Persoas con diversidade funcional da Coruña aprenderán este venres os segredos da videoconferencia da man de Telefónica

Un grupo de persoas da Coruña con diversidade funcional vai participar nas actividades que Telefónica ten previstas no marco do seu Día Internacional do Voluntariado, a celebrar o vindeiro venres 1 de outubro. O colectivo coruñés concorrerá nas actividades a través dunha videoconferencia a tempo real na que aprenderán a empregar este tipo de ferramentas de comunicación. O evento en liña desenvolverase de 10.00 a 14.00 horas na sede da Caixa Ciberalia, na avenida de Fisterra, da Asociación Pro Persoas con Discapacidade Intelectual de Galicia (ASPRONAGA). A actividade celebrarase de xeito conxunto coa ONG Cibervoluntarios, que conectará ao grupo galego con outro centro para discapacitados da mesma organización en León.
Segundo informa a operadora, “será un intre único no que milleiros de empregados de Telefónica compartirán de xeito simultáneo o seu compromiso coa sociedade, dedicando parte da súa xornada laboral á realización de actividades de voluntariado”. A previsión da empresa é a de levar a cabo unhas 7.000 horas desta acción social durante toda a xornada. No caso de España, traballarase nunhas 40 actividades espalladas por todo o territorio estatal, en tres dos eidos nos que se adoita a traballar dende a empresa: exclusión social, medio ambiente e discapacidade.