas no eido da Enxeñaría en Informática”.